વિશ્વના સૌથી મોટા ગરબાના રેકોર્ડ બાદ Vadodaraમાં વિદેશી મહેમાનોનો જમાવડો, 61 દેશોના પ્રતિનિધિઓ આવશે
Vadodara Garba News: ગુજરાતના વડોદરામાં વિશ્વના સૌથી મોટા ગરબા માટે ગિનિસ વર્લ્ડ રેકોર્ડ નોંધાયા બાદ હવે આશરે 61 દેશોના પ્રતિનિધિઓ શહેરની મુલાકાત લેશે. 9 ઓક્ટોબરથી શરૂ થનારી આ મુલાકાત દરમિયાન વિદેશી મહેમાનો વડોદરાના ઐતિહાસિક વારસા સ્થળો, મહેલ અને બે મુખ્ય ગરબા કાર્યક્રમોમાં ભાગ લેશે. જોકે, આ પ્રવાસના કાર્યક્રમમાં વિશ્વની સૌથી ઊંચી પ્રતિમા સ્ટેચ્યુ ઓફ યુનિટીની મુલાકાતનો સમાવેશ કરવામાં આવ્યો નથી. વિદેશી પ્રતિનિધિઓ 12 ઓક્ટોબરની સવારે વડોદરાથી રવાના થશે.
ગુજરાત ટુરિઝમ સહિતની સંસ્થાઓનું આમંત્રણ
ગુજરાત ટુરિઝમ, વડોદરાનાં મહારાણી રાધિકારાજે ગાયકવાડ, વડોદરાના સાંસદ ડૉ. હેમાંગ જોશી, ઇનક્રેડિબલ ઇન્ડિયા અને બરોડા હેરિટેજ ટ્રસ્ટ દ્વારા વિદેશી પ્રતિનિધિઓને આમંત્રણ આપવામાં આવ્યું છે. આ પ્રવાસનું આયોજન સાંસદની કચેરી ‘સોપાન’ અને હેરિટેજ ટ્રસ્ટ દ્વારા સંયુક્ત રીતે કરવામાં આવ્યું છે.
સાંસદ ડૉ. હેમાંગ જોશીના જણાવ્યા અનુસાર આ સતત બીજા વર્ષે વિદેશી મહાનુભાવોને વડોદરાની મુલાકાત માટે આમંત્રિત કરવામાં આવ્યા છે. ગયા વર્ષે પણ બ્રિક્સ દેશોના સાંસદોને આમંત્રણ આપવામાં આવ્યું હતું. આ મુલાકાતનો હેતુ વિદેશી મહેમાનોને વડોદરાની સમૃદ્ધ સંસ્કૃતિ, ઐતિહાસિક વારસા અને ગરબાના ઇતિહાસથી પરિચિત કરાવવાનો છે.
સ્ટેચ્યુ ઓફ યુનિટીને પ્રવાસમાં સામેલ ન કરવા અંગે જોશીએ જણાવ્યું હતું કે મોટાભાગના રાજદ્વારીઓ અગાઉ સ્ટેચ્યુ ઓફ યુનિટીની મુલાકાત લઈ ચૂક્યા છે.
વિદેશી મહેમાનો ક્યાં-ક્યાં મુલાકાત લેશે?
વિદેશી પ્રતિનિધિઓના પ્રવાસમાં કલા, સ્થાપત્ય, ઇતિહાસ અને ગુજરાતની પરંપરાઓને આવરી લેતા અનેક કાર્યક્રમોનું આયોજન કરવામાં આવ્યું છે. તેમાં મુખ્યત્વે નીચેના સ્થળો અને કાર્યક્રમોનો સમાવેશ થાય છે.
- FGI ઓડિટોરિયમ ખાતે કલા વાર્તાલાપ
- Vadodara શહેર પ્રવાસ, ન્યાય મંદિર અને ફતેહસિંહ મ્યુઝિયમની મુલાકાત
- સુર સાગર તળાવના નજારા સાથે ગજરા કાફેમાં લંચ
- લક્ષ્મી વિલાસ પેલેસની મુલાકાત અને હાઇ ટી
- રાજા રવિ વર્માનાં ચિત્રોથી પ્રેરિત થિયેટર પ્રદર્શન
- મહારાણી રાધિકારાજે અને મહારાજા સમરજીતસિંહ ગાયકવાડ સાથે સંબંધિત કાર્યક્રમો
- ચંપાનેર યુનેસ્કો વર્લ્ડ હેરિટેજ સાઇટનો પ્રવાસ
- રૂબામીન, હાલોલ ખાતે ડિઝાઇન અને સ્થાપત્ય અંગે વાર્તાલાપ
- નાયબ મુખ્યમંત્રી હર્ષ સંઘવીની હાજરીમાં નવરાત્રિ રાત્રિભોજન
- લક્ષ્મી વિલાસ પેલેસ ખાતે ગરબા ઉજવણી
- નવલખી ગ્રાઉન્ડ ખાતે વડોદરા નવરાત્રી ઉત્સવમાં ભાગીદારી
અગાઉ વિદેશી રાજદ્વારીઓએ સ્ટેચ્યુ ઓફ યુનિટીની મુલાકાત લીધી હતી
ઓક્ટોબર 2022ની શરૂઆતમાં વિદેશ મંત્રી એસ. જયશંકર દિલ્હીમાં તૈનાત 50થી વધુ વિદેશી રાજદ્વારીઓને ગુજરાતની મુલાકાતે લાવ્યા હતા. તે પ્રવાસ દરમિયાન મહાનુભાવોએ કેવડિયા ખાતે આવેલી સ્ટેચ્યુ ઓફ યુનિટીની મુલાકાત લીધી હતી. નવરાત્રિ દરમિયાન તેમણે પરંપરાગત ગુજરાતી દાંડિયા અને ગરબાનો પણ આનંદ માણ્યો હતો.
તે મુલાકાતનો હેતુ વિદેશી રાજદ્વારીઓને ભારતના ઐતિહાસિક વારસા, આધુનિક એન્જિનિયરિંગ અને દેશના વિકાસની ઝલક બતાવવાનો હતો. આ વખતે વડોદરાના પ્રવાસમાં સ્ટેચ્યુ ઓફ યુનિટીને સામેલ કરવામાં આવ્યું નથી.
વડોદરાની સંસ્કૃતિ અને ગરબા પર રહેશે ભાર
Vadodaraમાં યોજાનારા આ કાર્યક્રમો દ્વારા વિદેશી પ્રતિનિધિઓને ગુજરાતની કલા, સ્થાપત્ય, ઐતિહાસિક વારસો અને નવરાત્રિની પરંપરાનો અનુભવ કરાવવાનો પ્રયાસ કરવામાં આવશે. શહેરના જાણીતા મહેલો, મ્યુઝિયમ અને ગરબા કાર્યક્રમો આ મુલાકાતનાં મુખ્ય આકર્ષણ રહેશે.
એક તરફ વડોદરામાં વિશ્વના સૌથી મોટા ગરબાની સિદ્ધિની ચર્ચા છે, તો બીજી તરફ વિદેશી મહેમાનોના પ્રવાસમાંથી સ્ટેચ્યુ ઓફ યુનિટીનો સમાવેશ ન થવો પણ ચર્ચાનો વિષય બન્યો છે.