PM Modi’s birthday: સુરતમાં સેવાઓ અને ભેટોનો સંગમ, 7600 ગણેશ પંડાલો-મંદિરોમાં મોદીના દીર્ઘાયુ માટે મહા આરતી, 2400થી વધુ વેપારીઓ દ્વારા ડિસ્કાઉન્ટ ઓફર

PM Modi’s birthday: વડાપ્રધાન નરેન્દ્ર મોદીના 76માં જન્મદિવસ નિમિત્તે સુરત (પશ્ચિમ) વિધાનસભામાં ભાજપ દ્વારા વિવિધ કાર્યક્રમોનું આયોજન કરવામાં આવ્યું છે. ગુજરાત વિધાનસભાના ડેપ્યુટી સ્પીકર અને સુરત (પશ્ચિમ)ના ધારાસભ્ય પૂર્ણેશ મોદીએ પત્રકાર પરિષદમાં આ અંગે માહિતી આપી હતી.

પૂર્ણેશ મોદીએ જણાવ્યું હતું કે 17 સપ્ટેમ્બરના રોજ વડાપ્રધાન મોદીના દીર્ઘાયુ માટે સુરતના 7600 થી વધુ ગણેશ પંડાલો અને મંદિરોમાં સામૂહિક મહા આરતીનું આયોજન કરવામાં આવશે. સાંજે 6 થી 10 વાગ્યા સુધી યોજાનારી આ મહા આરતીમાં લાખો લોકો ભાગ લેશે. મોદીના ફોટા સાથેની આરતી થાળી અને બેનરો અને અન્ય સામગ્રી ગણેશ મંડળો અને મંદિરોમાં પહોંચાડવામાં આવશે.

આ ઉપરાંત સુરતમાં 2400 થી વધુ વેપારીઓ અને સંસ્થાઓએ મોદીના જન્મદિવસની ઉજવણી નિમિત્તે વિવિધ ડિસ્કાઉન્ટની જાહેરાત કરી છે. હોસ્પિટલ, મેડિકલ સ્ટોર, હોટેલ-રેસ્ટોરન્ટ, શાકમાર્કેટ, બેકરી, મીઠાઈની દુકાન, કપડાની દુકાનો અને અન્ય વ્યવસાયોને 5 થી 76 ટકા સુધીનું ડિસ્કાઉન્ટ આપવામાં આવશે. પૂર્ણેશ મોદીએ કહ્યું કે ત્રણ લાખથી વધુ લોકો આ ઓફરનો લાભ લે તેવી શક્યતા છે.

શહેરની 50 થી વધુ હોસ્પિટલોમાં ઓપીડી, પેથોલોજી અને દવાઓ પર ડિસ્કાઉન્ટ ઉપરાંત 200 થી વધુ મેડિકલ સ્ટોર્સ 10 થી 20 ટકા ડિસ્કાઉન્ટ ઓફર કરી રહ્યા છે. પાલનપુર પાટિયા શાક માર્કેટના 120 જેટલા વિક્રેતાઓ, અડાજણના વિવિધ આર્કેડની 270 થી વધુ દુકાનો અને રિક્ષાચાલકો પણ આ અભિયાનમાં જોડાયા છે. નવીન ઇલેક્ટ્રોનિક્સે 17 થી 20 સપ્ટેમ્બર સુધી 5 થી 76 ટકા સુધીના ડિસ્કાઉન્ટની જાહેરાત કરી છે.