Gujaratની મહિલાને સાયબર છેતરપિંડીમાં ગુમાવેલા ₹35 લાખ પરત મળ્યા, હર્ષ સંઘવીના હસ્તક્ષેપ બાદ 72 કલાકમાં કાર્યવાહી

Gujarat News: ગુજરાતના કચ્છ જિલ્લામાં સાયબર છેતરપિંડીનો ભોગ બનેલી એક મહિલાને માત્ર ત્રણ દિવસમાં તેના ગુમાવેલા ₹35 લાખથી વધુની રકમ પરત મળી છે. મહિલાએ આ માટે ગુજરાતના નાયબ મુખ્યમંત્રી અને ગૃહ વિભાગનો હવાલો સંભાળતા હર્ષ સંઘવી તેમજ પશ્ચિમ કચ્છ પોલીસનો આભાર માનતો વીડિયો જાહેર કર્યો છે. મહિલાના જણાવ્યા મુજબ, નાયબ મુખ્યમંત્રી સમક્ષ રજૂઆત કર્યા બાદ પોલીસને તાત્કાલિક કાર્યવાહી કરવાની સૂચના આપવામાં આવી હતી.

નાણાં બમણા કરવાના વચનથી મહિલાને ફસાવવામાં આવી

મળતી માહિતી મુજબ, કચ્છની રહેવાસી આશાબેન સિદ્ધપુરા આશરે ત્રણ વર્ષ પહેલાં કે.ડી. એન્ટરપ્રાઇઝ નામની કંપની સાથે એજન્ટ તરીકે જોડાયા હતા. કંપની દ્વારા વધુ નાણાકીય લાભ અને રોકાણની રકમ બમણી કરવાની લાલચ આપવામાં આવી હતી. આ વિશ્વાસમાં આવીને આશાબેને પોતે રોકાણ કર્યું હતું અને અન્ય લોકોને પણ કંપની સાથે જોડ્યા હતા.

જોકે, રોકાણની મુદત પૂર્ણ થયા બાદ જ્યારે પૈસા પરત મેળવવાનો સમય આવ્યો ત્યારે કંપનીના ડિરેક્ટરો દ્વારા અલગ-અલગ બહાના કરવામાં આવ્યા હતા. અંતે પૈસા પરત આપવાનો ઇનકાર કરવામાં આવ્યો હોવાનો મહિલાનો આક્ષેપ છે. આ ઘટનામાં આશાબેન સહિત અન્ય લોકોની પણ મોટી રકમ ફસાઈ ગઈ હતી.

ન્યાય માટે ગાંધીનગર પહોંચ્યા

પૈસા પરત મેળવવા માટે આશાબેન વ્યક્તિગત રીતે ગાંધીનગર પહોંચ્યા હતા અને નાયબ મુખ્યમંત્રી હર્ષ સંઘવી સમક્ષ પોતાની રજૂઆત કરી હતી. તેમણે પોતાની સાથે થયેલી છેતરપિંડી અને નાણાકીય નુકસાન અંગે અરજી આપી હતી.

મહિલાની રજૂઆતને ગંભીરતાથી લેતા હર્ષ સંઘવીએ પશ્ચિમ કચ્છ પોલીસ અધિક્ષકને તાત્કાલિક કાર્યવાહી કરીને અરજદારને ન્યાય અપાવવા અને શક્ય હોય તો તેની રકમ પરત મેળવવા માટે જરૂરી પગલાં લેવા સૂચના આપી હતી.

પશ્ચિમ કચ્છ પોલીસે શરૂ કરી તાત્કાલિક તપાસ

નાયબ મુખ્યમંત્રીની સૂચના બાદ પશ્ચિમ કચ્છ પોલીસ સક્રિય થઈ હતી. પોલીસ અધિક્ષક વિકાસ સુંડાએ બીજા જ દિવસે આશાબેનની મુલાકાત લઈને સમગ્ર ઘટનાની વિગતો મેળવી હતી. ત્યારબાદ LCB સહિતની પોલીસ ટીમે તપાસ શરૂ કરી હતી.

પોલીસની ઝડપી કાર્યવાહી અને ટેકનિકલ તપાસના પરિણામે માત્ર 72 કલાકમાં ₹35 લાખથી વધુની રકમ પરત મેળવવામાં સફળતા મળી હોવાનું પોલીસ દ્વારા જણાવાયું છે. આ કાર્યવાહી ‘તેરા તુઝકો અર્પણ’ અભિયાન હેઠળ કરવામાં આવી હતી.

મહિલાએ હર્ષ સંઘવી અને પોલીસનો આભાર માન્યો

રકમ પરત મળ્યા બાદ આશાબેને સંતોષ વ્યક્ત કર્યો હતો. તેમણે જણાવ્યું કે ન્યાય મેળવવા માટે ગાંધીનગરની તેમની મુલાકાત સફળ રહી અને તેમની જીવનભરની બચત પરત મળી છે. તેમણે નાયબ મુખ્યમંત્રી હર્ષ સંઘવીના ઝડપી નિર્ણય અને પશ્ચિમ કચ્છ પોલીસની તાત્કાલિક કાર્યવાહીની પ્રશંસા કરી હતી.

આ સાથે આશાબેને લોકોને પણ સાવચેત રહેવાની અપીલ કરી છે. તેમણે ખાસ કરીને વધુ નફો, પૈસા બમણા કરવા અથવા ટૂંકા સમયમાં મોટું વળતર આપવાના વચનો કરતી કંપનીઓમાં રોકાણ કરતા પહેલાં સંપૂર્ણ તપાસ કરવાની સલાહ આપી છે.