Gujarat News: ગુજરાતમાં સતત વરસી રહેલા ભારે વરસાદે અનેક જિલ્લાઓમાં જનજીવન અસ્તવ્યસ્ત કરી દીધું છે. અમદાવાદ જિલ્લાના ધોલેરા તાલુકામાં આવેલું વનિતાલાવ ગામ ભોગાવો નદીના વધતા જળસ્તરને કારણે ચારેય બાજુથી પાણીમાં ઘેરાઈ ગયું છે. ગામ તરફ જતાં તમામ મુખ્ય માર્ગો બંધ થઈ જતા ગામનો બહારની દુનિયા સાથેનો સંપર્ક સંપૂર્ણપણે તૂટી ગયો છે અને સમગ્ર ગામ ટાપુ જેવું દેખાઈ રહ્યું છે.
પરિસ્થિતિની ગંભીરતાને ધ્યાનમાં રાખીને જિલ્લા વહીવટીતંત્ર, અમદાવાદ ગ્રામીણ પોલીસ અને રાષ્ટ્રીય આપત્તિ પ્રતિભાવ દળ (NDRF) દ્વારા સંયુક્ત રીતે રાહત અને બચાવ કામગીરી હાથ ધરવામાં આવી છે. ગામમાં ફસાયેલા લોકોને સલામત સ્થળોએ ખસેડવા માટે સતત પ્રયાસો ચાલી રહ્યા છે.
અમદાવાદ ગ્રામીણ પોલીસ અધિક્ષક ઓમ પ્રકાશ જાટે જણાવ્યું કે ભોગાવો નદીમાં પાણીનું સ્તર સતત વધી રહ્યું હોવાથી બચાવ કામગીરી પર સતત નજર રાખવામાં આવી રહી છે. કોઈપણ કટોકટીની સ્થિતિમાં તાત્કાલિક મદદ પહોંચાડવા માટે ટીમોને સતર્ક રાખવામાં આવી છે.
આનંદપુર–બુરાનપુર માર્ગ પણ બંધ
ભોગાવો નદીમાં પાણી વધતા આનંદપુર અને બુરાનપુર ગામ તરફ જતો માર્ગ પણ સાવચેતીના ભાગરૂપે બંધ કરી દેવામાં આવ્યો છે. પોલીસે તમામ બંધ રસ્તાઓ પર કડક દેખરેખ અને સતત પેટ્રોલિંગ શરૂ કર્યું છે. લોકોને પૂરગ્રસ્ત વિસ્તારોમાં ન જવા, બંધ રસ્તાઓનો ઉપયોગ ન કરવા અને માત્ર સરકારી સૂચનાઓ પર જ વિશ્વાસ રાખવાની અપીલ કરવામાં આવી છે.
રાજ્યના ડેમોમાં પાણીનો જથ્થો વધ્યો
સતત વરસાદના કારણે ગુજરાતના ડેમોમાં પાણીનો સંગ્રહ ઝડપથી વધી રહ્યો છે. રાજ્યના 206 મુખ્ય ડેમોમાં હાલ કુલ સંગ્રહ ક્ષમતાના 45.17 ટકા જેટલું પાણી ભરાઈ ગયું છે. સરદાર સરોવર (નર્મદા) ડેમમાં પાણીનો સંગ્રહ 69.25 ટકા સુધી પહોંચી ગયો છે. રવિવાર સાંજ સુધીમાં ડેમમાં 2.31 લાખ મિલિયન ક્યુબિક મીટર પાણીનો જથ્થો નોંધાયો હતો.
14 મોટા ડેમ સંપૂર્ણ ભરાયા
રાજ્યમાં અત્યાર સુધીમાં 14 મોટા ડેમ 100 ટકા ભરાઈ ગયા છે. તેમાં અમરેલીના ધાતરવાડી અને સુરજવાડી, ભરૂચનો ધોળી, ભાવનગરના રોજકી અને શેત્રુંજી, કચ્છનો ફતેહગઢ, મહિસાગરનો વણકબોરી, મોરબીનો મચ્છુ-2, નવસારીના જુઝા અને કેલિયા, સુરતનો લખીગામ તેમજ સુરેન્દ્રનગરના વાંસલ અને ડોસવાડા ડેમનો સમાવેશ થાય છે.
વરસાદની સ્થિતિને ધ્યાનમાં રાખીને રાજ્યના વિવિધ વિસ્તારોમાં વહીવટીતંત્ર એલર્ટ પર છે અને નાગરિકોને સાવચેત રહેવાની તેમજ પૂરગ્રસ્ત વિસ્તારોમાં અવરજવર ટાળવાની અપીલ કરવામાં આવી છે.