Vadodara Crime News: વડોદરાના માંજલપુર વિસ્તારમાં પોલીસે એક ફ્લેટમાં ચાલતા કથિત ઓનલાઈન અશ્લીલ વીડિયો કોલિંગ નેટવર્કનો પર્દાફાશ કર્યો છે. બહારથી સામાન્ય રહેણાંક ફ્લેટ દેખાતી જગ્યાએ યુવતીઓ દ્વારા ઓનલાઈન ગ્રાહકો સાથે વીડિયો કોલ કરવામાં આવતો હોવાનો પોલીસનો આરોપ છે. આ કેસમાં પોલીસે મનીષ પઢિયાર નામના યુવકની ધરપકડ કરી છે.
પોલીસને 11 ઓગસ્ટે માહિતી મળી હતી કે પ્રકૃતિ ફ્લેટ્સમાં કેટલીક યુવતીઓને રાખીને ઓનલાઈન અશ્લીલ પ્રવૃત્તિઓ કરાવવામાં આવી રહી છે. માહિતીના આધારે માંજલપુર પોલીસે ફ્લેટ પર દરોડો પાડ્યો હતો. તપાસ દરમિયાન પોલીસને કથિત રીતે ઓનલાઈન વીડિયો કોલિંગ માટે ઉપયોગમાં લેવાતું નેટવર્ક મળી આવ્યું હતું.
પોલીસના જણાવ્યા અનુસાર, સમગ્ર વ્યવહાર માટે ઓનલાઈન પ્લેટફોર્મનો ઉપયોગ કરવામાં આવતો હતો. ગ્રાહકો પહેલાં પોતાના ખાતામાં રકમ જમા કરાવીને સિક્કા મેળવતા અને ત્યારબાદ વીડિયો કોલ શરૂ થતો હતો. કોલ જેટલો લાંબો ચાલે, તેટલા વધુ સિક્કા ખર્ચાતા હોવાનો પોલીસનો દાવો છે. આ રીતે મળેલી રકમમાંથી કથિત રીતે આરોપી અને મહિલાઓ વચ્ચે હિસ્સો વહેંચવામાં આવતો હતો.
તપાસમાં પોલીસને જાણવા મળ્યું કે મનીષ પઢિયારે આશરે ₹11 લાખમાં આ ફ્લેટ ખરીદ્યો હતો અને અહીંથી સમગ્ર નેટવર્ક ચલાવવામાં આવતું હોવાનો આરોપ છે. પોલીસ હવે આરોપીના બેંક ખાતા, મોબાઈલ ફોન, ઓનલાઈન પ્લેટફોર્મ સાથે જોડાયેલા રેકોર્ડ અને નાણાકીય વ્યવહારોની તપાસ કરી રહી છે. નેટવર્કમાં કેટલી મહિલાઓ અને અન્ય લોકો સામેલ હતા તે અંગે પણ તપાસ ચાલી રહી છે.
પોલીસને તપાસ દરમિયાન ગાઝિયાબાદની એક યુવતી અંગે પણ માહિતી મળી છે, જે એર હોસ્ટેસ બનવાની તૈયારી કરી રહી હોવાનું જણાવાયું છે. તેની પૂછપરછ કરવામાં આવી રહી છે. એસીપી વિમલ ગામિતના જણાવ્યા અનુસાર, પોલીસ બ્લેકમેલિંગ અથવા છેતરપિંડી થઈ હતી કે નહીં તેની પણ તપાસ કરી રહી છે. હાલમાં બ્લેકમેલિંગનો કોઈ કેસ સામે આવ્યો નથી. સમગ્ર નેટવર્ક કેટલા સમયથી ચાલતું હતું અને તેમાં કેટલા લોકો તથા કેટલા રૂપિયાના વ્યવહારો સંકળાયેલા હતા તે તપાસ પૂર્ણ થયા બાદ સ્પષ્ટ થશે.