સેંકડો મહિલાઓના યૌન શોષણના કેસમાં સંડોવાયેલા પૂર્વ વડાપ્રધાન દેવેગૌડાના પુત્ર JDS નેતા એચડી રેવન્નાની કર્ણાટક પોલીસની SIT દ્વારા ધરપકડ કરવામાં આવી છે. પીડિતાના અપહરણના કેસમાં તેની પૂછપરછ કરવામાં આવી રહી છે.
ગયા ગુરુવારે મૈસુરમાં એક મહિલાના અપહરણનો કેસ નોંધવામાં આવ્યો હતો. તે મહિલા પણ યૌન શોષણનો શિકાર છે. કેસ નોંધાયા બાદ પોલીસે રેવન્નાના ખાસ સતીશ બબન્નાની ધરપકડ કરી હતી. હવે SIT દ્વારા બે વખત નોટિસ આપ્યા બાદ પણ હાજર ન થવા બદલ રેવન્નાની ધરપકડ કરવામાં આવી છે.
આ ધરપકડથી બચવા માટે કર્ણાટકના પૂર્વ મંત્રી એચડી રેવન્નાએ કોર્ટમાં આગોતરા જામીન માટે અરજી કરી હતી. જેને આજે સાંજે કોર્ટે ફગાવી દીધી હતી. લોકપ્રતિનિધિ અદાલતના ન્યાયાધીશ સંતોષ ગજાનન ભટ્ટની ખંડપીઠે અરજી ફગાવી દીધી હતી અને આગામી સુનાવણી માટે 6 મેની તારીખ નક્કી કરી હતી.
અગાઉ એસઆઈટીએ એચડી અને પ્રજ્વલ સામે લુકઆઉટ નોટિસ પણ જારી કરી હતી. આ સાથે CBIને પ્રજ્વલ વિરુદ્ધ ઇન્ટરપોલ તરફથી બ્લુ કોર્નર નોટિસ જારી કરવા વિનંતી કરવામાં આવી છે. આ સેક્સ સ્કેન્ડલના ખુલાસા બાદ પ્રજ્વલ 27 એપ્રિલે વિદેશ ભાગી ગયો હતો.
અગાઉ, એચડી રેવન્નાની ધરપકડના પ્રશ્ન પર, કર્ણાટકના ગૃહ પ્રધાન જી,પરમેશ્વરાએ કહ્યું હતું કે, “એચડી રેવન્નાને તક આપવામાં આવી છે. તેને કલમ 41 હેઠળ નોટિસ આપવામાં આવી છે. તેમણે SIT સમક્ષ હાજર થઈને પોતાનો પક્ષ રજૂ કરવાનો રહેશે. તેમને બીજી નોટિસ પણ આપવામાં આવી છે. તેમની પાસે 24 કલાક છે, જે આજે સાંજે સમાપ્ત થશે. આ પછી કાર્યવાહી કરવામાં આવશે.
જેના કારણે પોલીસે કાર્યવાહી કરીને તેની ધરપકડ કરી હતી. રેવન્નાના ઘરમાં કામ કરતી રસોઈયાની ફરિયાદના આધારે ગયા રવિવારે હસન જિલ્લાના હોલેનસીપુરા પોલીસ સ્ટેશનમાં પિતા-પુત્ર વિરુદ્ધ જાતીય સતામણીનો પહેલો કેસ નોંધવામાં આવ્યો હતો. તેણે પોતાના નિવેદનમાં એચડી અને પ્રજ્વલ પર સનસનાટીભર્યા આરોપો લગાવ્યા છે.
આ મામલામાં 701 મહિલાઓએ રાષ્ટ્રીય મહિલા આયોગને પત્ર લખીને પ્રજ્વલ અને એચડી રેવન્ના સામે કાર્યવાહી કરવાની માંગ કરી છે. આ ઝુંબેશ ગૂગલ ફોર્મ દ્વારા ચલાવવામાં આવી હતી. પત્ર લખનાર મહિલાઓએ આ મામલે NCWના નબળા જવાબ પર સવાલ ઉઠાવ્યા છે. ઓલ ઈન્ડિયા ફેમિનિસ્ટ એલાયન્સ, વુમન ફોર ડેમોક્રસી અને મહિલાઓના અધિકારો માટે લડતી સંસ્થાઓના સભ્યોએ કાર્યવાહીની માંગ કરી છે.
આ પત્રમાં 701 મહિલાઓની સહી છે. તેમણે એચડી રેવન્ના અને પ્રજ્વલ રેવન્નાની તાત્કાલિક ધરપકડની માંગ કરી છે. આ સાથે એવી વિનંતી કરવામાં આવી છે કે કર્ણાટક બીજેપી અધ્યક્ષને ડિસેમ્બર 2023થી પ્રજ્વલ રેવન્નાની અપરાધિક ગતિવિધિઓ અંગે સત્તાધારી પક્ષ પાસે ઉપલબ્ધ માહિતી વિશે પૂછપરછ કરવા માટે સમન્સ જારી કરવામાં આવે.