India: અમે અમારી ધરતી પરથી અન્ય દેશો વિરુદ્ધ પ્રવૃત્તિઓને મંજૂરી આપતા નથી’, યુનુસ સરકારના આરોપો પર ભારત
India: ભારતીય વિદેશ મંત્રાલયે બુધવારે બાંગ્લાદેશની વચગાળાની સરકારના દાવાને નકારી કાઢ્યો હતો, જેમાં આરોપ મૂકવામાં આવ્યો હતો કે આવામી લીગ ભારતમાં ‘રાજકીય કાર્યાલયો’ ચલાવી રહી છે. મંત્રાલયે કહ્યું કે નવી દિલ્હી તેની ધરતી પરથી અન્ય દેશો વિરુદ્ધ રાજકીય પ્રવૃત્તિઓને મંજૂરી આપતું નથી. બાંગ્લાદેશની વચગાળાની સરકારનું પ્રેસ સ્ટેટમેન્ટ ખોટું છે.
વિદેશ મંત્રાલયના પ્રવક્તા રણધીર જયસ્વાલે બુધવારે સ્પષ્ટતા કરી હતી કે સરકારને ભારતમાં આવામી લીગના સભ્યો દ્વારા કોઈપણ બાંગ્લાદેશ વિરોધી પ્રવૃત્તિ અથવા ભારતીય કાયદાના ઉલ્લંઘન વિશે કોઈ માહિતી નથી. ભારત તેના પ્રદેશમાંથી કોઈપણ દેશ વિરુદ્ધ રાજકીય પ્રવૃત્તિઓને મંજૂરી આપતું નથી. તેમણે બાંગ્લાદેશની વચગાળાની સરકારના પ્રેસ સ્ટેટમેન્ટને ખોટું ગણાવીને ફગાવી દીધું. પ્રવક્તાએ એ પણ પુનરોચ્ચાર કર્યો કે ભારત બાંગ્લાદેશમાં શક્ય તેટલી વહેલી તકે મુક્ત, ન્યાયી અને સમાવિષ્ટ ચૂંટણીઓ યોજવાની અપેક્ષા રાખે છે, જેથી ત્યાંના લોકોની ઇચ્છા અને આદેશ જાણી શકાય.
બાંગ્લાદેશે આ આરોપો લગાવ્યા હતા
બાંગ્લાદેશની વચગાળાની સરકારે ભૂતપૂર્વ વડા પ્રધાન શેખ હસીનાના પક્ષ અવામી લીગ વિશે કહ્યું હતું કે બાંગ્લાદેશની ભૂતપૂર્વ શાસક પાર્ટીએ ભારતની રાજધાની દિલ્હી અને કોલકાતામાં પોતાની ઓફિસો ખોલી છે. તેને બાંગ્લાદેશ વિરોધી પ્રવૃત્તિઓનો ભાગ ગણાવતા, તેમણે ભારત પાસેથી તાત્કાલિક કાર્યવાહીની માંગ કરી હતી.
બાંગ્લાદેશના વિદેશ મંત્રાલયે એક સત્તાવાર પત્ર જારી કરીને કહ્યું હતું કે માનવતા વિરુદ્ધના ગુનાઓના આરોપમાં અવામી લીગના ઘણા વરિષ્ઠ નેતાઓ બાંગ્લાદેશમાં વોન્ટેડ છે અને તેમણે ભારતમાં આશરો લીધો છે. પત્રમાં એવો પણ દાવો કરવામાં આવ્યો હતો કે 21 જુલાઈના રોજ, અવામી લીગના નેતાઓએ દિલ્હીના પ્રેસ ક્લબ ખાતે એક NGOના નામે એક કાર્યક્રમનું આયોજન કર્યું હતું અને પત્રકારોમાં પુસ્તિકાઓનું વિતરણ કર્યું હતું.
પત્રમાં એમ પણ કહેવામાં આવ્યું હતું કે આ ઘટના ભારત સાથે પરસ્પર વિશ્વાસ અને આદરથી પ્રેરિત સારા પડોશી સંબંધોને પણ જોખમમાં મૂકે છે, અને બાંગ્લાદેશમાં ચાલી રહેલા રાજકીય પરિવર્તન માટે ગંભીર પરિણામો પેદા કરી રહી છે. આ બાંગ્લાદેશમાં જાહેર લાગણીઓને પણ ભડકાવી શકે છે, જે બંને પડોશીઓ વચ્ચેના સંબંધોને વધુ મજબૂત બનાવવાના બંને દેશોના ચાલી રહેલા પ્રયાસોને અસર કરી શકે છે. તેથી, ભારતીય ભૂમિ પર પ્રતિબંધિત બાંગ્લાદેશ અવામી લીગના રાજકીય ઓફિસો તાત્કાલિક બંધ કરવા જોઈએ.
અવામી લીગે વચગાળાની સરકાર પર નિશાન સાધ્યું
અવામી લીગે બાંગ્લાદેશ સરકારના દાવાને ફગાવી દીધો અને તેને યુનુસ સરકારના દુર્ભાવનાપૂર્ણ પ્રચારનો એક ભાગ ગણાવ્યો. પાર્ટીએ પોતાના નિવેદનમાં કહ્યું કે કોલકાતામાં કાર્યાલય ખોલવાના અહેવાલો પાયાવિહોણા છે અને યુનુસ વહીવટીતંત્ર દ્વારા ફેલાવવામાં આવેલી અફવાઓ છે. અવામી લીગે એવો પણ આરોપ લગાવ્યો કે યુનુસ સરકાર દેશમાં લોકશાહી સંસ્થાઓને નબળી બનાવી રહી છે.