Waqf bill વિરુદ્ધ બંગાળમાં હિંસક વિરોધ, મુર્શિદાબાદમાં NH હાઇવે બંધ; પોલીસ વાહનો સળગાવી દેવામાં આવ્યા
Waqf bill: ઘટનાસ્થળે સુરક્ષા દળો તૈનાત કરવામાં આવ્યા છે. હાલમાં, આ હિંસક ઘટનામાં કોઈને ગંભીર ઈજા થઈ હોવાના અહેવાલ નથી. વહીવટીતંત્રે કહ્યું છે કે કોઈપણ પ્રકારની હિંસા સહન કરવામાં આવશે નહીં અને કાયદો અને વ્યવસ્થા જાળવવા માટે કડક પગલાં લેવામાં આવશે.
પશ્ચિમ બંગાળના મુર્શિદાબાદ જિલ્લાના રઘુનાથગંજ પોલીસ સ્ટેશન વિસ્તારના ઉમરપુર-બાનીપુર વિસ્તારમાં વકફ સુધારા કાયદાને પાછો ખેંચવાની માંગ સાથે ચાલી રહેલા વિરોધ પ્રદર્શને હિંસક વળાંક લીધો. થોડી જ વારમાં વિરોધીઓએ હિંસાનો આશરો લીધો. પ્રદર્શનકારીઓએ પોલીસ પર પથ્થરમારો કર્યો અને રાષ્ટ્રીય ધોરીમાર્ગ નં. ૧૨ ને બ્લોક કરી દીધો. આ દરમિયાન બે પોલીસ વાહનોને પણ આગ ચાંપી દેવામાં આવી હતી, જેના કારણે વિસ્તારમાં તણાવ ફેલાઈ ગયો હતો.
વિરોધીઓ વક્ફ બિલ સામે પોતાનો વિરોધ વ્યક્ત કરી રહ્યા હતા અને તેને તાત્કાલિક પાછો ખેંચવાની માંગ કરી રહ્યા હતા. જ્યારે પોલીસે સરઘસને રોકવાનો પ્રયાસ કર્યો, ત્યારે ગુસ્સે ભરાયેલા પ્રદર્શનકારીઓએ પોલીસ પર ઇંટો ફેંકી અને રસ્તો સંપૂર્ણપણે બ્લોક કરી દીધો. આ પછી, તેઓએ પોલીસ વાહનોને આગ ચાંપી દીધી, જેના કારણે વિસ્તારમાં ગભરાટનું વાતાવરણ સર્જાયું.
સૂત્રોના જણાવ્યા અનુસાર, રાષ્ટ્રીય ધોરીમાર્ગ 12 હજુ પણ જામ છે અને ટ્રાફિકમાં ભારે વિક્ષેપ પડી રહ્યો છે. પોલીસ અને વહીવટીતંત્ર ઘટનાસ્થળે પહોંચી ગયા અને પરિસ્થિતિને કાબુમાં લેવાનો પ્રયાસ કર્યો, પરંતુ પ્રદર્શનકારીઓનો ગુસ્સો શાંત થવાનું નામ નથી લઈ રહ્યો.