Panchmahal: ગોધરા પોસ્ટ ઓફિસ અને પાસપોર્ટ સેન્ટરને બોમ્બથી ઉડાવી દેવાની ધમકીભર્યો ઇમેઇલ મળતાં ગભરાટ

Panchmahal: પંચમહાલ જિલ્લા મુખ્યાલય ગોધરામાં આજે (૧૦ માર્ચ) ભયનો માહોલ છવાઈ ગયો. ગોધરા મુખ્ય પોસ્ટ ઓફિસ અને તેની સાથે જોડાયેલા પાસપોર્ટ સેવા કેન્દ્રને બોમ્બથી ઉડાવી દેવાની ધમકી મળ્યા બાદ વહીવટીતંત્ર અને પોલીસ વિભાગને એલર્ટ કરવામાં આવ્યું હતું. કોઈ અજાણ્યા વ્યક્તિ દ્વારા મોકલવામાં આવેલા ધમકીભર્યા ઇમેઇલથી સમગ્ર વિસ્તારમાં ભય ફેલાયો હતો.

ઇમેઇલ મળ્યા બાદ ઓફિસમાં ભારે દોડધામ

અહેવાલ મુજબ, ગોધરા પોસ્ટ ઓફિસના સત્તાવાર ઇમેઇલ સરનામાં પર એક ઇમેઇલ મળ્યો હતો, જેમાં તેમને જાણ કરવામાં આવી હતી કે બિલ્ડિંગમાં બોમ્બ વિસ્ફોટ થયો છે. જેના કારણે કર્મચારીઓ જીવ બચાવવા ભાગી ગયા હતા. પોસ્ટ ઓફિસ અને પાસપોર્ટ સંબંધિત કામ માટે પોસ્ટ ઓફિસ આવેલા નાગરિકોમાં પણ ગભરાટ ફેલાયો હતો. ઘટનાની ગંભીરતાને જોતા, ગોધરા બી-ડિવિઝન પોલીસની એક ટીમ તાત્કાલિક ઘટનાસ્થળે પહોંચી ગઈ. પોલીસે સમગ્ર બિલ્ડિંગને ખાલી કરાવીને કોર્ડન કરી લીધું છે. પોલીસે બિલ્ડિંગના દરેક ખૂણાની તપાસ કરી છે અને શંકાસ્પદ વસ્તુઓ શોધી રહી છે.

સુરક્ષા વ્યવસ્થા ગોઠવી દેવામાં આવી છે

પોસ્ટ ઓફિસ અને પાસપોર્ટ સેન્ટરને કામચલાઉ ધોરણે સ્થગિત કરવામાં આવ્યું છે. જોકે અત્યાર સુધી કોઈ શંકાસ્પદ વસ્તુઓ મળી નથી, પોલીસ કોઈ જોખમ લેવા તૈયાર નથી. વરિષ્ઠ પોલીસ અધિકારીઓ પણ ઘટનાસ્થળે હાજર છે અને પરિસ્થિતિ પર નજર રાખી રહ્યા છે.