Gujarat: ગાંધીનગર Cyber Centreની મોટી કાર્યવાહી, ₹3.76 કરોડના ડિજિટલ ધરપકડ સાયબર રેકેટનો પર્દાફાશ
Gujarat News: સાયબર સેન્ટર ઓફ એક્સેલન્સ (ગાંધીનગર)ની ટીમે ડિજિટલ ધરપકડના નામે કરોડોની છેતરપિંડી કરનારા આંતરરાજ્ય સાયબર રેકેટનો ભંડાફોડ કર્યો છે. પોલીસે રાજસ્થાન અને હરિયાણામાંથી 3 આરોપીઓની ધરપકડ કરી છે. તપાસમાં સામે આવ્યું છે કે આરોપીઓએ ₹3.76 કરોડની સાયબર છેતરપિંડીની રકમ બેંક ખાતાઓ અને ક્રિપ્ટોકરન્સી મારફતે લોન્ડર કરી હતી.
રાજસ્થાન અને ચંદીગઢમાંથી 3 આરોપીઓ ઝડપાયા
ધરપકડ કરાયેલા આરોપીઓમાં રાજસ્થાનના અજમેર જિલ્લાના ગોપાલ રામ અને નેકદિન કથત, તેમજ હરિયાણાના જીંદ જિલ્લાના દીપક કુંડુનો સમાવેશ થાય છે. રાજસ્થાનના બંને આરોપીઓની અજમેરમાંથી અને દીપક કુંડુની ચંદીગઢમાંથી ધરપકડ કરવામાં આવી હતી. પોલીસે તેમની પાસેથી 4 મોબાઇલ ફોન જપ્ત કર્યા છે.
ઓનલાઈન લોનના નામે લોકોને બનાવતા શિકાર
તપાસમાં ખુલાસો થયો છે કે આરોપીઓ ઓનલાઈન લોન ઈચ્છુક લોકોને નિશાન બનાવતા હતા. તેઓ ‘Neo Finance’ નામની લોન કંપનીનું નામ લઈને લોકોને લોન આપવાનું વચન આપતા અને જરૂરી દસ્તાવેજો માંગતા હતા. ત્યારબાદ પીડિતોને ‘Pushbullet’ એપ ડાઉનલોડ કરાવી તેમાં લોગિન કરાવતા અને તેમના મોબાઇલ ફોનનો ઍક્સેસ મેળવી લેતા હતા.
બેંક ખાતામાં પૈસા જમા કરીને ક્રિપ્ટોમાં ટ્રાન્સફર
આરોપીઓ ડિજિટલ ધરપકડ દ્વારા છેતરાયેલી રકમ પહેલા લોન અરજદારોના બેંક ખાતામાં જમા કરાવતા અને પછી બલ્ક ટ્રાન્ઝેક્શન દ્વારા અન્ય ખાતાઓમાં ટ્રાન્સફર કરતા હતા. ત્યારબાદ આ રકમ ક્રિપ્ટોકરન્સી અને રોકડ વ્યવહારો મારફતે અન્ય સાથીદારો સુધી પહોંચાડવામાં આવતી હતી.
દેશના 13 રાજ્યોમાં 29 ફરિયાદો નોંધાઈ
સાયબર ક્રાઇમ પોર્ટલની તપાસમાં જાણવા મળ્યું કે આરોપીઓ સાથે જોડાયેલા 7 બેંક ખાતાઓનો ઉપયોગ દેશભરમાં ₹83.11 લાખથી વધુની સાયબર છેતરપિંડી માટે થયો હતો. આ રેકેટ સામે 13 રાજ્યોમાં કુલ 29 FIR નોંધાઈ છે, જેમાં ગુજરાત, કર્ણાટક, મહારાષ્ટ્ર, દિલ્હી, રાજસ્થાન, ઉત્તર પ્રદેશ, પશ્ચિમ બંગાળ, તમિલનાડુ સહિતના રાજ્યોનો સમાવેશ થાય છે.
કમિશન માટે ખાતાઓ આપતા હતા
તપાસ મુજબ રાજસ્થાનના આરોપીઓએ ભાગીદારી ફર્મના નામે બેંક ખાતું ખોલાવી તેમાં આશરે ₹70 લાખના ગેરકાયદેસર વ્યવહારો કરાવ્યા હતા. કમિશનના લોભમાં તેઓ સાયબર ગેંગને બેંક ખાતાની વિગતો પૂરી પાડતા અને ખાતામાં આવેલી રકમને અન્ય ખાતાઓમાં ડાયવર્ટ કરવામાં મદદ કરતા હતા.
પોલીસ હવે આ રેકેટ સાથે સંકળાયેલા અન્ય લોકો અને ક્રિપ્ટોકરન્સી મારફતે થયેલા નાણાકીય વ્યવહારોની વધુ તપાસ કરી રહી છે.