T20 World Cup: T20 વર્લ્ડ કપ 2024માં નામીબિયા અને ઓમાન વચ્ચે સુપર ઓવર રમાઈ હતી. નામિબિયાની ટીમ આ મેચ જીતી ગઈ છે.

T20 વર્લ્ડ કપના ઈતિહાસમાં અત્યાર સુધી 3 સુપર ઓવર મેચો થઈ છે. T20 વર્લ્ડ કપ 2024માં ત્રીજી સુપર ઓવર થઈ, જેમાં નામિબિયાએ ઓમાનને સુપર ઓવરમાં હરાવ્યું. T20 વર્લ્ડ કપમાં 12 વર્ષ બાદ સુપર ઓવર થઈ છે. છેલ્લી સુપર ઓવર વર્ષ 2012માં રમાઈ હતી. ન્યુઝીલેન્ડની ટીમ એકમાત્ર એવી ટીમ છે જેણે T20 વર્લ્ડ કપમાં બે સુપર ઓવર મેચ રમી છે અને બંને વખત તેને હારનો સામનો કરવો પડ્યો છે. 

પ્રથમ સુપર ઓવર

T20 વર્લ્ડ કપમાં પ્રથમ સુપર ઓવર ન્યુઝીલેન્ડ અને શ્રીલંકા વચ્ચે 27 સપ્ટેમ્બર 2012ના રોજ રમાઈ હતી. આ મેચમાં ન્યૂઝીલેન્ડે પ્રથમ બેટિંગ કરીને 174 રન બનાવ્યા હતા. આ પછી શ્રીલંકાએ પણ બેટિંગ કરતા 174 રન બનાવ્યા હતા. ત્યારબાદ મેચ સુપર ઓવરમાં ગઈ હતી. જ્યાં શ્રીલંકાએ સુપર ઓવરમાં પ્રથમ બેટિંગ કરીને 13 રન બનાવ્યા હતા અને કિવી ટીમને જીતવા માટે 14 રનનો ટાર્ગેટ આપ્યો હતો. જ્યારે ન્યુઝીલેન્ડની ટીમ સુપર ઓવરમાં માત્ર 7 રન બનાવી શકી હતી. 

બીજી સુપર ઓવર 

આ પછી ટી-20 વર્લ્ડ કપ 2012માં બીજી સુપર ઓવર પણ થઈ હતી. ત્યારબાદ વેસ્ટ ઈન્ડિઝ અને ન્યુઝીલેન્ડ વચ્ચે મેચ રમાઈ હતી. આ મેચમાં વેસ્ટ ઈન્ડિઝે પ્રથમ બેટિંગ કરીને 139 રન બનાવ્યા હતા. ત્યારબાદ ન્યુઝીલેન્ડે પણ 139 રન બનાવ્યા હતા. સુપર ઓવરમાં ન્યુઝીલેન્ડ માટે રોસ ટેલરે શાનદાર પ્રદર્શન કર્યું હતું. તેના કારણે જ કીવી ટીમ સુપર ઓવરમાં 17 રન બનાવવામાં સફળ રહી હતી અને વેસ્ટ ઈન્ડિઝને જીતવા માટે 18 રનનો ટાર્ગેટ મળ્યો હતો. આ પછી વેસ્ટ ઈન્ડિઝે એક ઓવરમાં 19 રન બનાવીને મેચ જીતી લીધી હતી. T20 વર્લ્ડ કપમાં ન્યૂઝીલેન્ડે બે સુપર ઓવર રમી અને બંનેમાં ટીમને હારનો સામનો કરવો પડ્યો. 

ત્રીજી સુપર ઓવર 

T20 વર્લ્ડ કપના ઈતિહાસમાં ત્રીજી સુપર ઓવર નામીબિયા અને ઓમાન વચ્ચે વર્ષ 2024માં રમાઈ હતી. આ મેચમાં ઓમાનની ટીમે પ્રથમ બેટિંગ કરીને 109 રન બનાવ્યા હતા. એવું લાગી રહ્યું હતું કે નામિબિયાની ટીમ આસાનીથી મેચ જીતી જશે. પરંતુ ઓમાને જોરદાર લડત આપી અને નામિબિયાની ટીમ પણ માત્ર 109 રન બનાવી શકી. 

આ પછી, સુપર ઓવરમાં, નામિબિયાની ટીમે પ્રથમ બેટિંગ કરી અને 21 રન બનાવ્યા. ત્યારબાદ નામિબિયાના બોલર ડેવિડ વિઝે સુપર ઓવરમાં સારી બોલિંગ કરી, જેના કારણે ઓમાનની ટીમ માત્ર 10 રન બનાવી શકી. આ રીતે નામિબિયાની ટીમે સુપર ઓવરમાં મેચ જીતી લીધી હતી.