Suratના લિંબાયતમાં મિલકતના વિવાદમાં બેવડી હત્યા: મોટા દીકરાએ માતા અને નાના ભાઈને છરી મારી, ભાભી પણ ઘાયલ

Surat News: સુરતના લિંબાયત વિસ્તારમાં મિલકત અને દુકાનના ભાડાની વહેંચણીને લઈને થયેલા કૌટુંબિક વિવાદમાં બેવડી હત્યાની ઘટના સામે આવી છે. પ્રાથમિક માહિતી અનુસાર મોટા દીકરા શ્રીનિવાસે તેની માતા માલેશ્વરીબેન અને નાના ભાઈ રાજુ પર છરી વડે હુમલો કર્યો હતો. ગંભીર ઈજાઓને કારણે બંનેનાં મોત થયાં હતાં. દરમિયાનગીરી કરવા આવેલી નાના ભાઈની પત્ની મમતા પર પણ આરોપીએ છરીથી હુમલો કર્યો હતો, જેમાં તે ઘાયલ થઈ હતી.

ત્રણ દુકાનોના ભાડાને લઈને હતો વિવાદ

મળતી માહિતી મુજબ મૂળ તેલંગાણાનો તેલુગુ પરિવાર સુરતમાં રહે છે. માલેશ્વરીબેન સુદર્શન ગોદુરુને શ્રીનિવાસ, રમેશ અને રાજુ એમ ત્રણ પુત્રો છે. માલેશ્વરીબેન તેમના નાના પુત્ર રાજુ સાથે રહેતાં હતાં.

પરિવારના નામે ત્રણ દુકાનો હોવાનું અને તેમાંથી દર મહિને આશરે ₹60,000 ભાડું મળતું હોવાનું જણાવવામાં આવ્યું છે. માતા આ ભાડાની રકમ નાના પુત્ર રાજુને આપતાં હતાં. આ બાબતે મોટા પુત્ર શ્રીનિવાસને વાંધો હતો. તે ત્રણેય ભાઈઓ વચ્ચે મિલકત અને ભાડાની સમાન વહેંચણી કરવાની માગણી કરતો હતો.

માતાએ અગાઉ મિલકત અને ભાડાની વહેંચણી પોતે જીવિત હોય ત્યાં સુધી નહીં થાય એવું જણાવ્યું હોવાનું જાણવા મળ્યું છે. આ મુદ્દે પરિવારમાં અગાઉ પણ વિવાદ થતા હોવાનું કહેવાય છે.

ઝઘડો ઉગ્ર બનતાં માતા અને નાના ભાઈ પર હુમલો

મળેલી માહિતી અનુસાર રવિવારે શ્રીનિવાસ સહજાનંદ સોસાયટીમાં આવેલા ઘરે પરત ફર્યો હતો. આ દરમિયાન મિલકતની વહેંચણીને લઈને ફરીથી ઝઘડો થયો હતો. વિવાદ ઉગ્ર બનતાં તેણે કથિત રીતે છરી વડે નાના ભાઈ રાજુ અને માતા માલેશ્વરીબેન પર વારંવાર હુમલો કર્યો હતો. ગંભીર ઈજાઓને કારણે બંનેનાં મોત થયાં હતાં.

આ સમયે રાજુની પત્ની મમતાએ વચ્ચે પડીને દરમિયાનગીરી કરવાનો પ્રયાસ કર્યો હતો. આરોપીએ તેના પર પણ છરીથી હુમલો કર્યો હતો, જેના કારણે તેના હાથમાં ઈજા થઈ હતી. ઘાયલ મમતાએ પોલીસને ઘટનાની વિગતો આપી હોવાનું જણાવવામાં આવ્યું છે.

પોલીસ અને FSLની ટીમે તપાસ શરૂ કરી

બેવડી હત્યાની જાણ થતાં લિંબાયત પોલીસ અને ઉચ્ચ પોલીસ અધિકારીઓ ઘટનાસ્થળે પહોંચ્યા હતા. FSLની ટીમે પણ સ્થળ પરથી પુરાવા એકત્રિત કર્યા હતા. બંને મૃતદેહોને પોસ્ટમોર્ટમ માટે મોકલી આપવામાં આવ્યા છે.

DCP કાનન દેસાઈના જણાવ્યા અનુસાર પ્રાથમિક તપાસમાં પરિવારના સભ્યો વચ્ચે મિલકતની વહેંચણીને લઈને વિવાદ હોવાનું સામે આવ્યું છે. પોલીસે સમગ્ર મામલે તપાસ શરૂ કરી છે અને ઘટનાના તમામ પાસાઓની તપાસ કરવામાં આવી રહી છે.