Ahmedabad Ranip Murder News: અમદાવાદના રાણીપ વિસ્તારમાં રાત્રિના સમયે 37 વર્ષીય રણછોડ ઉર્ફે અજય સાલ્વીની હત્યાની ઘટનાથી ચકચાર મચી ગઈ છે. સેન્ટ્રલ જેલ તરફ જતા રસ્તા પર અજયને સશસ્ત્ર શખ્સોના ટોળાએ ઘેરી લીધો હતો અને છરી, તલવાર તથા લાકડીઓ વડે હુમલો કર્યો હતો. ગંભીર રીતે ઘાયલ અજયને હોસ્પિટલ લઈ જવામાં આવ્યો હતો, જ્યાં તબીબોએ તેને મૃત જાહેર કર્યો હતો.
મળતી માહિતી મુજબ, અજય પોતાના મામાના દીકરા ભરત સાલ્વી સાથે રાત્રે આશરે 2 વાગ્યે સેન્ટ્રલ જેલ તરફ જતા રસ્તા પર હતો. આ દરમિયાન સુભાષ બ્રિજ તરફથી રાજસ્થાન નંબરની મહિન્દ્રા પિકઅપ આવી હતી. તેમાં સવાર વિશાલ ચૌહાણ અને અંકિત પરમાર સહિત સાતથી આઠ શખ્સો હથિયારો સાથે નીચે ઉતર્યા હોવાનો આરોપ છે.
હુમલાખોરોને જોઈને અજયે ભરતને ત્યાંથી ભાગી જવા કહ્યું હતું. ત્યારબાદ આરોપીઓએ અજયને પકડી લીધો અને તેના પર વારંવાર હુમલો કર્યો હોવાનો ફરિયાદમાં ઉલ્લેખ છે. હુમલામાં અજયને ગંભીર ઈજાઓ થઈ હતી. ઘટનાને પગલે ભરતે રવિ સાલ્વીને જાણ કરી અને ત્યારબાદ અજયને એમ્બ્યુલન્સ મારફતે હોસ્પિટલ ખસેડવામાં આવ્યો હતો, પરંતુ સારવાર મળે તે પહેલાં જ તેનું મોત થયું હતું.
જૂની અદાવતમાં હત્યા થઈ હોવાની આશંકા
પરિવારે હત્યા પાછળ જૂની અદાવતને કારણ ગણાવ્યું છે. પરિવારના જણાવ્યા મુજબ, અજયનો આશરે 10 દિવસ પહેલાં ભદ્રેશ શર્મા સાથે વિવાદ થયો હતો. આ વિવાદ બાદ ભદ્રેશના સાળા સાગર ઉર્ફે માફિયા પરમાર અને અંકિત પરમાર દ્વારા અજયને જાનથી મારી નાખવાની ધમકી આપવામાં આવી હોવાનો પણ આરોપ છે.
પોલીસની પ્રાથમિક તપાસમાં પણ અજય અને કેટલાક આરોપીઓ વચ્ચે અગાઉનો વિવાદ હોવાનું સામે આવ્યું છે. જણાવ્યા મુજબ, મદ્રાસી ચાલીમાં થયેલા ઝઘડા દરમિયાન અજયે દરમિયાનગીરી કરી હતી અને ભદ્રેશ શર્માને થપ્પડ મારી હતી. ત્યારબાદ અજયને ધમકી આપવામાં આવી હોવાની માહિતી પોલીસને મળી છે. આ જૂનો વિવાદ હત્યાનું કારણ છે કે કેમ તે અંગે તપાસ ચાલી રહી છે.
CCTV ફૂટેજના આધારે આરોપીઓની શોધખોળ
ઘટનાની જાણ થતાં રાણીપ પોલીસ ઘટનાસ્થળે પહોંચી હતી અને તપાસ શરૂ કરી હતી. પોલીસે આસપાસના વિસ્તારોના CCTV ફૂટેજ મેળવવાની પ્રક્રિયા શરૂ કરી છે. ફૂટેજના આધારે હુમલામાં સામેલ શખ્સોની ઓળખ અને તેમની હિલચાલ અંગે માહિતી મેળવવામાં આવી રહી છે.
પોલીસે હત્યાના મામલે વિવિધ કલમો હેઠળ ગુનો નોંધ્યો છે અને ફરાર આરોપીઓને ઝડપી પાડવા માટે તપાસ તેજ કરી છે. પોલીસ દ્વારા સંભવિત સ્થળોએ દરોડા પાડવાની કાર્યવાહી પણ હાથ ધરવામાં આવી રહી છે. પરિવારનો આરોપ છે કે વિશાલ ચૌહાણ સહિતના શખ્સોએ સાગર ઉર્ફે માફિયા પરમાર અને અંકિત પરમારના કહેવાથી અજયની હત્યા કરી હતી. જોકે, આ આરોપોની સત્યતા પોલીસ તપાસ પૂર્ણ થયા બાદ જ સ્પષ્ટ થશે.
રાણીપ વિસ્તારમાં બનેલી આ ઘટનાથી સ્થાનિકોમાં ચકચાર મચી છે. રાત્રિના સમયે બનેલી હત્યાએ અમદાવાદ શહેરની કાયદો-વ્યવસ્થા અને રાત્રિ સુરક્ષા વ્યવસ્થા અંગે પણ સવાલો ઉભા કર્યા છે.