જાણો કોણ છે Gujaratનો હર્ષ કુમાર રમણલાલ પટેલ ઉર્ફે ડર્ટી હેરી, કેમ ફટકારવામાં આવી અમેરિકામાં 10 વર્ષની જેલની સજા?

Gujarat News: ડર્ટી હેરી તરીકે જાણીતા હર્ષકુમાર રમણલાલ પટેલને યુએસ કોર્ટે 10 વર્ષની જેલની સજા ફટકારી છે. તેમને માનવ તસ્કરીના કેસમાં આ સજા મળી છે. 19 જાન્યુઆરી, 2022 ના રોજ, કેનેડાથી યુએસમાં પ્રવેશવાનો પ્રયાસ કરતી વખતે ગુજરાતના એક પરિવારના ચાર સભ્યોનું મૃત્યુ થયું હતું. આ ઘટનામાં પટેલની ભૂમિકા પ્રકાશમાં આવી હતી. 20 ફેબ્રુઆરી, 2024 ના રોજ શિકાગો એરપોર્ટ પર પટેલની ધરપકડ કરવામાં આવી હતી. તેમને નવેમ્બર 2024 માં દોષિત ઠેરવવામાં આવ્યા હતા.

ભારતીય પોલીસ સૂત્રો કહે છે કે પટેલે ઓછામાં ઓછા 35 ભારતીયોને ગેરકાયદેસર રીતે મુસાફરી કરાવ્યા હતા. આમાંથી મોટાભાગના લોકો ગુજરાતના મહેસાણા જિલ્લાના હતા. સૂત્રોના જણાવ્યા અનુસાર, હર્ષકુમાર પટેલ કેનેડામાં અભ્યાસ કર્યો હતો. તે 2018 થી ન્યૂયોર્ક અને શિકાગોમાં રહેતો હતો. તે ગેરકાયદેસર રીતે અમેરિકામાં ફરી પ્રવેશ્યો હતો. અગાઉ, હેરીએ ઘણી વખત યુએસ વિઝા માટે અરજી કરી હતી, પરંતુ દરેક વખતે તેની અરજી નકારી કાઢવામાં આવી હતી.

ડર્ટી હેરી કોણ છે

‘ડર્ટી હેરી’ તરીકે જાણીતા હર્ષકુમાર રમણલાલ પટેલ, માનવ તસ્કરીનો ધંધો ચલાવતા હતા. તેમણે મે ૨૦૨૧ માં ગાંધીનગરના કલોલ તાલુકાના ઇન્દ્રાદ ગામથી આ કામ શરૂ કર્યું હતું. આ ગામ ડીંગુચાથી 17 કિમી દૂર છે. ડીંગુચા એ જ ગામ છે જ્યાં ૧૯ જાન્યુઆરી ૨૦૨૨ ના રોજ કેનેડા-યુએસ સરહદ પાર કરતી વખતે પટેલ પરિવારના ચાર સભ્યો મૃત્યુ પામ્યા હતા.

2014માં માનવ તસ્કરીનો અભ્યાસ શરૂ કર્યો

સૂત્રો પાસેથી જાણવા મળ્યું છે કે ‘ડર્ટી હેરી’ 2014માં દાણચોરીના માર્ગો અને પદ્ધતિઓ વિશે વાંચવાનું શરૂ કર્યું. ધીમે ધીમે, કોવિડ રોગચાળા દરમિયાન, તે આ કામમાં સક્રિય થઈ ગયો. ૨૦૨૧ સુધીમાં, તેમણે સુરતના ફેનિલ પટેલ અને કલોલના ભાવેશ પટેલ જેવા અન્ય આરોપીઓ સાથે સંબંધ બાંધ્યા. એવું કહેવાય છે કે ત્રણેય પંજાબના માનવ તસ્કરી કરનાર માટે કામ કરતા હતા.

જગદીશ પટેલ પરિવારને શિકાગો લઈ ગયો હતો

હેરીનું પહેલું મોટું માનવ તસ્કરીનું કામ જગદીશ પટેલ સાથે સંબંધિત હતું. જગદીશ પટેલના પરિવારે તેમને યુએસમાં પ્રવેશવા માટે મદદ માંગી હતી. શિકાગોથી કામ કરતા પટેલ વિઝિટર વિઝા પર અમેરિકામાં પ્રવેશ્યા અને એક અમેરિકન નાગરિક સાથે સગાઈ કરી. તે તેના સાસરિયાઓ સાથે રહેતો હતો અને નાગરિકતા મેળવવાનો પ્રયાસ કરી રહ્યો હતો. તેણે સ્ટીવ શેન્ડ નામનો ડ્રાઇવર રાખ્યો હતો. સ્ટીવ શેન્ડ ફ્લોરિડાના ડેલ્ટોનાનો હતો. તેનું કામ મિનેસોટા સરહદ પરથી સ્થળાંતર કરનારાઓને ઉપાડવાનું અને તેમને શિકાગો વિસ્તારમાં પહોંચાડવાનું હતું.

દસ્તાવેજો વિના અમેરિકા પહોંચ્યો

૨૦૧૪માં, ડર્ટી હેરીનો વિદ્યાર્થી વિઝા બે વાર રદ કરવામાં આવ્યો હતો. ૨૦૧૬માં, તેણે ઓન્ટારિયોના કિંગ્સ્ટનમાં સેન્ટ લોરેન્સ કોલેજમાંથી પ્રવાસી વિઝા માટે અરજી કરી હતી, પરંતુ તે પણ રદ કરવામાં આવી હતી. વિઝા રદ થયાના ત્રણ મહિના પછી, તે કાગળો વિના યુએસમાં પ્રવેશ્યો. પરંતુ જ્યારે કડકાઈ વધી ગઈ ત્યારે તે પાછો ફર્યો.