યુક્રેન યુદ્ધ વચ્ચે પીએમ મોદી જુલાઈમાં પ્રથમ વખત રશિયા જશે, રાષ્ટ્રપતિ પુતિન સાથે મુલાકાત કરશે

વડાપ્રધાન નરેન્દ્ર મોદી જુલાઈમાં રશિયાની મુલાકાત લઈ શકે છે. જો કે વિદેશ મંત્રાલયે આ અંગે કંઈ કહ્યું નથી. પરંતુ બંને દેશોમાં પીએમની મુલાકાતની તૈયારીઓ જોરશોરથી ચાલી રહી છે. રશિયા-યુક્રેન યુદ્ધ શરૂ થયા બાદ વડાપ્રધાન મોદીની રશિયાની આ પ્રથમ મુલાકાત હશે. વડાપ્રધાન મોદીની રશિયાની મુલાકાત વર્ષ 2022માં થવાની હતી. પરંતુ તે મોકૂફ રાખવામાં આવી હતી. આ મુલાકાતને લઈને ક્રેમલિને માર્ચમાં કહ્યું હતું કે વડાપ્રધાન મોદીને રશિયાની મુલાકાત લેવાનું આમંત્રણ મળ્યું છે.

જો અહેવાલોનું માનીએ તો પીએમ મોદી 8 જુલાઈના રોજ મોસ્કોની એક દિવસીય મુલાકાતે જશે, પરંતુ આ અંગે કોઈ સત્તાવાર પુષ્ટિ થઈ નથી. મોસ્કોમાં રશિયન રાષ્ટ્રપતિના સહાયક યુરી ઉશાકોવે કહ્યું કે પીએમ મોદીની મુલાકાતની તૈયારીઓ ચાલી રહી છે અને બંને પક્ષો સહમતિ સાથે તારીખની જાહેરાત કરશે. આ મહિનાની શરૂઆતમાં રાષ્ટ્રપતિ પુતિને વડાપ્રધાન મોદી સાથે ફોન પર વાત કરી હતી અને તેમને ત્રીજા કાર્યકાળ માટે અભિનંદન આપ્યા હતા. ક્રેમલિન દ્વારા જારી કરવામાં આવેલા એક નિવેદનમાં કહેવામાં આવ્યું છે કે, વ્લાદિમીર પુતિને તાજેતરમાં યોજાયેલી 18મી લોકસભા ચૂંટણીમાં ભારતીય જનતા પાર્ટીની સફળતા માટે નરેન્દ્ર મોદીને હૃદયપૂર્વક અભિનંદન પાઠવ્યા હતા.

સપ્ટેમ્બર 2019 માં રશિયાની મુલાકાત લીધી
પીએમ મોદી અગાઉ સપ્ટેમ્બર 2019માં રશિયા ગયા હતા. પુતિન છેલ્લે વર્ષ 2021માં વાર્ષિક ભારત-રશિયા સમિટ માટે ભારત આવ્યા હતા. આ સિવાય મોદી અને પુતિનની છેલ્લી મુલાકાત 16 સપ્ટેમ્બર, 2022ના રોજ ઉઝબેકિસ્તાનના સમરકંદમાં શાંઘાઈ કોઓપરેશન ઓર્ગેનાઈઝેશન (SCO) સમિટ દરમિયાન થઈ હતી, જ્યારે તેમણે પુતિન સાથે યુક્રેન વિવાદના ઉકેલ માટે વાત કરી હતી.

આ ઉપરાંત, રશિયા આ વર્ષે બ્રિક્સની અધ્યક્ષતા કરી રહ્યું છે અને ઓક્ટોબરમાં કાઝાનમાં બ્રિક્સ સમિટનું આયોજન કરવાનું છે, જેમાં વડા પ્રધાન મોદી હાજરી આપે તેવી અપેક્ષા છે, કારણ કે ભારત જૂથનો મુખ્ય સભ્ય છે. ભારત અને રશિયાની મિત્રતા ઘણી જૂની છે. આજે પણ ભારત તેના મોટા ભાગના શસ્ત્રો રશિયા પાસેથી ખરીદે છે.