Disha Salian Murder Case: અભિનેતા સુશાંત સિંહ રાજપૂતના પૂર્વ મેનેજર દિશા સાલિયનના મૃત્યુ કેસમાં તપાસ દરમિયાન એક નવી અને રહસ્યમય કડી સામે આવી છે. વર્ષ 2020ના હોસ્પિટલ રેકોર્ડમાં નોંધાયેલા એક કોન્સ્ટેબલના નિવેદન મુજબ દિશા સાલિયનને હોસ્પિટલમાં બે પુરુષ અને એક મહિલા લઈને આવ્યા હતા. બે પુરુષોની ઓળખ થઈ ચૂકી છે, પરંતુ મહિલાની ઓળખ હજુ સુધી કોઈ સત્તાવાર રેકોર્ડમાં સામે આવી નથી.
હોસ્પિટલ કોન્સ્ટેબલના નિવેદનથી નવો વળાંક
15 જૂન 2020ના રોજ હોસ્પિટલ કોન્સ્ટેબલ સંતોષ કાચિરત ગુનગુનેએ આપેલા નિવેદનમાં ડૉક્ટરના હવાલાથી જણાવ્યું હતું કે દિશાને હોસ્પિટલમાં ત્રણ લોકો લાવ્યા હતા. દિશાના મંગેતર રોહન રાય અને અન્ય સાક્ષીઓએ બે પુરુષ તરીકે હિમાંશુ શિખરે અને ઇન્દ્રનીલ વૈદ્યના નામ આપ્યા છે, પરંતુ ત્રીજી મહિલાની ઓળખ હજુ સુધી સ્પષ્ટ થઈ નથી.
CBIએ FIR નોંધ્યા બાદ તપાસ તેજ
દિશા સાલિયન મૃત્યુ કેસમાં CBIએ નવી FIR નોંધ્યા બાદ તપાસને નવો વેગ મળ્યો છે. FIRમાં મહારાષ્ટ્રના પૂર્વ મંત્રી આદિત્ય ઠાકરે, અભિનેતા સૂરજ પંચોલી અને ડીનો મોરિયાનું નામ સામેલ છે. બોમ્બે હાઈકોર્ટે CBIને નિવેદનો નોંધવાની મંજૂરી આપ્યા બાદ આ કાર્યવાહી થઈ છે.
દિશાના પિતાના ગંભીર આરોપ
CBIએ દિશા સાલિયનના પિતા સતીશ સલિયનનું નિવેદન નોંધ્યું છે. અહેવાલો મુજબ તેમણે આરોપ લગાવ્યો છે કે કેટલાક પ્રભાવશાળી લોકો અને સરકારી અધિકારીઓએ કાવતરું રચ્યું અને કેસને દબાવવાનો પ્રયાસ કર્યો. તેમણે કેટલાક પોલીસ અધિકારીઓ અને સરકારી કર્મચારીઓની ભૂમિકાની પણ તપાસ કરવાની માંગ કરી છે.
અનેક અધિકારીઓ અને ડૉક્ટરોના નામનો ઉલ્લેખ
સૂત્રોના જણાવ્યા અનુસાર નિવેદનમાં પોસ્ટમોર્ટમ સાથે સંકળાયેલા ડૉક્ટરો, ફોરેન્સિક લેબના અધિકારીઓ, પોલીસ કર્મચારીઓ અને બિલ્ડિંગના સુરક્ષા સ્ટાફ સહિત અનેક લોકોના નામનો ઉલ્લેખ કરવામાં આવ્યો છે. આરોપ છે કે કેસ સંબંધિત દસ્તાવેજો અને રેકોર્ડ સાથે ચેડાં કરવામાં આવ્યા હોઈ શકે છે.
તપાસ ચાલુ, આરોપો હજુ સાબિત થયા નથી
CBIએ કેસની તપાસ DSP પૂરણ સિંહને સોંપી છે. એજન્સી હવે તમામ નિવેદનો ઉપલબ્ધ પુરાવા અને રેકોર્ડની તપાસ કરી રહી છે. હાલ સુધી નિવેદનોમાં કરાયેલા આરોપો કોર્ટમાં સાબિત થયા નથી અને તપાસ હજુ ચાલુ છે.