Hamas: ગાઝા યુદ્ધમાં ઈઝરાયેલને મોટી સફળતા મળી છે. 7 ઓક્ટોબરે થયેલા હુમલાના માસ્ટરમાઈન્ડ યાહ્યા સિનવાર માર્યો ગયો છે. ડીએનએ ટેસ્ટિંગ દ્વારા આ વાત સામે આવી છે.
ઇઝરાયલે હમાસના વડા યાહ્યા સિનવારને હટાવી દીધા છે. IDF અનુસાર, ગાઝામાં ઈઝરાયેલના હુમલામાં 3 હમાસ આતંકવાદીઓ માર્યા ગયા છે. યાહ્યા સિનવાર પણ તેમાં સામેલ છે. ડીએનએ પરીક્ષણ દ્વારા આની પુષ્ટિ થઈ છે. સિનવાર 7 ઓક્ટોબરે ઈઝરાયેલ પર થયેલા આતંકવાદી હુમલાનો માસ્ટરમાઈન્ડ અને હમાસનો વડા હતો.
અગાઉ IDFએ એક નિવેદન જારી કરીને કહ્યું હતું કે, ગાઝામાં 3 આતંકવાદીઓ માર્યા ગયા છે, તસવીરો જોઈને એવું માનવામાં આવે છે કે તેમાંથી એક યાહ્યા સિનવાર હોઈ શકે છે. ઈઝરાયેલની સેના એ ઓળખવાનો પ્રયાસ કરી રહી છે કે હુમલામાં માર્યો ગયેલો આતંકવાદી સિનવાર છે કે અન્ય કોઈ છે, જો કે ઈઝરાયેલ મીડિયા દાવો કરી રહ્યું છે કે તસવીરોના આધારે સિનવાર માર્યો ગયો છે.
સિનવારને ઓગસ્ટમાં હમાસના વડા બનાવવામાં આવ્યા હતા
સિનવારને ઓગસ્ટમાં જ હમાસના વડા બનાવવામાં આવ્યા હતા, 31 જુલાઈએ તેહરાનમાં ઈસ્માઈલ હાનિયાના મૃત્યુ બાદ યાહ્યા સિનવારને હમાસની કમાન સોંપવામાં આવી હતી. ગુરુવારે, ઇઝરાયેલી સેનાએ સોશિયલ મીડિયા પ્લેટફોર્મ X પર પોસ્ટ કર્યું કે યાહ્યા સિનવાર ગાઝામાં IDF ઓપરેશન દરમિયાન માર્યા ગયેલા ત્રણ આતંકવાદીઓમાંથી એક હોઈ શકે છે.
થોડા દિવસો પહેલા સિનવાર વિશે દાવો કરવામાં આવ્યો હતો કે તે ઇઝરાયલી બંધકોની વચ્ચે છુપાયેલો છે, જેથી ઇઝરાયેલ તેને સરળતાથી નિશાન બનાવી શકે નહીં, જ્યારે અગાઉ પણ સિનવાર માર્યા ગયાના સમાચાર આવ્યા હતા પરંતુ ઇઝરાયલી સેના તેની પુષ્ટિ કરી શકી ન હતી. હવે સોશિયલ મીડિયા પર દેખાઈ રહેલી તસવીરોમાં સિનવર જેવો દેખાતો વ્યક્તિ કેટલાક કાટમાળમાં ફસાયેલો જોવા મળે છે. ઈઝરાયેલના હુમલામાં તેના માથાના ભાગને નુકસાન થયું હતું.
3 મહિનામાં 3 મોટા દુશ્મનોને માર્યા!
તમને જણાવી દઈએ કે ગયા વર્ષે 7 ઓક્ટોબરે હમાસે દક્ષિણી ઈઝરાયેલ પર મોટો હુમલો કર્યો હતો, જેમાં લગભગ 1200 ઈઝરાયેલના લોકો માર્યા ગયા હતા. ઈઝરાયલના જણાવ્યા પ્રમાણે હમાસના આ સમગ્ર હુમલાનો મુખ્ય સૂત્રધાર સિનવાર હતો. તેની હત્યા ઇઝરાયેલ માટે એક મોટી જીત છે.