Champions trophy 2025: ટીમ ઈન્ડિયા દુબઈ જવા રવાના, 20 ફેબ્રુઆરીએ બાંગ્લાદેશ સામે પ્રથમ મેચ

Champions trophy 2025 માટે ટીમ ઈન્ડિયા દુબઈ જવા રવાના થઈ ગઈ છે. ભારતીય ટીમ તેની તમામ મેચ દુબઈમાં રમશે. વિરાટ કોહલી, કેપ્ટન રોહિત શર્મા અને મુખ્ય કોચ ગૌતમ ગંભીર ઉપરાંત તમામ ખેલાડીઓ અને સપોર્ટ સ્ટાફ પણ મુંબઈ એરપોર્ટ પર જોવા મળ્યો હતો.

ઈંગ્લેન્ડને ઘરઆંગણે T-20 શ્રેણીમાં હરાવ્યા બાદ ભારતીય ક્રિકેટ ટીમે તેમને ODI શ્રેણીમાં પણ પરાજય આપ્યો હતો. હવે ટીમ ઈન્ડિયા તેના આગામી મિશન ‘ચેમ્પિયન્સ ટ્રોફી 2025’ માટે રવાના થઈ ગઈ છે. અમદાવાદમાં છેલ્લી વનડે રમીને ટીમ ઈન્ડિયા મુંબઈ પહોંચી હતી. આ પછી તમામ ખેલાડીઓ અને સપોર્ટ સ્ટાફ મુંબઈ એરપોર્ટ પર જોવા મળ્યો હતો. સાથે જ ટીમ ઈન્ડિયા ચેમ્પિયન્સ ટ્રોફી માટે દુબઈ ગઈ હતી.

ટીમ ઈન્ડિયા દુબઈ જવા રવાના થઈ

ન્યૂઝ એજન્સી ANIએ X પર એક વીડિયો પોસ્ટ કર્યો છે. ભારતીય ખેલાડીઓની સાથે મુખ્ય કોચ ગૌતમ ગંભીર અને બોલિંગ કોચ મોર્ને મોર્કેલ પણ તેમાં જોવા મળી રહ્યા છે. વિરાટ કોહલી, મોહમ્મદ શમી, શુભમન ગિલ, ઋષભ પંત, રવિન્દ્ર જાડેજા, કુલદીપ યાદવ, અક્ષર પટેલ, હર્ષિત રાણા, વોશિંગ્ટન સુંદર, શ્રેયસ અય્યર, કેએલ રાહુલ, વરુણ ચક્રવર્તી, અર્શદીપ સિંહ અને સહાયક કોચ રેયાન ટેન દેશચેટ એરપોર્ટ પર જોવા મળ્યા હતા.

ટીમ ઈન્ડિયાના નવા બેટિંગ કોચ સિતાંશુ કોટક પણ એરપોર્ટ પર ટીમ સાથે જોવા મળ્યા હતા, જ્યારે અન્ય એક વીડિયોમાં રોહિત શર્મા ફિલ્ડિંગ કોચ ટી દિલીપ સાથે જોવા મળ્યો હતો. આ દરમિયાન ટીમ ઈન્ડિયાનો સ્ટાર ઓલરાઉન્ડર હાર્દિક પંડ્યા પણ ટીમ સાથે હાજર રહ્યો હતો. ICC ચેમ્પિયન્સ ટ્રોફીમાં ભાગ લેવા માટે ભારતીય ક્રિકેટ ટીમની પ્રથમ બેચ દુબઈ જવા રવાના થઈ ગઈ છે.

બીસીસીઆઈના આ નિયમની અસર દેખાઈ રહી છે

જે વીડિયો સામે આવ્યો છે તેમાં BCCIના નિયમોની અસર જોઈ શકાય છે. બોર્ડર ગાવસ્કર ટ્રોફી બાદ BCCIએ સમીક્ષા બેઠક યોજીને ટીમ ઈન્ડિયા માટે ઘણા નિયમો બનાવ્યા હતા. એવો પણ નિયમ હતો કે ટીમના તમામ ખેલાડીઓ મેચ માટે સાથે પ્રવાસ કરશે. તમામ ખેલાડીઓ બીસીસીઆઈની કડકાઈનું પાલન કરતા જોવા મળ્યા છે.

ચેમ્પિયન્સ ટ્રોફી 2025માં ટીમ ઈન્ડિયાનું શેડ્યૂલ

ટીમ ઈન્ડિયા ચેમ્પિયન્સ ટ્રોફીના ગ્રુપ સ્ટેજમાં ત્રણ મેચ રમશે. ટીમ ઈન્ડિયાને ગ્રુપ Aમાં બાંગ્લાદેશ, પાકિસ્તાન અને ન્યુઝીલેન્ડની સાથે રાખવામાં આવી છે. ભારતની પ્રથમ મેચ 20 ફેબ્રુઆરીએ બાંગ્લાદેશ સામે, 23 ફેબ્રુઆરીએ પાકિસ્તાન અને ત્રીજી મેચ 2 માર્ચથી ન્યૂઝીલેન્ડ સામે થશે.