Gujarat News: ગુજરાત સરકારના સામાજિક ન્યાય અને અધિકારિતા વિભાગે દિવ્યાંગજનો માટેની બસ પાસ વ્યવસ્થાને વધુ સરળ અને ડિજિટલ બનાવી છે. વિભાગે રાજ્ય ઈ-ગવર્નન્સ મિશન ટીમ (SeMT) સાથે મળીને દિવ્યાંગતા બસ પાસને DigiLocker સાથે સંકલિત કર્યા છે. રાજ્યભરમાં અત્યાર સુધીમાં 4.42 લાખથી વધુ દિવ્યાંગ બસ પાસ જારી કરવામાં આવ્યા છે.
હવે પાસધારકો પોતાના મોબાઇલમાં ઉપલબ્ધ સરકાર દ્વારા માન્ય ડિજિટલ પાસ દર્શાવીને GSRTCની બસોમાં મફત મુસાફરી કરી શકશે.
હવે ભૌતિક પાસ રાખવાની જરૂર નહીં
સામાજિક ન્યાય અને અધિકારિતા મંત્રી ડૉ. પ્રદ્યુમન વાજા અને વિભાગના સચિવ હર્ષદ પટેલના જણાવ્યા અનુસાર, DigiLocker સાથે બસ પાસનું સંકલન દિવ્યાંગ લાભાર્થીઓ માટે મોટી સુવિધા સાબિત થશે.
ડિજિટલ પાસને કારણે હવે ભૌતિક દસ્તાવેજ સાથે રાખવાની જરૂર નહીં રહે. પાસ ખોવાઈ જવા કે નુકસાન થવાની ચિંતા પણ દૂર થશે. લાભાર્થીઓ પોતાના મોબાઇલ ફોન દ્વારા ગમે ત્યારે પાસ સુરક્ષિત રીતે મેળવી અને જરૂર પડે ત્યારે તેની ચકાસણી કરાવી શકશે.
GSRTC બસોમાં મફત મુસાફરીનો લાભ
રાજ્યમાં જારી કરાયેલા 4.42 લાખથી વધુ દિવ્યાંગ બસ પાસના લાભાર્થીઓ હવે ડિજિટલ પાસનો ઉપયોગ કરીને ગુજરાત રાજ્ય માર્ગ પરિવહન નિગમ (GSRTC)ની બસોમાં મફત મુસાફરી કરી શકશે.
આ વ્યવસ્થાથી પેપરલેસ ગવર્નન્સને પ્રોત્સાહન મળશે અને દિવ્યાંગજનોને સરકારી સુવિધાઓ મેળવવામાં વધુ સરળતા રહેશે.
₹4 લાખનું અકસ્માત વીમા કવર પણ મળશે
દિવ્યાંગ બસ પાસ સાથે ₹4 લાખનું આકસ્મિક મૃત્યુ વીમા કવર પણ જોડાયેલું છે. પાસધારકનું અકસ્માતમાં મૃત્યુ થાય તો નિયુક્ત નોમિની અથવા કાનૂની વારસદાર જરૂરી દસ્તાવેજો વિભાગમાં રજૂ કરીને વીમા લાભ મેળવી શકે છે.
ડિજિટલ ગવર્નન્સ તરફ વધુ એક પગલું
સરકાર દ્વારા DigiLocker સાથે બસ પાસનું સંકલન ‘ડિજિટલ ઈન્ડિયા’ અને પેપરલેસ ગવર્નન્સની દિશામાં વધુ એક મહત્વપૂર્ણ પગલું માનવામાં આવે છે. ડિજિટલ દસ્તાવેજની સુવિધાથી દિવ્યાંગ લાભાર્થીઓને જરૂરી સેવાઓ અને કલ્યાણ યોજનાઓનો લાભ વધુ સરળતાથી અને સુરક્ષિત રીતે મળી શકશે.