Kutch Crime: માંડવીના બજારમાં યુવતીની જાહેરમાં છરીના ઘા મારી હત્યા, દિવાળીની ખરીદી વચ્ચે ફેલાયો ભય
Kutch Crime News: ગુજરાતના કચ્છ જિલ્લાના માંડવીમાં દિવાળીની ખરીદીની ભારે ભીડ વચ્ચે એક યુવતીની જાહેરમાં છરીના ઘા મારીને હત્યા કરવામાં આવતાં ચકચાર મચી ગઈ છે. શહેરના મુખ્ય બજારમાં બનેલી આ ઘટનાથી વેપારીઓ અને સ્થાનિક લોકોમાં ભયનો માહોલ ફેલાયો છે.
મળતી પ્રાથમિક માહિતી મુજબ દિવાળીના તહેવારને કારણે માંડવીના મુખ્ય બજારમાં મોટી સંખ્યામાં લોકો ખરીદી માટે ઉમટી પડ્યા હતા. આ દરમિયાન એક યુવતી પર અચાનક છરી વડે હુમલો કરવામાં આવ્યો હતો. હુમલામાં ગંભીર ઈજાઓ થતાં યુવતીનું મોત નીપજ્યું હતું.
મૃતક યુવતીની ઓળખ સલાયાના ખારવા સમુદાયની યુવતી તરીકે થઈ છે. પોલીસની પ્રાથમિક તપાસમાં યુવતીના વૈવાહિક જીવનને લગતી કેટલીક વિગતો સામે આવી છે. જાણવા મળ્યા મુજબ, યુવતીએ અગાઉ પ્રેમ લગ્ન કર્યા હતા, પરંતુ સંબંધોમાં ખટાશ આવતાં પતિ સાથે છૂટાછેડા લીધા હતા. ત્યારબાદ બંને અલગ રહેતાં હતાં.
ઘટનાની જાણ થતાં માંડવી પોલીસનો કાફલો ઘટનાસ્થળે અને હોસ્પિટલમાં પહોંચ્યો હતો. પોલીસે મૃતદેહને કબજામાં લઈને આગળની કાયદેસરની કાર્યવાહી શરૂ કરી છે. હત્યા પાછળનું કારણ શું હતું અને તેમાં કોણ સંડોવાયેલું છે તે દિશામાં તપાસ હાથ ધરવામાં આવી છે.
દિવાળીની ખરીદીની ભીડ વચ્ચે શહેરના સૌથી વ્યસ્ત બજારમાં ધોળા દિવસે બનેલી આ હત્યાની ઘટનાએ જાહેર સુરક્ષા અને પોલીસ વ્યવસ્થા અંગે પણ સવાલો ઊભા કર્યા છે. જોકે, હત્યાનું ચોક્કસ કારણ અને આરોપી અંગેની વિગતો પોલીસ તપાસ પૂર્ણ થયા બાદ જ સ્પષ્ટ થશે.