Major action by Anand Police: આણંદ જિલ્લા પોલીસની પેરોલ-ફર્લો સ્ક્વોડે વેપારીઓ સાથે કરોડો રૂપિયાની છેતરપિંડીના કેસમાં ફરાર આંતરરાજ્ય આરોપી રેકીન રાવલની રાજકોટમાંથી ધરપકડ કરી છે. પોલીસના જણાવ્યા અનુસાર, આરોપી સામે ગુજરાત સહિત અન્ય રાજ્યોમાં 33થી વધુ છેતરપિંડીના કેસ નોંધાયેલા છે અને વિવિધ અદાલતો દ્વારા તેના વિરુદ્ધ 20થી વધુ વોરંટ પણ જારી કરવામાં આવ્યા હતા.
પોલીસને માહિતી મળી હતી કે વર્ષ 2026માં આણંદ ગ્રામ્ય પોલીસ સ્ટેશનમાં નોંધાયેલા છેતરપિંડીના કેસમાં ફરાર રેકીન રાવલ રાજકોટના ઘનશ્યામ નગર વિસ્તારમાં કાલાવડ રોડ પર આવેલા શ્રવણ એપાર્ટમેન્ટમાં રહે છે. આ માહિતીના આધારે PSI જે.બી. વાઘેલા અને ASI પ્રવિણસિંહ કંભુ સહિતની ટીમ સાદા કપડામાં ખાનગી વાહન મારફતે રાજકોટ પહોંચી હતી. પોલીસે આરોપીને તેના ઘરેથી ઝડપી આણંદ લાવી આગળની કાર્યવાહી હાથ ધરી હતી.
પૂછપરછ દરમિયાન પોલીસને જાણવા મળ્યું કે આરોપીએ તારાપુરના એક વેપારી પાસેથી 50 કિલોગ્રામ ચણાની 219 બોરી ખરીદી હતી અને પૈસા ચૂકવવાનું વચન આપ્યું હતું. જોકે, તેણે આશરે ₹8.15 લાખની ચુકવણી કરી ન હતી. વેપારીએ તારાપુર પોલીસ સ્ટેશનમાં ફરિયાદ નોંધાવ્યા બાદ આરોપી ધરપકડથી બચવા માટે ફરાર થઈ ગયો હતો.
પોલીસના જણાવ્યા મુજબ, આરોપીએ ગુજરાત તેમજ અન્ય રાજ્યોમાં નકલી કંપનીઓ ઉભી કરી વેપારીઓ પાસેથી માલ ખરીદ્યો અને ત્યારબાદ તેની ચુકવણી કરી નહોતી. તપાસમાં પશ્ચિમ બંગાળના સિલિગુડીમાંથી આશરે ₹20 લાખનું સરસવનું તેલ, કર્ણાટકના મેંગલુરુમાંથી ₹25 લાખની સોપારી, મુંબઈમાંથી ₹10 લાખનું સરસવનું તેલ અને અમદાવાદમાંથી ₹14 લાખનો માલ ખરીદ્યો હોવાની વિગતો સામે આવી છે. આ ઉપરાંત કાપડ અને ચણાના વેપારીઓ સાથે પણ છેતરપિંડી કર્યાનું પોલીસ તપાસમાં સામે આવ્યું છે.
આરોપી પાસેથી પોલીસે ₹3 લાખ રોકડા પણ કબજે કર્યા છે. પોલીસના જણાવ્યા પ્રમાણે, અત્યાર સુધીમાં આરોપી દ્વારા ₹1.56 કરોડથી વધુની છેતરપિંડી કરવામાં આવી હોવાનું સામે આવ્યું છે. ગુજરાતના વિવિધ પોલીસ સ્ટેશનો અને અદાલતોમાં આરોપી સામે આશરે 27 કેસ નોંધાયેલા છે. અમદાવાદના કાગડાપીઠ પોલીસ સ્ટેશનમાં તેની સામે PASA એક્ટ હેઠળ પણ કાર્યવાહી થઈ ચૂકી હોવાનું પોલીસે જણાવ્યું છે.