Israel Hamas War : ઇઝરાયેલ અને હમાસ વચ્ચે યુદ્ધ ચાલુ છે. ઈઝરાયેલે ફરી એકવાર ગાઝામાં હમાસના એક આતંકવાદી પર હુમલો કરીને તેને મારી નાખ્યો છે. ઈઝરાયેલના આ હુમલામાં મહિલાઓ અને બાળકોના પણ મોત થયા છે.
ઈઝરાયેલ દ્વારા ગાઝા પર સતત બોમ્બમારો કરવામાં આવી રહ્યો છે. ગાઝા પટ્ટી પર ઈઝરાયેલ દ્વારા કરવામાં આવેલા તાજેતરના હુમલામાં ત્રણ બાળકો અને હમાસ સંચાલિત પોલીસ દળના બે અધિકારીઓ સહિત 10 લોકો માર્યા ગયા છે. પેલેસ્ટાઈનના અધિકારીઓએ આ અંગે માહિતી આપી છે. આ હુમલો ગુરુવારે ઇઝરાયેલ દ્વારા જાહેર કરાયેલ માનવતાવાદી ઝોન મુવાસીમાં થયો હતો.
શું કહ્યું ઈઝરાયેલની સેનાએ?
હુમલા અંગે ઈઝરાયેલે કહ્યું છે કે તેણે ગુપ્ત માહિતી આધારિત હુમલામાં દક્ષિણ ગાઝામાં હમાસના આંતરિક સુરક્ષા દળોના વડા આતંકવાદી હોસમ શાહવાનને મારી નાખ્યો છે. શાહવાન ગાઝામાં IDF પર હુમલામાં હમાસની લશ્કરી પાંખના તત્વોને મદદ કરવા માટે જવાબદાર હતો.
પેલેસ્ટિનિયન અધિકારીઓએ શું કહ્યું
પેલેસ્ટિનિયન અધિકારીઓએ જણાવ્યું કે મૃતકોમાં ગાઝા પોલીસ ડાયરેક્ટર જનરલ મેજર જનરલ મહમૂદ સલાહ અને તેમના ડેપ્યુટી બ્રિગેડિયર જનરલ હોસમ શાહવાનનો સમાવેશ થાય છે. ગાઝામાં હમાસ સંચાલિત સરકારમાં હજારો પોલીસકર્મીઓનો સમાવેશ થાય છે જેમણે યુદ્ધ શરૂ થાય તે પહેલા જાહેર વ્યવસ્થા જાળવી રાખી હતી. હવે, ઇઝરાયેલ દ્વારા નિશાન બનાવવામાં આવ્યા બાદ, પોલીસ ઘણા વિસ્તારોમાંથી મોટાભાગે શેરીઓમાંથી ગાયબ થઈ ગઈ છે, જેના કારણે કાયદો અને વ્યવસ્થાની સ્થિતિ કથળી ગઈ છે.
આ યુદ્ધ ત્યારે શરૂ થયું જ્યારે હમાસના આતંકવાદીઓએ 7 ઓક્ટોબર, 2023 ના રોજ ઇઝરાયેલ પર હુમલો કર્યો, જેમાં 1200 લોકો માર્યા ગયા અને લગભગ 250 લોકોનું અપહરણ કર્યું. લગભગ 100 લોકો હજુ પણ હમાસ દ્વારા બંધક છે. સ્થાનિક આરોગ્ય અધિકારીઓના જણાવ્યા અનુસાર, ઇઝરાયેલના હવાઈ અને જમીની હુમલામાં 45 હજારથી વધુ પેલેસ્ટિનિયન માર્યા ગયા છે. મંત્રાલયનું કહેવું છે કે માર્યા ગયેલા લોકોમાં અડધાથી વધુ મહિલાઓ અને બાળકો છે. જોકે અધિકારીઓએ એ જણાવ્યું નથી કે માર્યા ગયેલા લોકોમાંથી કેટલા નાગરિકો હતા અને કેટલા લડવૈયા હતા.