તમે તમારા દેશનું ધ્યાન રાખો…પાકિસ્તાનના નેતાએ સમર્થનમાં કર્યું ટ્વિટ, કેજરીવાલે આપ્યો સણસણતો જવાબ

દિલ્હીમાં લોકસભા ચૂંટણી દરમિયાન સીએમ અરવિંદ કેજરીવાલે તેમના પરિવાર સાથે પોતાનો મત આપતા ફોટો શેર કર્યો હતો .જેના પર પાકિસ્તાનના ભૂતપૂર્વ પ્રધાન ફવાદ હુસૈન ચૌધરીએ ટ્વિટ કર્યું હતું અને લખ્યું હતું કે શાંતિ અને સદ્ભાવનાએ નફરત અને ઉગ્રવાદની શક્તિઓને હરાવી જોઈએ. જે બાદ સીએમ કેજરીવાલ અને પાકિસ્તાનના પૂર્વ મંત્રી વચ્ચે શાબ્દિક યુદ્ધ છેડાયું હતું.

ફવાદ હુસૈન ચૌધરીની પોસ્ટ પર તીક્ષ્ણ જવાબ આપતાં સીએમ કેજરીવાલે કહ્યું કે ચૌધરી સાહેબ હું અને મારા દેશના લોકો તેમના મુદ્દાઓને સંભાળવા માટે સંપૂર્ણ રીતે સક્ષમ છીએ. તમારી ટ્વીટની જરૂર નથી. હાલમાં પાકિસ્તાનની સ્થિતિ ખૂબ જ ખરાબ છે. તમે તમારા દેશનું ધ્યાન રાખો.

ચૂંટણી એ આપણી આંતરિક બાબત છે
સીએમ કેજરીવાલે પાકિસ્તાનના પૂર્વ મંત્રીને જવાબ આપતા આગળ લખ્યું કે ભારતમાં જે ચૂંટણી થઈ રહી છે તે અમારો આંતરિક મામલો છે. ભારત આતંકવાદના સૌથી મોટા પ્રાયોજકોની દખલગીરી સહન કરશે નહીં.

ફવાદ હુસૈને વળતો પ્રહાર કર્યો
સીએમ કેજરીવાલના નિવેદનનો જવાબ આપતા ફવાદ હુસૈને કહ્યું કે ભારતમાં નેતાઓનું ભાષણ પાકિસ્તાનની ટીકા કર્યા વિના પૂર્ણ થતું નથી. જ્યારે પાકિસ્તાનમાં કોઈને ભારતીય રાજકારણની પરવા નથી. આવું કેમ છે તેવો સવાલ પણ પૂછતા પોતાના જ સવાલના જવાબમાં પાકિસ્તાનના પૂર્વ મંત્રીએ કહ્યું કે તેનું એક કારણ એ પણ હોઈ શકે છે કે ભાજપ મુસ્લિમ વિરોધી ભાવનાઓ વ્યક્ત કરવા માટે પાકિસ્તાનનો ઉપયોગ કરે છે ?

મુખ્યમંત્રી સાહેબ! ચૂંટણી પ્રચાર તમારો પોતાનો મુદ્દો છે. પરંતુ ઉગ્રવાદ ખૂબ જ ખતરનાક છે. પછી તે પાકિસ્તાન હોય કે ભારતમાં, પછી તે બાંગ્લાદેશ હોય, ભારત હોય કે પાકિસ્તાન તેથી દરેકે ચિંતા કરવી જોઈએ. પાકિસ્તાનની સ્થિતિ હજુ પણ ઉગ્રવાદથી દૂર છે, પરંતુ સારા સમાજ માટે પ્રયત્નો કરવા જોઈએ.