Stones pelted on Vande Bharat Express in Amreli: ગુજરાતમાં વંદે ભારત એક્સપ્રેસ ટ્રેન પર પથ્થરમારાની ઘટના સામે આવી છે. અમરેલી જિલ્લાના લાઠી અને ખીજડિયા વચ્ચે સાબરમતીથી વેરાવળ જતી વંદે ભારત એક્સપ્રેસને અજાણ્યા શખસોએ નિશાન બનાવી હતી. પથ્થરમારાને કારણે ટ્રેનના એક કોચનો કાચ તૂટી ગયો હતો. જોકે, સદનસીબે આ ઘટનામાં કોઈ મુસાફરને ઈજા થઈ નથી.

લાઠી અને ખીજડિયા વચ્ચે ટ્રેન પર પથ્થરમારો

મળતી માહિતી મુજબ સાબરમતીથી વેરાવળ તરફ જઈ રહેલી વંદે ભારત એક્સપ્રેસ લાઠી અને ખીજડિયા વચ્ચેના રેલવે ટ્રેક પરથી પસાર થઈ રહી હતી. આ દરમિયાન અજાણ્યા શખસોએ ટ્રેન પર પથ્થરમારો કર્યો હતો. અચાનક થયેલા હુમલામાં એક કોચનો કાચ તૂટી ગયો હતો અને ટ્રેનને નુકસાન પહોંચ્યું હતું.

RPF અને પોલીસની ટીમે તપાસ શરૂ કરી

ઘટનાની જાણ થતાં જ રેલવે પ્રોટેક્શન ફોર્સ (RPF) અને પોલીસની ટીમો ઘટનાસ્થળે પહોંચી હતી. પ્રાથમિક માહિતી મુજબ, ટ્રેનમાં મુસાફરી કરી રહેલા મુસાફરોએ પથ્થરમારો કરનાર શખસોને જોયા નહોતા. હાલ લાઠી અને ખીજડિયા વચ્ચેના વિસ્તારમાં તપાસ હાથ ધરવામાં આવી છે.

ભાવનગર રેલવે ડિવિઝને ઘટનાની પુષ્ટિ કરી

આ મામલે ભાવનગર રેલવે ડિવિઝનના સિનિયર ડીસીએમ અતુલ ત્રિપાઠીએ જણાવ્યું હતું કે વંદે ભારત એક્સપ્રેસ પર પથ્થરમારાની ઘટના નોંધાઈ છે. સંબંધિત અધિકારીઓ દ્વારા સમગ્ર મામલે તપાસ કરવામાં આવી રહી છે.

પથ્થરમારો કરનારાઓની ઓળખ કરવા તપાસ તેજ

વંદે ભારત એક્સપ્રેસ જેવી આધુનિક ટ્રેન પર થયેલા પથ્થરમારાને પગલે રેલવે સુરક્ષા અંગે સવાલો ઊભા થયા છે. અજાણ્યા શખસોએ કયા કારણોસર ટ્રેનને નિશાન બનાવી અને તેમની પાછળનો ઈરાદો શું હતો તે જાણવા તપાસ ચાલી રહી છે. RPF અને પોલીસ સંડોવાયેલા લોકોની ઓળખ કરીને તેમની સામે કાયદેસરની કાર્યવાહી કરવાની દિશામાં તપાસ કરી રહી છે.