Ahmedabad News: ગુજરાતમાં ડ્રગ્સની હેરાફેરી સામે કાર્યવાહી કરતાં અમદાવાદ શહેર ક્રાઇમ બ્રાન્ચ અને સુરત ક્રાઇમ બ્રાન્ચની સંયુક્ત ટીમે ત્રણ આરોપીઓની ધરપકડ કરી છે. અમદાવાદ-વડોદરા એક્સપ્રેસ વે પર રામોલ ટોલ ટેક્સ ચેકપોઇન્ટ નજીકથી આરોપીઓ પાસેથી 4.50 કિલોથી વધુ હેરોઈન અને આશરે 2.50 કિલો મેફેડ્રોન (MD) સહિતનો જથ્થો જપ્ત કરવામાં આવ્યો હતો. પોલીસના જણાવ્યા અનુસાર, જપ્ત કરાયેલા ડ્રગ્સ અને અન્ય સામાનની કુલ કિંમત આશરે ₹25.65 કરોડ છે.
એક વર્ષથી આરોપીઓ પર રાખવામાં આવતી હતી નજર
શહેર પોલીસ કમિશનર અનુપમ સિંહ ગેહલોતે ગુરુવારે પત્રકારોને જણાવ્યું હતું કે આરોપીઓ છેલ્લા એક વર્ષથી પોલીસની દેખરેખ હેઠળ હતા. બુધવારે મળેલી વિશ્વસનીય માહિતીના આધારે અમદાવાદ અને સુરત ક્રાઇમ બ્રાન્ચની ટીમોએ સંયુક્ત રીતે છટકું ગોઠવ્યું હતું. ત્યારબાદ રામોલ ટોલ ટેક્સ ચેકપોઇન્ટ નજીક દિલ્હી પાસિંગ ધરાવતી એક SUV કારને રોકીને ત્રણેય આરોપીઓને ઝડપી લેવામાં આવ્યા હતા.
પોલીસે આરોપીઓ પાસેથી ડ્રગ્સ ઉપરાંત છ મોબાઇલ ફોન અને ₹43,600 રોકડા પણ જપ્ત કર્યા છે.
ત્રણ આરોપીઓની ઓળખ
પોલીસે ધરપકડ કરાયેલા આરોપીઓની ઓળખ કફીલ અહેમદ ઉર્ફે જાવેદ અંસારી (59), ટિફેલ નૌખેજ મુસ્લિમ (44) અને મોહમ્મદ ઇમરાન ઉર્ફે રાજા અલ્વી (42) તરીકે કરી છે.
પોલીસની માહિતી મુજબ, કફીલ ઉત્તર પ્રદેશના મૈનપુરી જિલ્લાના ભોગાવ વિસ્તારનો રહેવાસી છે, જ્યારે ટિફેલ બુલંદશહેર જિલ્લાના કમાલપુર ગામનો રહેવાસી છે. બંને હાલમાં દિલ્હીના ઝાકિર નગરમાં રહેતા હોવાનું જણાવાયું છે. ત્રીજો આરોપી ઇમરાન મેરઠની જીબીઆઈ કોલોની અને દિલ્હીના ઓખલા વિહાર સાથે સંકળાયેલો હોવાનું પોલીસે જણાવ્યું હતું.
ડ્રગ્સની હેરાફેરીમાં ડ્રોનનો ઉપયોગ થયાનો ખુલાસો
પોલીસ કમિશનરના જણાવ્યા અનુસાર, પ્રાથમિક પૂછપરછમાં ડ્રગ્સના જથ્થાના સ્ત્રોત અંગે કેટલીક વિગતો સામે આવી છે. પોલીસનો દાવો છે કે આશરે અઢી કિલો મેફેડ્રોન કફીલે રાજસ્થાનના ઝાલાવાડ જિલ્લાના ભવાની મંડીના રહેવાસી શકીલ મોહમ્મદ બશીર મોહમ્મદ પાસેથી ખરીદ્યું હતું.
હેરોઈન અંગે પોલીસને જાણવા મળ્યું હતું કે ટિફેલને અફઘાનિસ્તાનના કંદહારના રહેવાસી રહેમત ગુલ મારફતે ડ્રગ્સ મળ્યું હતું. કન્સાઇન્મેન્ટ દિલ્હીના લાજપત નગર સુધી પહોંચાડવામાં આવ્યું હોવાનો પણ પોલીસનો દાવો છે. પોલીસના જણાવ્યા મુજબ, ડ્રગ્સ સરહદ પારથી ડ્રોન મારફતે લાવવામાં આવ્યા બાદ દિલ્હી પહોંચાડવામાં આવતું હતું.
ચોકલેટ અને ઇન્સ્ટન્ટ ડ્રિંક્સનાં પાર્સલમાં છુપાવ્યું
પોલીસના જણાવ્યા અનુસાર, આરોપીઓએ ડ્રગ્સને ઇન્સ્ટન્ટ ડ્રિંક્સ, રિસોટ્ટો અને ચોકલેટનાં પાર્સલમાં પેક કરીને કારમાં છુપાવ્યું હતું. હેરોઈન અને મેફેડ્રોનનો જથ્થો રાજકોટના અસલમ નામના વ્યક્તિ સુધી પહોંચાડવાનો હતો એવો પોલીસનો દાવો છે.
ત્રણેય આરોપીઓ ડ્રગ્સનો જથ્થો લઈને અમદાવાદ તરફ આવી રહ્યા હતા ત્યારે પોલીસની ટીમે તેમને ઝડપી લીધા હતા. હાલ પોલીસ ડ્રગ્સના સ્ત્રોત, સપ્લાય ચેઇન અને આ નેટવર્ક સાથે સંકળાયેલા અન્ય લોકોની ભૂમિકા અંગે વધુ તપાસ કરી રહી છે.