ભારતે United Nations માં પાકિસ્તાન પર પ્રહારો કર્યા, તેને આતંકવાદનું વૈશ્વિક કેન્દ્ર ગણાવ્યું

United Nations : ભારતે સંયુક્ત રાષ્ટ્ર સુરક્ષા પરિષદને જણાવ્યું હતું કે તે પાકિસ્તાન પ્રાયોજિત આતંકવાદનો ભોગ બન્યું છે. સંયુક્ત રાષ્ટ્રમાં ભારતના કાયમી પ્રતિનિધિ પર્વતાનેની હરીશે પાકિસ્તાનને આતંકવાદનું વૈશ્વિક કેન્દ્ર ગણાવ્યું છે.

સંયુક્ત રાષ્ટ્ર સુરક્ષા પરિષદ (UNSC) ની બેઠકમાં સંયુક્ત રાષ્ટ્રમાં ભારતના રાજદૂતે પાકિસ્તાનને કડક શબ્દોમાં ઠપકો આપ્યો છે. ભારતે કહ્યું કે ભારત જૈશ-એ-મોહમ્મદ જેવા સંગઠનો દ્વારા પાકિસ્તાનના આતંકવાદી કૃત્યોનો ભોગ બન્યું છે. ભારતીય રાજદૂતે કહ્યું કે, આ એક મોટી વિડંબના છે કે આતંકવાદનું વૈશ્વિક કેન્દ્ર આ ખતરા સામે લડવાનો દાવો કરીને પોતાની પીઠ થપથપાવે છે.

‘પાકિસ્તાન આતંકવાદનું કેન્દ્ર છે’
ચીનની અધ્યક્ષતામાં થયેલી આ બેઠકમાં પાકિસ્તાનના નાયબ વડા પ્રધાન અને વિદેશ પ્રધાન મોહમ્મદ ઇશાક ડારે જમ્મુ અને કાશ્મીર પર ટિપ્પણી કરી હતી. આ પછી, સંયુક્ત રાષ્ટ્રમાં ભારતના કાયમી પ્રતિનિધિ, રાજદૂત પર્વતાનેની હરીશે, દેશનું વલણ કડક શબ્દોમાં સ્પષ્ટ કર્યું. હરીશે કહ્યું, “પાકિસ્તાન આતંકવાદનું વૈશ્વિક કેન્દ્ર છે, જે 20 થી વધુ યુએન-લિસ્ટેડ આતંકવાદી સંગઠનોને આશ્રય આપે છે અને સરહદ પાર આતંકવાદને સમર્થન પૂરું પાડે છે.”

ભારત આતંકવાદનો ભોગ બન્યું છે
હરીશે કહ્યું, “આતંકવાદ સામેની લડાઈમાં મોખરે હોવા બદલ પાકિસ્તાન પોતાની પીઠ થપથપાવે છે તે એક મોટી વિડંબના છે. ભારત આ દેશ દ્વારા જૈશ-એ-મોહમ્મદ અને હરકત-ઉલ-મુજાહિદ્દીન જેવા આતંકવાદી સંગઠનો દ્વારા કરવામાં આવતા આતંકવાદી કૃત્યોનો ભોગ બન્યું છે.

‘જમ્મુ કાશ્મીર ભારતનો અભિન્ન ભાગ છે’
હરીશે ભારપૂર્વક જણાવ્યું હતું કે આતંકવાદ, તેનું સ્વરૂપ, પ્રકાર અને હેતુ ગમે તે હોય, તેને વાજબી ઠેરવી શકાય નહીં. તેમણે કહ્યું, “કોઈ પણ રાજકીય ફરિયાદ નિર્દોષ નાગરિકો સામે આતંકવાદને યોગ્ય ઠેરવી શકે નહીં. આ સંગઠન સારા અને ખરાબ આતંકવાદીઓ વચ્ચે કોઈ ભેદ કરી શકતું નથી,” તેમણે કહ્યું, ડારે આ તરફ ધ્યાન આપવું જોઈએ અને કાઉન્સિલનો સમય બગાડવો જોઈએ નહીં. તેમણે કહ્યું કે જમ્મુ અને કાશ્મીર હંમેશા ભારતનો અભિન્ન અને અવિભાજ્ય ભાગ રહ્યો છે, છે અને રહેશે. હકીકતમાં, તે પાકિસ્તાન છે જેણે “જમ્મુ અને કાશ્મીરના કેટલાક ભાગો પર ગેરકાયદેસર રીતે કબજો કર્યો છે”.