Gujarat News: ગુજરાતમાં ગેરકાયદેસર બાંગ્લાદેશી ઇમિગ્રન્ટ્સ સામે ચાલી રહેલા “ઓપરેશન ડેલ્ટા હન્ટ” વચ્ચે એક અનોખો મામલો સામે આવ્યો છે. આણંદના એક વ્યક્તિએ રાજ્ય સરકારને અપીલ કરી છે કે તેની બાંગ્લાદેશી મૂળની પત્નીને દેશનિકાલ ન કરવામાં આવે, કારણ કે તેણીએ હિન્દુ ધર્મ અપનાવ્યો છે અને બાંગ્લાદેશ પરત મોકલવામાં આવશે તો તેના જીવને જોખમ હોઈ શકે છે.
ફેસબુક મિત્રતા બાદ પ્રેમ અને લગ્નનો દાવો
આણંદ જિલ્લાના લાંભવેલ ગામના રહેવાસી તરુણ પટેલના જણાવ્યા મુજબ, વર્ષ 2012-13 દરમિયાન ફેસબુક મારફતે તેમની ઓળખ કાજલ નામની યુવતી સાથે થઈ હતી. બંને વચ્ચે પ્રેમસંબંધ બંધાયો અને બાદમાં કાજલ ગેરકાયદેસર રીતે ભારત આવી હતી. પટેલનો દાવો છે કે ભારતમાં આવ્યા પછી બંનેએ હિન્દુ રીતરિવાજ મુજબ લગ્ન કર્યા હતા અને હાલમાં તેમને બે સંતાનો છે.
દસ્તાવેજો વિના રહેતી મહિલા અટકાયતમાં
તાજેતરમાં સ્થાનિક ક્રાઇમ બ્રાંચે તપાસ દરમિયાન કાજલ પાસે માન્ય દસ્તાવેજો ન હોવાનું બહાર આવતા તેની અટકાયત કરી હતી. હાલ તેને મહિલા આશ્રયસ્થાનમાં રાખવામાં આવી છે અને દેશનિકાલની કાર્યવાહી ચાલુ હોવાનું પરિવારનું કહેવું છે.
હર્ષ સંઘવીને માનવતાના ધોરણે અપીલ
પતિ તરુણ પટેલે રાજ્યના ગૃહ રાજ્યમંત્રી હર્ષ સંઘવીને અપીલ કરતા જણાવ્યું કે તેમની પત્ની હવે હિન્દુ ધર્મ અને ભારતીય સંસ્કૃતિ સાથે જોડાઈ ગઈ છે. જો તેને બાંગ્લાદેશ મોકલવામાં આવશે તો તેના જીવને જોખમ થઈ શકે છે. તેમણે બાળકોના ભવિષ્યને ધ્યાનમાં રાખીને સહાનુભૂતિપૂર્વક નિર્ણય લેવાની માંગ કરી છે.
માતાથી અલગ થતા બાળકોની વ્યથા
દંપતીના મોટા દીકરાએ પણ પોતાની માતાને વહેલી તકે મુક્ત કરવાની અપીલ કરી છે. પરિવારના જણાવ્યા મુજબ, છેલ્લા બે અઠવાડિયાથી બાળકો તેમની માતાને મળી શક્યા નથી, જેના કારણે તેઓ માનસિક રીતે વ્યથિત છે.
ઓપરેશન ડેલ્ટા હન્ટ હેઠળ કાર્યવાહી તેજ
ગુજરાત પોલીસ રાજ્યભરમાં ગેરકાયદેસર રીતે રહેતા બાંગ્લાદેશી નાગરિકો સામે “ઓપરેશન ડેલ્ટા હન્ટ” અંતર્ગત કાર્યવાહી કરી રહી છે. આ અભિયાન દરમિયાન અત્યાર સુધીમાં 600થી વધુ બાંગ્લાદેશી નાગરિકોની અટકાયત કરવામાં આવી છે, જેમાં આણંદ જિલ્લામાંથી પણ અનેક લોકોનો સમાવેશ થાય છે.