Uttar Pradeshમાં ચૂંટણી પહેલાં ઓવૈસી અને ચંદ્રશેખર આઝાદે બનાવ્યું નવું ગઠબંધન, 403 બેઠકો પર ચૂંટણી લડવાની જાહેરાત

Uttar Pradesh Election 2027: 2027ની ઉત્તર પ્રદેશ વિધાનસભા ચૂંટણી પહેલાં રાજ્યના રાજકારણમાં નવા ગઠબંધનની એન્ટ્રી થઈ છે. AIMIMના પ્રમુખ અસદુદ્દીન ઓવૈસી અને આઝાદ સમાજ પાર્ટી (કાંશીરામ)ના પ્રમુખ ચંદ્રશેખર આઝાદે સાથે મળીને ‘સામાજિક પરિવર્તન મોરચા’ની રચનાની જાહેરાત કરી છે. બંને નેતાઓએ આ ગઠબંધનને ભાજપનો મજબૂત વિકલ્પ ગણાવ્યું છે. આ જાહેરાત બાદ ઉત્તર પ્રદેશના રાજકીય સમીકરણોમાં નવા ફેરફારો થવાની શક્યતા વ્યક્ત કરવામાં આવી રહી છે.

ચંદ્રશેખર આઝાદે કહ્યું- આ ત્રીજો નહીં, પહેલો મજબૂત મોરચો હશે

ગઠબંધનની જાહેરાત દરમિયાન ચંદ્રશેખર આઝાદે જણાવ્યું કે આ કોઈ ત્રીજો મોરચો નહીં, પરંતુ પહેલો મજબૂત મોરચો હશે. તેમણે કહ્યું કે મોટા ગઠબંધનમાં સામેલ થવાના પ્રયાસો કરવામાં આવ્યા હતા, પરંતુ તેમને યોગ્ય મહત્વ આપવામાં આવ્યું નહોતું. હવે અપમાન સહન કરવામાં નહીં આવે અને સામાજિક પરિવર્તન માટે મજબૂત રાજકીય વિકલ્પ ઊભો કરવામાં આવશે. આ સાથે તેમણે સમાજવાદી પાર્ટી અને કોંગ્રેસને પણ ભાજપને હરાવવા માટે આ મોરચામાં જોડાવા અપીલ કરી હતી.

ઓવૈસીએ ચંદ્રશેખર આઝાદને મુખ્યમંત્રી પદનો ચહેરો જાહેર કર્યો

અસદુદ્દીન ઓવૈસીએ ગઠબંધનની જાહેરાત દરમિયાન ચંદ્રશેખર આઝાદને ઉત્તર પ્રદેશમાં મુખ્યમંત્રી પદના ચહેરા તરીકે રજૂ કર્યા હતા. તેમણે કહ્યું કે સામાજિક પરિવર્તન મોરચો ભાજપને રોકવા માટે મજબૂત વિકલ્પ બની શકે છે. ઓવૈસીના જણાવ્યા અનુસાર, અત્યાર સુધી તેમના સમુદાયના લોકોને માત્ર મતદાતા તરીકે ઉપયોગમાં લેવામાં આવ્યા છે. હવે રાજકીય ભાગીદારી અને સામાજિક પરિવર્તન માટે આ મોરચાને મજબૂત બનાવવામાં આવશે.

તમામ 403 બેઠકો પર ચૂંટણી લડવાની જાહેરાત

ઓવૈસીએ જાહેરાત કરી કે સામાજિક પરિવર્તન મોરચો ઉત્તર પ્રદેશની તમામ 403 વિધાનસભા બેઠકો પર ચૂંટણી લડશે. આ જાહેરાત સાથે જ આગામી ચૂંટણીમાં ગઠબંધનની ભૂમિકા અંગે ચર્ચા શરૂ થઈ છે. હવે જોવાનું એ રહેશે કે આ મોરચો અન્ય પક્ષોને પોતાની સાથે જોડવામાં કેટલો સફળ રહે છે અને ચૂંટણીમાં કેટલો રાજકીય પ્રભાવ ઊભો કરી શકે છે.

UPના રાજકારણમાં નવા સમીકરણોની શક્યતા

2027ની ચૂંટણી પહેલાં ઓવૈસી અને ચંદ્રશેખર આઝાદનું એક મંચ પર આવવું ઉત્તર પ્રદેશના રાજકારણમાં મહત્વપૂર્ણ ઘટનાક્રમ માનવામાં આવી રહ્યું છે. ભાજપ સામે વિકલ્પ ઊભો કરવાનો દાવો કરનાર આ ગઠબંધન સમાજવાદી પાર્ટી અને કોંગ્રેસના રાજકીય ગણિતને પણ અસર કરી શકે છે. જોકે, ચૂંટણીમાં તેની વાસ્તવિક અસર ગઠબંધનની સંગઠનાત્મક તાકાત, ઉમેદવારો અને મતદારોના સમર્થન પર નિર્ભર રહેશે.