કેન્સર જેવી ગંભીર બીમારીને લઈને Russiaએ મોટો દાવો કર્યો છે. રશિયાએ કહ્યું કે તેણે કેન્સરની રસી બનાવી છે. તમામ દર્દીઓને આ રસી મફતમાં મળશે. રશિયાનો દાવો છે કે આ રસી ગાંઠના વિકાસને રોકી શકે છે. આજે સમગ્ર વિશ્વ કેન્સર જેવી ગંભીર બીમારીથી પરેશાન છે. આવી સ્થિતિમાં રશિયાનો આ દાવો સમગ્ર વિશ્વ માટે રાહતના સમાચાર છે.
Russiaના સ્વાસ્થ્ય મંત્રાલયે કહ્યું કે આ કેન્સર સામેની રસી છે, જે 2025ની શરૂઆતમાં લોન્ચ કરવામાં આવશે. રશિયામાં કેન્સરના દર્દીઓની મફતમાં સારવાર કરવામાં આવશે. રેડિયોલોજી મેડિકલ રિસર્ચ સેન્ટરના જનરલ ડિરેક્ટર એન્ડ્રે કેપ્રિને આ રસી વિશે માહિતી આપી. જો કે હાલમાં તે સ્પષ્ટ નથી કે આ રસી કયા કેન્સરની સારવાર માટે વિકસાવવામાં આવી છે અને તે કેટલી અસરકારક છે.
આ રસીનું નામ હજુ જાહેર થયું નથી. બાકીના વિશ્વની જેમ રશિયામાં પણ કેન્સરની ઘટનાઓ સતત વધી રહી છે. 2022 માં 635,000 થી વધુ કેસ નોંધાયા છે. એવું માનવામાં આવે છે કે કોલોન, સ્તન અને ફેફસાંનું કેન્સર દેશમાં આ રોગનું સૌથી સામાન્ય સ્વરૂપ છે. આ રસી વિશે જણાવવામાં આવ્યું છે કે આ રસી માત્ર ટ્યુમરના વિકાસની ઝડપને જ નહીં પરંતુ તેનું કદ પણ ઘટાડશે.