Rajkotમાં લગ્નની કંકોત્રીની APK ફાઇલથી ₹6.57 લાખની ઠગાઈ, સાયબર ક્રાઈમ પોલીસે 3 આરોપીઓની ધરપકડ કરી

Rajkot News: ગુજરાતના રાજકોટમાં સાયબર ઠગાઈનો ચોંકાવનારો કિસ્સો સામે આવ્યો છે. લગ્નની કંકોત્રીના નામે વોટ્સએપ પર મોકલવામાં આવેલી APK ફાઇલ ઇન્સ્ટોલ કરવી એક નિવૃત્ત કર્મચારીને ભારે પડી હતી. ફાઇલ ઇન્સ્ટોલ કર્યા બાદ તેમના બેંક ખાતામાંથી ₹6.57 લાખ ઉપાડી લેવામાં આવ્યા હતા. આ મામલે રાજકોટ ગ્રામ્ય સાયબર ક્રાઈમ પોલીસે તપાસ કરતાં કોલકાતાથી બેંગલુરુ સુધી ફેલાયેલા સાયબર ઠગાઈ નેટવર્કની કડીઓ મળી આવી હતી. પોલીસે આ કેસમાં ત્રણ આરોપીઓની ધરપકડ કરી છે.

લગ્નની કંકોત્રીના નામે મોકલી APK ફાઇલ

પોલીસના જણાવ્યા અનુસાર ભોગ બનનાર જયંતિલાલ ભૈંસદાડિયા ધોરાજી તાલુકાના સુપેડી ગામના રહેવાસી છે. તેમને નજીકના સંબંધીના નામે વોટ્સએપ પર ‘લગ્ન કંકોત્રી’ નામની ફાઇલ મોકલવામાં આવી હતી. પરિચિત વ્યક્તિ તરફથી સંદેશ આવ્યો હોવાનું માની તેમણે ફાઇલ ઇન્સ્ટોલ કરી હતી.

આરોપ છે કે ફાઇલ ઇન્સ્ટોલ કર્યા બાદ સાયબર ગુનેગારોએ તેમના મોબાઈલનો દુરુપયોગ કરીને બેંક ખાતામાંથી ₹6.57 લાખની રકમ ઉપાડી લીધી હતી. ત્યારબાદ ભોગ બનનારે સાયબર હેલ્પલાઇન નંબર 1930 પર ફરિયાદ નોંધાવી હતી. ફરિયાદના આધારે પોલીસે બેંક વ્યવહારો અને અન્ય ટેકનિકલ પુરાવાઓની તપાસ શરૂ કરી હતી.

લગ્ન કાર્ડથી લઈને વીજળીના બિલ સુધીના નામે છેતરપિંડી

પોલીસની તપાસમાં જાણવા મળ્યું હતું કે આરોપીઓ કથિત રીતે અલગ-અલગ નામે APK ફાઇલો બનાવીને લોકોને મોકલતા હતા. આ ફાઇલો ક્યારેક લગ્નનાં આમંત્રણો કે લગ્નના વીડિયો, તો ક્યારેક કુરિયર ડિલિવરી, વીજળીનું બિલ, ઈ-ચલણ અને બેંકિંગ સેવાઓના નામે મોકલવામાં આવતી હતી.

કેટલાક કિસ્સાઓમાં આકર્ષક ઓફર અથવા અન્ય સંદેશાઓનો ઉપયોગ કરીને લોકોને ફાઇલ ઇન્સ્ટોલ કરવા પ્રેરિત કરવામાં આવતા હોવાની વિગતો પણ તપાસમાં સામે આવી હતી. આવી ફાઇલો ઇન્સ્ટોલ થયા બાદ મોબાઈલમાં રહેલી સંવેદનશીલ માહિતી અને બેંકિંગ વ્યવહારોને નિશાન બનાવવામાં આવતા હોવાની પોલીસને આશંકા છે.

છેતરપિંડીના પૈસાથી સોનાના સિક્કા અને દાગીના ખરીદ્યાનો આરોપ

તપાસ દરમિયાન પોલીસને જાણવા મળ્યું હતું કે ઠગાઈથી મેળવેલા નાણાંને છુપાવવા માટે વિવિધ બેંક ખાતાઓનો ઉપયોગ કરવામાં આવતો હતો. ત્યારબાદ આ નાણાં ઝવેરીઓના ખાતામાં ટ્રાન્સફર કરીને સોનાના સિક્કા અને દાગીના ખરીદવામાં આવતા હોવાનો આરોપ છે. સોનું અન્ય સ્થળે વેચીને રોકડ મેળવવાની પદ્ધતિ દ્વારા નાણાંના મૂળ સ્ત્રોતને છુપાવવાનો પ્રયાસ કરવામાં આવતો હોવાની વિગતો તપાસમાં બહાર આવી હતી.

બેંક સ્ટેટમેન્ટ, CCTV ફૂટેજ અને કોલ ડિટેલ રેકોર્ડ સહિતના પુરાવાઓની મદદથી પોલીસે આરોપીઓ વચ્ચેની કડીઓ શોધી કાઢી હતી. આ તપાસના આધારે અનેક રાજ્યો સુધી ફેલાયેલા નેટવર્કની માહિતી મળી હતી.

ત્રણ આરોપીઓની ધરપકડ, ₹18.16 લાખથી વધુનો મુદ્દામાલ જપ્ત

રાજકોટ ગ્રામ્ય સાયબર ક્રાઈમ પોલીસે મોહમ્મદ દાનિશ ઉર્ફે ડેનિયલ, મોહમ્મદ તૌસિફ રઝા અને ઝોયા ખાનની ધરપકડ કરી છે. પ્રાથમિક તપાસમાં દાનિશ પર APK ડેવલપરનો સંપર્ક કરવા અને ઠગાઈના નાણાંને સોનાની ખરીદી દ્વારા રોકડમાં ફેરવવાની વ્યવસ્થા કરવામાં ભૂમિકા ભજવવાનો આરોપ છે.

તૌસિફની ભૂમિકા સોનાની ખરીદી અને નાણાંના વ્યવહારો સાથે જોડાયેલી હોવાની શંકા છે, જ્યારે ઝોયા પર QR કોડ મોકલવા તથા સોનાની ખરીદી અને વેચાણમાં સંડોવણીનો આરોપ છે. આ તમામ ભૂમિકાઓ અંગે તપાસ આગળ વધી રહી છે.

પોલીસે આરોપીઓ પાસેથી 11 મોબાઈલ ફોન, 13 સોનાના સિક્કા, સોનાની ચેઇન અને અન્ય વસ્તુઓ, રોકડ, બેંક કાર્ડ તથા સિમ કાર્ડ સહિતનો મુદ્દામાલ જપ્ત કર્યો છે. જપ્ત કરાયેલા મુદ્દામાલની કુલ કિંમત ₹18.16 લાખથી વધુ હોવાનો અંદાજ છે.

19 પ્રકારની APK ફાઇલોની વિગતો સામે આવી

પોલીસના જણાવ્યા અનુસાર, તપાસમાં અલગ-અલગ નામ હેઠળ બનાવવામાં આવેલી 19 APK ફાઇલોની વિગતો મળી છે. આ ફાઇલોમાં લગ્નનું આમંત્રણ, લગ્નનો વીડિયો, લગ્નનું કાર્ડ અને બેંકિંગ સેવાઓ જેવા નામોનો સમાવેશ થતો હતો.

આરોપીઓ લોકોનો વિશ્વાસ જીતવા માટે સોશિયલ મીડિયા પર આકર્ષક પ્રોફાઇલનો ઉપયોગ કરતા હોવાની પણ વિગતો સામે આવી છે. કેટલીક પ્રોફાઇલમાં યુવતીઓના ફોટાનો ઉપયોગ કરવામાં આવતો હતો અને ફાઇલ ઇન્સ્ટોલ કરવામાં ખચકાટ અનુભવતા લોકોને મનાવવા માટે ઓડિયો સંદેશાઓ મોકલવામાં આવતા હોવાનો પોલીસનો દાવો છે.

પોલીસે જણાવ્યું હતું કે આ નેટવર્ક સાથે સંબંધિત સાત કેસની કડીઓ મળી આવી છે. આ ઉપરાંત, NCRP-1930 પોર્ટલ પર નોંધાયેલી 24 ફરિયાદોમાં કુલ ₹21.28 લાખથી વધુની છેતરપિંડી સામે આવી હોવાનું તપાસમાં જણાવાયું છે.

APK ફાઇલ ઇન્સ્ટોલ કરતાં પહેલાં સાવધાન રહેવા પોલીસની અપીલ

રાજકોટ ગ્રામ્ય સાયબર ક્રાઈમ પોલીસે લોકોને વોટ્સએપ અથવા SMS દ્વારા મળતી અજાણી APK ફાઇલો ઇન્સ્ટોલ ન કરવા અપીલ કરી છે. ફાઇલ કોઈ પરિચિત વ્યક્તિના નામે આવી હોય તો પણ તેને ઇન્સ્ટોલ કરતાં પહેલાં ફોન કરીને ખાતરી કરવી જરૂરી છે.

લગ્નની કંકોત્રી, વીજળીનું બિલ, કુરિયર, બેંક KYC અથવા ઈ-ચલણના નામે મોકલવામાં આવેલી ફાઇલની વિશ્વસનીયતા તપાસ્યા વિના તેને ખોલવી જોખમી બની શકે છે. અજાણી એપ્લિકેશનને SMS, કોન્ટેક્ટ્સ અથવા અન્ય સંવેદનશીલ માહિતીની પરવાનગી આપવાનું ટાળવું જોઈએ. OTP, UPI PIN અને બેંકિંગ પાસવર્ડ કોઈની સાથે શેર ન કરવા પણ પોલીસે સલાહ આપી છે.

જો બેંક ખાતામાં શંકાસ્પદ વ્યવહાર થાય તો તાત્કાલિક 1930 પર ફરિયાદ નોંધાવી બેંકને જાણ કરવી જોઈએ. આ કેસમાં પોલીસ વધુ તપાસ કરી રહી છે અને ઠગાઈના નાણાં તથા અન્ય સંભવિત આરોપીઓ અંગેની કડીઓ શોધવામાં આવી રહી છે.