નવી દિલ્હી. કેન્દ્રીય ગૃહમંત્રી અમિત શાહે એક સાક્ષાત્કાર દરમિયાન કહ્યું કે BJP ફરીથી સત્તામાં આવશે તો પાંચ વર્ષની અંદર સર્વસંમતિથી સમગ્ર દેશ માટે સમાન નાગરિક સંહિતા (UCC) અને એક દેશ, એક ચૂંટણી લાગુ કરશે. એક સાથે ચૂંટણી કરવાથી ખર્ચ પણ ઓછો થશે.
અમિત શાહે દાવો કર્યો કે તેમની પાર્ટીએ કોઈ પણ પ્રકારનો ધર્મ આધારિત પ્રચાર કર્યો નથી. પરંતુ મુસ્લિમ અનામત વિરોધ, કલમ 370 ના રદ અને UCC લાગુ કરવા માટે મતદારો સુધી પહોંચવું જો ધર્મ આધારિત ચૂંટણી અભિયાન ગણાય તો BJP એ આ કર્યું છે અને આગળ પણ કરશે.
શાહે કહ્યું કે વિપક્ષની ચૂંટણી પંચની ટીકા એ તેમની શક્ય હારને છુપાવવાનો પ્રયાસ છે. ગૃહમંત્રીએ EVM અને મતદાનના આંકડાઓ જેવા મુદ્દાઓ પર વિપક્ષ દ્વારા કરવામાં આવેલી ચૂંટણી પંચની ટીકા નકારી કાઢી હતી. તેમણે જણાવ્યું કે તેલંગાણા, પશ્ચિમ બંગાળ અને હિમાચલ પ્રદેશ સહિતના છેલ્લા વિધાનસભા ચૂંટણીઓમાં આ જ પ્રથાઓનું પાલન થયું હતું અને આ ચૂંટણીમાં BJP હારી ગઈ હતી.
તેમણે કહ્યું, “જો તે ચૂંટણી નિષ્પક્ષ હતા તો આ ચૂંટણી પણ નિષ્પક્ષ છે. તમે જ્યારે હાર જોતા હો ત્યારે પહેલાથી જ રડવાનું શરૂ કરી દો છો અને વિદેશ જવાના બહાના શોધો છો. તેઓએ છ તારીખે રજા પર જવું છે તો કંઈક તો બોલવું પડશે.”
શાહે કહ્યું કે કોંગ્રેસના પ્રશ્નો ઉઠાવવાનો ઉદ્દેશ્ય રાહુલની નિષ્ફળતાને ઢાંકવાનો છે. “જ્યારે પણ વિપક્ષ ચૂંટણી હારે છે ત્યારે EVM પર પ્રશ્નો ઉઠાવે છે,” એમ તેમણે જણાવ્યું.