દિલ્હીમાં ચૂંટણી પ્રચાર દરમિયાન કન્હૈયા કુમાર પર હુમલો, માળા પહેરાવવા આવેલા યુવકોએ મારી થપ્પડ

ચૂંટણી પ્રચાર દરમિયાન ઉત્તર પૂર્વ દિલ્હીથી કોંગ્રેસના ઉમેદવાર કન્હૈયા કુમાર સાથે મારપીટનો મામલો સામે આવ્યો છે. મળતી માહિતી મુજબ, કન્હૈયા કુમારને માળા પહેરાવવાના બહાને આવેલા યુવકે તેને થપ્પડ મારી હતી. આ પછી સ્થળ પર અફરાતફરી મચી ગઈ હતી. તમને જણાવી દઈએ કે આ ઘટના ઉત્તર પૂર્વ દિલ્હીના ઉસ્માનપુર પોલીસ સ્ટેશન વિસ્તારના કરતાર નગરમાં બની હતી.

આ ઘટનાનો વીડિયો સોશિયલ મીડિયા પર વાયરલ થઈ રહ્યો છે. આમાં એક યુવક કન્હૈયા કુમારની નજીક આવે છે અને પહેલા તેને હાર પહેરાવે છે, ત્યારબાદ તે કન્હૈયા પર હુમલો કરે છે. જોકે, ભીડમાં હાજર કન્હૈયા કુમારના સમર્થકોએ તરત જ યુવકને પકડી લીધો હતો.

તમને જણાવી દઈએ કે નોર્થ ઈસ્ટ દિલ્હી સીટ પરથી કોંગ્રેસ અને ઈન્ડિયા બ્લોકના ઉમેદવાર કન્હૈયા કુમાર છે, જ્યારે ભાજપે આ સીટ પરથી મનોજ તિવારીને મેદાનમાં ઉતાર્યા છે. દિલ્હીની તમામ 7 સીટો પર 25 મેના રોજ મતદાન થશે.

‘અમે ભારતીય સેનાના અપમાનનો બદલો લીધો’
હુમલાખોરોએ કહ્યું કે જેઓ આ દેશને તોડવાની વાત કરે છે તેમની સાથે પણ આવું જ થશે. અમે ભારતીય સેનાના અપમાનનો બદલો લીધો છે. કન્હૈયાએ સમગ્ર દેશની ભાવનાઓને ઠેસ પહોંચાડી હતી, આજે અમે તેનો બદલો લીધો છે. હુમલાખોરોએ કહ્યું કે અમે કહેવા માંગીએ છીએ કે અમે કોઈ પાર્ટી સાથે જોડાયેલા નથી. અમે અમારી રીતે આ હુમલો કર્યો છે.