કોવિડ નેગેટિવ દર્દીને કોવિડ પેકેજનું બિલ! Surat consumer courtએ હોસ્પિટલને ₹1.64 લાખ પરત કરવાનો આદેશ

Surat News: સુરતમાંથી એક મહત્વપૂર્ણ કેસ સામે આવ્યો છે, જેમાં કોવિડ-19 નેગેટિવ હોવા છતાં એક દર્દીને કોવિડ દર્દી ગણાવીને સારવારનું બિલ વસૂલવામાં આવ્યું હતું. વર્ષો સુધી ચાલેલી કાનૂની લડત બાદ સુરત જિલ્લા ગ્રાહક તકરાર નિવારણ પંચે દર્દીના પક્ષમાં ચુકાદો આપતાં હોસ્પિટલને ₹1.64 લાખની રકમ 8 ટકા વાર્ષિક વ્યાજ સાથે પરત કરવાનો આદેશ કર્યો છે.

મળતી માહિતી મુજબ, સુરતના સિટી લાઇટ વિસ્તારના રહેવાસી બ્રહ્મા કુમાર ગર્ગે જુલાઈ 2021માં DWTI પ્રભુ જનરલ હોસ્પિટલ, બેંકર્સ હાર્ટ ઇન્સ્ટિટ્યૂટ અને સંબંધિત પક્ષો સામે ફરિયાદ નોંધાવી હતી. ફરિયાદમાં તેમણે જણાવ્યું હતું કે જુલાઈ 2020માં અસ્વસ્થતા અનુભવાતા તેમને હોસ્પિટલમાં દાખલ કરવામાં આવ્યા હતા. તેમનો કોવિડ-19 ટેસ્ટ રિપોર્ટ નેગેટિવ આવ્યો હોવા છતાં હોસ્પિટલ દ્વારા કોવિડ પેકેજ હેઠળ સારવાર અને બિલિંગ કરવામાં આવ્યું હતું.

સારવારનો કુલ ખર્ચ ₹3.71 લાખ થયો હતો, જેમાંથી વીમા કંપનીએ ₹1.78 લાખ ચૂકવ્યા હતા, પરંતુ બાકીની ₹1.64 લાખની રકમનો દાવો ફગાવી દેવામાં આવ્યો હતો. ત્યારબાદ ગર્ગે હોસ્પિટલ સામે ખોટું બિલિંગ અને સેવામાં બેદરકારીનો આક્ષેપ કરી ગ્રાહક અદાલતનો દરવાજો ખખડાવ્યો હતો.

સુનાવણી દરમિયાન ગ્રાહક પંચે તબીબી દસ્તાવેજોની તપાસ કરી અને દર્દી કોવિડ સંક્રમિત ન હોવાનું સ્પષ્ટ થયું. પંચે નોંધ્યું કે હોસ્પિટલ નેગેટિવ રિપોર્ટ હોવા છતાં કોવિડ પેકેજ હેઠળ બિલ કેમ બનાવવામાં આવ્યું તેની સંતોષકારક સમજૂતી આપી શકી નહોતી.

ચેરમેન પી.પી. મોખિયા અને સભ્ય ડૉ. તીર્થેશ મહેતાની બેન્ચે પોતાના આદેશમાં જણાવ્યું કે હોસ્પિટલ અને તેના અધિકારીઓ ફરિયાદીને ₹1.64 લાખની રકમ 2021થી 8 ટકા વ્યાજ સાથે 30 દિવસની અંદર ચૂકવે.

ચુકાદા બાદ ફરિયાદીના વકીલ શ્રેયસ દેસાઈએ જણાવ્યું કે હોસ્પિટલને દર્દી કોવિડથી સંક્રમિત ન હોવાનું જાણ હોવા છતાં તેને કોવિડ દર્દી તરીકે ગણાવી સારવાર આપવામાં આવી હતી, તેથી આ નિર્ણય ગ્રાહક હિતમાં મહત્વપૂર્ણ છે.

આ કેસને કોવિડ મહામારી દરમિયાન હોસ્પિટલ બિલિંગ અંગે ઉઠેલા પ્રશ્નો વચ્ચે એક મહત્વપૂર્ણ ચુકાદા તરીકે જોવામાં આવી રહ્યો છે. આ નિર્ણય ગ્રાહકોને સંદેશ આપે છે કે ખોટું બિલિંગ અથવા સેવામાં ખામી સામે કાનૂની માર્ગે ન્યાય મેળવી શકાય છે.