Imran khan: અભિનેતાએ હાઈકોર્ટમાં ‘ભારત છોડો’ નોટિસને પડકારી; ૨૮ ઓક્ટોબર સુધીમાં દેશ છોડવાનો આદેશ

Imran khan: બોલિવૂડ અભિનેતા ઈમરાન ખાને તાજેતરમાં મુંબઈના ઓગસ્ટ ક્રાંતિ મેદાનમાં યોજાયેલા એક વિરોધ પ્રદર્શનમાં ભાગ લીધો હતો, જ્યાં પ્રદર્શનકારીઓએ ચૂંટણી કમિશનર જ્ઞાનેશ કુમારના રાજીનામાની માંગ કરી હતી. આ ઘટના દરમિયાન મુંબઈ પોલીસે ઈમરાન ખાનની અટકાયત કરી હતી. ત્યારબાદ, પોલીસે તેમને ૨૮ ઓક્ટોબર સુધીમાં ભારત છોડી દેવાનો નિર્દેશ આપતી નોટિસ જારી કરી હતી.

ઈમરાને હાઈકોર્ટમાં નોટિસને પડકારી

અભિનેતાએ મુંબઈ પોલીસ દ્વારા જારી કરાયેલી આ નોટિસને બોમ્બે હાઈકોર્ટમાં પડકારી છે. ઈમરાને આ નોટિસને ગેરકાયદેસર ગણાવીને કોર્ટને તેને રદ કરવા વિનંતી કરી છે.

૪૩ વર્ષીય ઈમરાન ખાન અમેરિકન નાગરિક છે અને તેમની પાસે ‘ઓવરસીઝ સિટિઝન ઓફ ઈન્ડિયા’ (OCI) કાર્ડ છે. શનિવારે તેમણે તેમના વકીલ ઝુલ્ફીકાર મેમન અને તેમની કાયદાકીય ટીમ દ્વારા બોમ્બે હાઈકોર્ટમાં અરજી દાખલ કરી હતી.

અરજીમાં ઈમરાને શું જણાવ્યું છે

અરજીમાં તેમણે પોલીસની નોટિસને “ગેરકાયદેસર, ખોટી અને કાયદાની વિરુદ્ધ” ગણાવી છે. અભિનેતાએ કોર્ટને આ નોટિસ રદ કરવા અને જ્યાં સુધી કાયદાકીય કાર્યવાહી પૂર્ણ ન થાય ત્યાં સુધી તેના અમલીકરણ પર રોક (સ્ટે) લગાવવા વિનંતી કરી છે.

ઈમરાનની અરજીમાં દલીલ કરવામાં આવી છે કે વર્તમાન કાયદાઓમાં એવી કોઈ જોગવાઈ નથી જે OCI કાર્ડધારકને શાંતિપૂર્ણ વિરોધ પ્રદર્શનમાં ભાગ લેતા અટકાવતી હોય. તેમણે વધુમાં જણાવ્યું હતું કે, જ્યારે નોટિસ જારી કરવામાં આવી ત્યારે તેમને ન તો કોઈ સ્પષ્ટ કારણ આપવામાં આવ્યું હતું અને ન તો તેમનો પક્ષ રજૂ કરવાની તક આપવામાં આવી હતી.