India: સમુદ્રમાં ભારતીય નૌકાદળની વીરતા: ચાંચિયાઓના ચુંગાલમાંથી ૨૦ ઈરાનીઓને બચાવ્યા; તેહરાને કહ્યું ‘આભાર’
India: ભારતીય નૌકાદળે સોમાલિયાના કિનારા નજીક ચાંચિયાઓના કબજામાં આવી ગયેલી ‘અજિની’ (Ajini) નામની ઈરાની માછીમારી હોડીને મુક્ત કરાવી છે. આ અભિયાન દરમિયાન હોડી પર સવાર તમામ ૨૦ ઈરાની ક્રૂ સભ્યોને સુરક્ષિત રીતે બચાવી લેવામાં આવ્યા હતા. આ મિશનમાં ભારતીય વાયુસેનાએ પણ મહત્વની ભૂમિકા ભજવી હતી. લગભગ ૪૮ કલાક સુધી ચાલેલા આ ઓપરેશનમાં કોઈ જાનહાનિ કે ઈજાના અહેવાલ નથી. આ કાર્યવાહી બાદ ઈરાને ભારતીય નૌકાદળ અને ભારતીય વાયુસેનાની હિંમત, વ્યાવસાયિક કુશળતા (પ્રોફેશનલિઝમ) અને ઉત્તમ સંકલન બદલ તેમનો આભાર માન્યો છે.
ઈરાને ભારત પ્રત્યે કૃતજ્ઞતા વ્યક્ત કરી: “સરહદો પાર જીવન બચાવ્યા”
નવી દિલ્હીમાં સ્થિત ઈરાની દૂતાવાસે સોશિયલ મીડિયા પ્લેટફોર્મ ‘X’ પર ભારત સરકાર, ભારતીય નૌકાદળ અને ભારતીય વાયુસેના પ્રત્યે આભાર વ્યક્ત કર્યો છે. દૂતાવાસે જણાવ્યું હતું કે, આ ઓપરેશન પાર પાડવામાં ભારતીય સશસ્ત્ર દળોએ જે વ્યાવસાયિક કુશળતા, હિંમત અને સંકલન દર્શાવ્યું છે તે પ્રશંસનીય છે. આ કાર્યવાહી માનવીય સહાય અને આપત્તિ રાહત પ્રત્યે ભારતની પ્રતિબદ્ધતાને દર્શાવે છે. દૂતાવાસે નોંધ્યું કે, આ ઓપરેશન ભારત અને ઈરાન વચ્ચેની મિત્રતા, એકતા અને સહકારની ભાવનાનું પ્રતીક છે. તેમણે બચાવ અભિયાનમાં સામેલ તમામ લોકોનો પણ આભાર માન્યો હતો.
સોમાલિયાના કિનારે ચાંચિયાઓ દ્વારા કબજો
અહેવાલો અનુસાર, ગયા મહિને સોમાલિયાના ઉત્તર-પૂર્વીય કિનારા નજીક સશસ્ત્ર ચાંચિયાઓએ ‘અજિની’ નામની માછીમારી હોડીનું અપહરણ કર્યું હતું. આ ઘટના બંદર બૈલા અને હાફુન દરિયાકાંઠાના વિસ્તારો વચ્ચે બની હતી. દરિયાઈ સુરક્ષા એજન્સીઓને આશંકા હતી કે ચાંચિયાઓ આ હોડીનો ઉપયોગ ‘મધર શિપ’ (એટલે કે કામચલાઉ આધાર કે મથક) તરીકે કરી શકે છે, જેથી તેઓ મોટા વ્યાપારી જહાજો પર હુમલા કરી શકે. આ ચિંતાને ધ્યાનમાં રાખીને, તે દરિયાઈ વિસ્તારમાં દેખરેખ વધારી દેવામાં આવી હતી. INS કોલકાતાએ મોરચો સંભાળ્યો; વાયુસેનાએ કમાન્ડો તૈનાત કર્યા
ભારતીય નૌકાદળે હોડીને મુક્ત કરાવવા માટે એક અભિયાન શરૂ કર્યું. આ અંતર્ગત, પહેલેથી જ મિશન પર તૈનાત યુદ્ધ જહાજ ‘INS કોલકાતા’ને કાર્યવાહી માટે મોકલવામાં આવ્યું. દરિયાઈ દેખરેખ રાખનારા વિમાનો અને અન્ય સાધનોની મદદથી આ હોડી પર સતત નજર રાખવામાં આવી રહી હતી. તેની હિલચાલ પર નજર રાખવામાં આવી હતી અને તેને આગળ વધતું અટકાવવા માટે પગલાં લેવામાં આવ્યાં હતાં. ત્યારબાદ, ભારતીય વાયુસેનાના C-17 વિમાન દ્વારા ભારતીય નૌકાદળના મરીન કમાન્ડોને તે જહાજ પર ચોકસાઈપૂર્વક ઉતારવામાં આવ્યા. કમાન્ડોએ એક અભિયાન હાથ ધરીને જહાજને પોતાના નિયંત્રણમાં લીધું અને ચાંચિયાઓ દ્વારા ઊભા કરાયેલા ખતરાને નિષ્ક્રિય કરી દીધો.