Bachubhai Khabadના બંગલાની સફાઈ માટે ફાયર બ્રિગેડનો ઉપયોગ? વીડિયો વાયરલ થતાં થયો વિવાદ
ગુજરાત ભાજપના નેતા અને ભૂતપૂર્વ મંત્રી Bachubhai Khabad ફરી એકવાર વિવાદમાં આવ્યા છે. દેવગઢ બારિયામાં તેમના બંગલાની બહાર સફાઈ માટે નગરપાલિકાના ફાયર બ્રિગેડ વાહનનો ઉપયોગ થતો હોવાનો વીડિયો સોશિયલ મીડિયા પર વાયરલ થતાં રાજકીય ગરમાવો વધી ગયો છે. કોંગ્રેસે આ મુદ્દે સરકાર પર આકરા પ્રહારો કરી જવાબ માંગ્યો છે.
વાયરલ વીડિયોમાં દેવગઢ બારિયા નગરપાલિકાનું ફાયર બ્રિગેડ વાહન Bachubhai Khabadના નિવાસસ્થાનની બહાર સફાઈ માટે પાણીનો છંટકાવ કરતું જોવા મળી રહ્યું છે. સરકારી ફાયર ટેન્કર અને કર્મચારીઓનો આ રીતે ઉપયોગ કેવી રીતે થયો તે અંગે અનેક સવાલો ઉઠ્યા છે.
ફાયર વિભાગે કહ્યું- પૂર્વ મંત્રી પાસેથી ₹2700 વસૂલાશે
મામલો સામે આવ્યા બાદ ફાયર વિભાગને પૂછવામાં આવ્યું કે ફાયર બ્રિગેડને બચુભાઈ ખાબડના બંગલે મોકલવાનો આદેશ કોણે આપ્યો હતો? તેમજ આ કામગીરીમાં કેટલું ડીઝલ અને અન્ય ખર્ચ થયો અને તેની જવાબદારી કોની રહેશે?
ફાયર વિભાગ તરફથી જણાવવામાં આવ્યું હોવાનું સામે આવ્યું છે કે આ કામગીરીનો ખર્ચ પૂર્વ મંત્રી બચુભાઈ ખાબડ પાસેથી વસૂલવામાં આવશે. વિભાગે આશરે ₹2700 ચાર્જ વસૂલવાનો દાવો કર્યો છે.
જોકે સરકારી કટોકટી સેવા સાથે સંકળાયેલા વાહન અને કર્મચારીઓનો ખાનગી સ્થળે ઉપયોગ શા માટે કરવામાં આવ્યો તે અંગે હજુ પણ સવાલો યથાવત છે.
કોંગ્રેસનો સરકાર પર પ્રહાર
ગુજરાત કોંગ્રેસના મુખ્ય પ્રવક્તા ડૉ. મનીષ દોશીએ આ મુદ્દે રાજ્ય સરકારને ઘેરી છે. તેમણે સવાલ ઉઠાવ્યો કે ગુજરાતના લોકો પાણી માટે પરેશાન થઈ રહ્યા છે ત્યારે ભાજપના ધારાસભ્યના બંગલામાં સરકારી ફાયર ટેન્કર દ્વારા ‘VIP પાણી’ કેમ પહોંચાડવામાં આવી રહ્યું છે?
દોશીએ કહ્યું કે ફાયર વિભાગના વાહનો અને કટોકટી સેવાઓ જનતાના હિત માટે છે કોઈ વ્યક્તિના ખાનગી ઉપયોગ માટે નહીં. તેમણે સરકાર પાસે આ સમગ્ર મામલે સ્પષ્ટતા માંગતા કહ્યું કે જનતાના કરમાંથી ચાલતી સરકારી સેવા કોઈની વ્યક્તિગત સેવા બની શકે નહીં.
બચુભાઈ ખાબડનો રાજકીય વિવાદો સાથે જૂનો નાતો
બચુભાઈ ખાબડ દેવગઢ બારિયા વિધાનસભા બેઠકનું પ્રતિનિધિત્વ કરે છે અને દાહોદ જિલ્લાના ભાજપના અગ્રણી નેતાઓમાં ગણાય છે. અગાઉ મનરેગા સંબંધિત કૌભાંડના કેસમાં તેમના પુત્રો જેલમાં ગયા બાદ બચુભાઈ ખાબડને મંત્રી પદ ગુમાવવું પડ્યું હતું.
હવે બંગલાની સફાઈ માટે ફાયર બ્રિગેડના કથિત ઉપયોગનો વીડિયો સામે આવતા તેમના માટે વધુ એક વિવાદ ઊભો થયો છે. આ મામલે કોંગ્રેસે સરકાર પાસે જવાબ માંગ્યો છે અને સરકારી સંસાધનોના ઉપયોગ અંગે પારદર્શક તપાસની માગ કરી છે.