Delhi: ભાજપના દિગ્ગજ નેતા અને પૂર્વ નાયબ વડાપ્રધાન લાલકૃષ્ણ અડવાણીની તબિયત સ્થિર છે. હોસ્પિટલમાંથી રજા મળ્યા બાદ લાલકૃષ્ણ અડવાણી તેમના નિવાસસ્થાને સ્વસ્થ થઈ રહ્યા છે. લાલકૃષ્ણ અડવાણીને બુધવારે રાત્રે 9 વાગ્યે દિલ્હીની એપોલો હોસ્પિટલમાં દાખલ કરવામાં આવ્યા હતા. સારવાર બાદ હોસ્પિટલે હેલ્થ બુલેટિન જારી કરીને જણાવ્યું હતું કે તેમની તબિયત સ્થિર છે. જે બાદ તેમને ગુરુવારે હોસ્પિટલમાંથી રજા આપવામાં આવી હતી.
આ પહેલા 26 જૂનના રોજ લાલકૃષ્ણ અડવાણીને દિલ્હીની AIIMSમાં દાખલ કરવામાં આવ્યા હતા. તેમને ન્યુરોલોજી વિભાગના નિરીક્ષણ હેઠળ રાખવામાં આવ્યા હતા. આ દરમિયાન તેમના પર ઓપરેશન પણ કરવામાં આવ્યું હતું. ઓપરેશન બાદ લાલકૃષ્ણ અડવાણીને હોસ્પિટલમાંથી રજા આપવામાં આવી હતી.
અડવાણી લાંબા સમયથી બીમાર હતા
ભાજપના 96 વર્ષના વરિષ્ઠ નેતા લાલકૃષ્ણ અડવાણી છેલ્લા કેટલાક સમયથી સ્વાસ્થ્ય સંબંધિત સમસ્યાઓથી ઝઝૂમી રહ્યા છે. આ જ કારણ છે કે આ દિવસોમાં તેઓ પોતાના ઘરે જ રહે છે અને કોઈ પણ જાહેર કાર્યક્રમમાં હાજરી આપતા નથી. અડવાણીને આ વર્ષે દેશના સર્વોચ્ચ સન્માન ભારત રત્નથી પણ નવાજવામાં આવ્યા હતા. પરંતુ સ્વાસ્થ્યના કારણોસર તેઓ રાષ્ટ્રપતિ ભવન ખાતેના કાર્યક્રમમાં હાજર રહી શક્યા ન હતા.
નિવાસસ્થાને જ ભારત રત્ન આપવામાં આવ્યો
રાષ્ટ્રપતિ ભવનમાં સન્માન સમારોહમાં તેઓ હાજરી આપી શક્યા ન હોવાથી, રાષ્ટ્રપતિ દ્રૌપદી મુર્મુએ 30 માર્ચે તેમના નિવાસસ્થાનની મુલાકાત લીધી અને તેમને ભારત રત્નથી સન્માનિત કર્યા. આ દરમિયાન વડા પ્રધાન નરેન્દ્ર મોદી, ઉપરાષ્ટ્રપતિ જગદીપ ધનખર, કેન્દ્રીય ગૃહ પ્રધાન અમિત શાહ અને કેન્દ્રીય સંરક્ષણ પ્રધાન રાજનાથ સિંહ પણ તેમના નિવાસસ્થાને હાજર હતા.
પૂર્વ ડેપ્યુટી પીએમ લાલકૃષ્ણ અડવાણીને પણ વર્ષ 2015માં પદ્મ વિભૂષણ એવોર્ડ આપવામાં આવ્યો હતો. પૂર્વ વડાપ્રધાન અટલ બિહારી વાજપેયીના કાર્યકાળ દરમિયાન તેઓ 2002 થી 2004 સુધી દેશના નાયબ વડાપ્રધાન પદ પણ સંભાળી ચુક્યા છે. લાલકૃષ્ણ અડવાણી દેશના ગૃહમંત્રી પણ રહી ચૂક્યા છે. તેઓ 90ના દાયકામાં અયોધ્યા રામમંદિર આંદોલનના અગ્રણી નેતા હતા. તેમણે રામ મંદિરનો સંદેશ જનતા સુધી પહોંચાડવા માટે રથયાત્રા કાઢી.