Ahmedabad Yoga divas News: અમદાવાદના ઈકેએ એરિના ટ્રાન્સસ્ટેડિયા ખાતે પ્રથમ વિશ્વ યોગાસન ચેમ્પિયનશિપ 2026નો ભવ્ય પ્રારંભ થયો છે. યોગાસન રમતને સમર્પિત આ પ્રથમ વૈશ્વિક ચેમ્પિયનશિપમાં વિશ્વના 78 દેશોના 500થી વધુ ખેલાડીઓ ભાગ લઈ રહ્યા છે. આ ઐતિહાસિક આયોજનથી અમદાવાદે વૈશ્વિક રમતગમતના નકશા પર એક નવી ઓળખ ઊભી કરી છે.
વડાપ્રધાન નરેન્દ્ર મોદીએ ચેમ્પિયનશિપને ખુલ્લી જાહેર કરતાં કહ્યું કે અમદાવાદની ધરતી પરથી વિશ્વની રમતગમતની વારસામાં એક નવું અધ્યાય ઉમેરાયું છે. તેમણે વિશ્વાસ વ્યક્ત કર્યો કે ભવિષ્યમાં યોગાસનને આંતરરાષ્ટ્રીય રમતગમતમાં વિશેષ સ્થાન મળશે અને આ ચેમ્પિયનશિપ યોગાસનને ઓલિમ્પિક્સ તથા કોમનવેલ્થ ગેમ્સ સુધી પહોંચાડવામાં મહત્વપૂર્ણ સાબિત થશે.
કેન્દ્રીય રમતગમત મંત્રી મનસુખ માંડવીયાએ આ પ્રસંગને ઐતિહાસિક ગણાવતા જણાવ્યું કે પ્રથમ ફૂટબોલ વર્લ્ડ કપમાં માત્ર 13 દેશોએ ભાગ લીધો હતો, જ્યારે પ્રથમ વિશ્વ યોગાસન ચેમ્પિયનશિપમાં 78 દેશોની ભાગીદારી જોવા મળી રહી છે. તેમણે ભારપૂર્વક કહ્યું કે ભારતે હંમેશા સંતુલન અને માનસિક શક્તિનો સંદેશ આપ્યો છે, જેને હવે રમતના સ્વરૂપમાં વિશ્વ સુધી પહોંચાડવામાં આવી રહ્યો છે.
ગુજરાતના મુખ્યમંત્રી ભુપેન્દ્ર પટેલએ વિશ્વભરના ખેલાડીઓ અને મહાનુભાવોને આવકારતા જણાવ્યું કે અમદાવાદમાં આ ચેમ્પિયનશિપનું આયોજન સમગ્ર ગુજરાત માટે ગૌરવની ક્ષણ છે. તેમણે આશા વ્યક્ત કરી કે આ ઇવેન્ટ વિશ્વભરમાં યોગાસનની લોકપ્રિયતામાં વધારો કરશે.
રામદેવ બાબા જણાવ્યું કે આ ચેમ્પિયનશિપ માત્ર રમતગમતની સ્પર્ધા નથી, પરંતુ આત્મશોધ, આત્મઅનુશાસન અને આત્મવિકાસની યાત્રા છે. તેમણે કહ્યું કે યોગાસન આજે વિશ્વભરના યુવાનો માટે રમત અને જીવનશૈલી બંને બની રહ્યું છે.
વિશ્વ યોગાસન અને યોગાસન ભારતના મહાસચિવ Jaideep Aryaએ જણાવ્યું કે યોગ માત્ર શરીરની મુદ્રાઓ સુધી મર્યાદિત નથી, પરંતુ મન અને વ્યક્તિત્વના વિકાસની પ્રક્રિયા છે. યોગાસન રમત દ્વારા ખેલાડીઓ શારીરિક ક્ષમતા સાથે માનસિક સંતુલન અને અનુશાસનનું પણ પ્રદર્શન કરી શકે છે.
ચેમ્પિયનશિપમાં યજમાન ભારતે 122 સભ્યોની મજબૂત ટીમ ઉતારી છે. આગામી પાંચ દિવસ દરમિયાન ખેલાડીઓ વ્યક્તિગત, કલાત્મક અને પરંપરાગત જૂથ સ્પર્ધાઓ સહિત વિવિધ કેટેગરીમાં પોતાની પ્રતિભા દર્શાવશે.
આ ચેમ્પિયનશિપની ખાસ વાત એ છે કે પ્રથમ વખત વૈશ્વિક સ્તરે ઇલેક્ટ્રોનિક સ્કોરિંગ સિસ્ટમનો ઉપયોગ કરવામાં આવશે, જે નિર્ણાયક પ્રક્રિયામાં વધુ પારદર્શિતા અને ચોકસાઈ લાવશે. સ્પર્ધામાં 32 આંતરરાષ્ટ્રીય અને 51 રાષ્ટ્રીય નિર્ણાયકો ફરજ બજાવી રહ્યા છે.
78 દેશોના ખેલાડીઓની હાજરી સાથે પ્રથમ વિશ્વ યોગાસન ચેમ્પિયનશિપે માત્ર અમદાવાદ અને ભારત માટે જ નહીં, પરંતુ યોગાસનને વૈશ્વિક સ્પર્ધાત્મક રમત તરીકે સ્થાપિત કરવાની દિશામાં પણ ઐતિહાસિક પગલું ભર્યું છે.