પાકિસ્તાનની આર્થિક સ્થિતિ કોઈનાથી છુપી નથી. અહીં મોંઘવારીએ તમામ હદો તોડી નાંખી છે. આ દરમિયાન ઈસ્લામાબાદે ફરી એકવાર તેના મિત્ર બેઈજિંગ સાથે નિકટતા વધારવાનું શરૂ કર્યું છે. વાસ્તવમાં દ્વિપક્ષીય સંબંધોને વધુ મજબૂત કરવા વડાપ્રધાન શાહબાઝ શરીફ આવતા સપ્તાહે ચીનની મુલાકાત લેશે.
પાંચ દિવસની સફર
વિદેશ કાર્યાલયે શુક્રવારે જાહેરાત કરી હતી કે શરીફ મંગળવારે ચીનની મુલાકાત લેશે. આ યાત્રા પાંચ દિવસ સુધી ચાલશે. તમને જણાવી દઈએ કે, બંને દેશો અબજ ડોલરના ચાઈના-પાકિસ્તાન ઈકોનોમિક કોરિડોર હેઠળ સહયોગને આગળ વધારવા માંગે છે.
પીએમ આ દિવસે જશે ચીન
વિદેશ કાર્યાલયના પ્રવક્તા મુમતાઝ ઝહરા બલોચે કહ્યું કે શરીફ ચીનના રાષ્ટ્રપતિ શી જિનપિંગના આમંત્રણ પર 4 થી 8 જૂન સુધી ચીનમાં રહેશે. આ મુલાકાતનો હેતુ ચીન-પાકિસ્તાન ઇકોનોમિક કોરિડોર (CPEC) પ્રોજેક્ટ હેઠળ સહકાર વધારવાનો છે, કારણ કે બંને પક્ષો પ્રોજેક્ટના બીજા તબક્કાની શરૂઆત કરવા આતુર છે.
ઇસ્લામાબાદમાં બેઠક યોજી હતી
વડાપ્રધાને શુક્રવારે ઈસ્લામાબાદમાં તેમની આગામી ચીનની મુલાકાત અંગે એક બેઠકની અધ્યક્ષતા કરી હતી. આ દરમિયાન તેમણે ચીની કંપનીઓને પાકિસ્તાનમાં ઉદ્યોગો સ્થાપવા માટે પ્રોત્સાહિત કરવા માટે એક એક્શન પ્લાન તૈયાર કરવાનો નિર્દેશ આપ્યો હતો. પાકિસ્તાન ચીનના ઉદ્યોગપતિઓ અને રોકાણકારોને શક્ય તમામ સુવિધાઓ પૂરી પાડશે તેવી ખાતરી પણ આપવામાં આવી હતી.
મીડિયા રિપોર્ટ્સ અનુસાર, વડાપ્રધાનને તેમના ચીન પ્રવાસની તૈયારીઓ વિશે વિગતવાર માહિતી આપવામાં આવી હતી. ચીનના શહેર શેનઝેનની મુલાકાત દરમિયાન તેમની સાથે પાકિસ્તાની ઉદ્યોગપતિઓ, રોકાણકારો અને ઉદ્યમીઓનું પ્રતિનિધિમંડળ પણ ચીનના વેપારી સમુદાયને મળશે અને બંને દેશો વચ્ચે બિઝનેસ-ટુ-બિઝનેસ સંબંધોને પ્રોત્સાહન આપવા અંગે ચર્ચા કરશે.