Russia: રશિયાએ યુક્રેન પર અત્યાર સુધીનો સૌથી મોટો હુમલો કર્યો છે. અહેવાલો અનુસાર, રશિયાએ યુક્રેન પર 367 ડ્રોન અને મિસાઇલો છોડ્યા હતા. આ હુમલાથી યુક્રેનમાં ભારે તબાહી મચી ગઈ છે. યુદ્ધ શરૂ થયા પછી આને સૌથી મોટો હવાઈ હુમલો ગણાવવામાં આવી રહ્યો છે. માહિતી અનુસાર, આ હુમલામાં ઓછામાં ઓછા 13 લોકોના મોત થયા છે, જેમાં ત્રણ બાળકોનો પણ સમાવેશ થાય છે અને ડઝનબંધ લોકો ઘાયલ થયા છે.
યુક્રેને દાવો કર્યો હતો કે તેની વાયુસેનાએ 266 રશિયન ડ્રોન અને 45 મિસાઇલો તોડી પાડી હતી. જોકે, નુકસાન સંપૂર્ણપણે રોકી શકાયું નથી. આ હુમલામાં એપાર્ટમેન્ટ અને ઇમારતોને નુકસાન થયું હતું. રશિયા પણ બેલિસ્ટિક મિસાઇલોથી હુમલો કરી રહ્યું છે.
ઝેલેન્સકીએ કહ્યું કે અમેરિકા અને દુનિયાનું મૌન વ્લાદિમીર પુતિનને પ્રોત્સાહન આપી રહ્યું છે. રશિયા યુક્રેન પર આતંકવાદી હુમલા કરી રહ્યું છે. શું આટલું તેના પર પ્રતિબંધ મૂકવા માટે પૂરતું નથી? તેમણે કહ્યું કે દબાણ વિના કંઈ બદલાવાનું નથી. દબાણ નહીં આવે ત્યાં સુધી રશિયા અને તેના સાથીઓ પશ્ચિમી દેશોમાં વિનાશ સર્જતા રહેશે.