Iran: અમેરિકાએ ઈરાન સામે નવો મોરચો ખોલ્યો: દેખરેખ રાખવા માટે 20 અધિકારીઓની ટીમ; ‘આયર્ન ગેટ’ (Iron Gate) યોજના શું છે?

Iran: અમેરિકાએ ઈરાની લશ્કરી સાધનોના પુરવઠાને રોકવાના ઉદ્દેશ્ય સાથે એક નવા ‘ટાસ્ક ફોર્સ’ની રચના કરવાની જાહેરાત કરી છે. તેને ‘ટાસ્ક ફોર્સ આયર્ન ગેટ’ (Task Force Iron Gate) નામ આપવામાં આવ્યું છે.

અમેરિકાનો આરોપ છે કે ઈરાન અન્ય દેશોમાં અત્યાધુનિક શસ્ત્રો, બેવડા ઉપયોગ (dual-use) વાળી ટેકનોલોજી અને પ્રતિબંધિત વસ્તુઓ પહોંચાડવા માટે જમીની માર્ગોનો ઉપયોગ કરી રહ્યું છે. યુએસ સેન્ટ્રલ કમાન્ડ (CENTCOM) ના જણાવ્યા અનુસાર, આવી પ્રવૃત્તિઓ પર લગામ લગાવવા માટે અમેરિકાએ આ પગલું ભર્યું છે.

CENTCOM એ જણાવ્યું કે, આ ટાસ્ક ફોર્સની સ્થાપના શનિવારે કરવામાં આવી હતી, જે CENTCOM ના કમાન્ડર એડમિરલ બ્રાડ કૂપરના નિર્દેશો પર આધારિત છે. આ ટીમમાં લગભગ 20 નાગરિક અને લશ્કરી અધિકારીઓનો સમાવેશ થશે અને તેનું મુખ્ય મથક ફ્લોરિડાના ટેમ્પામાં હશે.

‘ટાસ્ક ફોર્સ આયર્ન ગેટ’ શું કરશે?
CENTCOM ના જણાવ્યા અનુસાર, આ નવું ટાસ્ક ફોર્સ અમેરિકાની અન્ય સરકારી એજન્સીઓ સાથે મળીને કામ કરશે. તેનો ઉદ્દેશ્ય ઈરાનની જમીની સરહદો અને કેસ્પિયન સમુદ્રમાં થતી ગેરકાયદેસર પ્રવૃત્તિઓને અટકાવવાનો છે.

આ ટીમ અત્યાધુનિક શસ્ત્ર પ્રણાલીઓ, બેવડા ઉપયોગ વાળી ટેકનોલોજી અને પ્રતિબંધિત વસ્તુઓની હેરફેર પર નજર રાખશે. વધુમાં, તે ગેરકાયદેસર રીતે મેળવેલી આવકના પ્રવાહને રોકવા માટે પણ કામ કરશે.

CENTCOM ના એક નિવેદનમાં એડમિરલ બ્રાડ કૂપરે જણાવ્યું હતું કે, ‘ટાસ્ક ફોર્સ આયર્ન ગેટ’ની સ્થાપના ઈરાન સામેના હાલના દરિયાઈ નાકાબંધી (maritime blockade) ના પ્રયાસોને વધુ મજબૂત બનાવે છે.

તેમણે ઉમેર્યું કે, CENTCOM અને અમેરિકાની અન્ય સરકારી એજન્સીઓ વચ્ચેના ગાઢ સહયોગથી ઈરાનની ક્ષમતાઓ પર વધુ નિયંત્રણ આવશે; જેમ કે આતંકવાદને નાણાં પૂરા પાડવા, શસ્ત્રો બનાવવાની સુવિધાઓનું પુનઃનિર્માણ કરવું અને પોતાના લશ્કરી ભંડારને ફરીથી ભરવું.

ઈરાન પર તેની કેટલી અસર પડશે?
CENTCOM નો દાવો છે કે, અમેરિકી નૌકાદળની નાકાબંધીને કારણે, ઈરાન છેલ્લા કેટલાક મહિનાઓમાં 25 અબજ ડોલરથી વધુ મૂલ્યના ક્રૂડ ઓઈલની નિકાસ કરવામાં અસમર્થ રહ્યું છે. વધુમાં જણાવવામાં આવ્યું છે કે, આ દરિયાઈ નાકાબંધીનું કડક પાલન કરાવવામાં આવી રહ્યું છે. ઈરાની બંદરો પર આવતા કે ત્યાંથી રવાના થતા તમામ જહાજો પર નજર રાખવામાં આવી રહી છે.