‘જાઓ અને માફી માંગી લો…’, કર્નલ સોફિયા વિશે વિવાદાસ્પદ નિવેદન આપનારા મંત્રી વિજય શાહ પર CJI ગવઈ ગુસ્સે

CJI: ભારતીય સેનાના કર્નલ સોફિયા કુરેશી વિરુદ્ધ વિવાદાસ્પદ ટિપ્પણી કરવા બદલ સુપ્રીમ કોર્ટે મધ્યપ્રદેશના મંત્રી વિજય શાહને ફટકાર લગાવી છે. ગુરુવારે નવા મુખ્ય ન્યાયાધીશ ભૂષણ રામકૃષ્ણ ગવઈએ તેમને કહ્યું કે તેમણે સંવેદનશીલતા બતાવવી જોઈએ અને મધ્યપ્રદેશ હાઈકોર્ટમાં જઈને માફી માંગવી જોઈએ.

CJI એ કહ્યું કે બંધારણીય પદ સંભાળનાર વ્યક્તિ આવું નિવેદન કેવી રીતે આપી શકે? કોર્ટે વિજય શાહ સામે નોંધાયેલા FIRના કેસમાં હસ્તક્ષેપ કરવાનો પણ ઇનકાર કર્યો હતો અને FIR પર સ્ટે મૂકવાનો સ્પષ્ટ ઇનકાર કર્યો હતો. CJI એ કહ્યું કે અમે જાણીએ છીએ કે ફક્ત તમે મંત્રી છો એટલે કંઈ થશે નહીં, પરંતુ આ પદ પર હોવાથી તમારે જવાબદારીપૂર્વક નિવેદનો આપવા જોઈએ.
બાર અને બેન્ચના અહેવાલ મુજબ, વિજય શાહ વતી એડવોકેટ વિભા દત્તા માખીજાએ દલીલ કરી હતી અને કહ્યું હતું કે, ‘અરજદારે પોતાની ભૂલ સ્વીકારી છે અને તેમના નિવેદનનું ખોટું અર્થઘટન કરવામાં આવ્યું છે.’ મીડિયાએ તેને ખૂબ જ અતિશયોક્તિપૂર્ણ રીતે રજૂ કર્યું. અમે FIR પર સ્ટે મૂકવાની અપીલ કરીએ છીએ. જોકે, કોર્ટે FIR પર સ્ટે આપવાનો સ્પષ્ટ ઇનકાર કર્યો હતો અને કહ્યું હતું કે આ માટે હાઇકોર્ટમાં જાઓ અને માફી પણ માંગો.

મધ્યપ્રદેશ હાઈકોર્ટે આ મામલાની સુઓમોટો નોંધ લીધી અને ડીજીપીને ચાર કલાકમાં વિજય શાહ વિરુદ્ધ એફઆઈઆર નોંધવાનો નિર્દેશ આપ્યો. કોર્ટના આદેશ પર બુધવારે સાંજે વિજય શાહ વિરુદ્ધ FIR દાખલ કરવામાં આવી હતી, જેને વિજય શાહે સુપ્રીમ કોર્ટમાં પડકાર્યો હતો. જોકે, કોર્ટે FIR અંગે હસ્તક્ષેપ કરવાનો ઇનકાર કરી દીધો છે.

સીજેઆઈએ વિજય શાહને ઠપકો આપતા કહ્યું કે તેઓ બંધારણીય પદ પર છે, તેમણે જવાબદારીપૂર્વક કંઈક કહેવું જોઈએ. તેમણે કહ્યું, ‘જ્યારે દેશ આવી પરિસ્થિતિમાંથી પસાર થઈ રહ્યો હોય, ત્યારે તમારે જાણવું જોઈએ કે તમે શું કહી રહ્યા છો. ફક્ત એટલા માટે કે તમે મંત્રી છો…’ સીજેઆઈ ગવઈએ કહ્યું કે આ મામલાની સુનાવણી શુક્રવારે થશે. તેમણે કહ્યું કે વિજય શાહ જાણે છે કે તે કોણ છે. અમને ખબર છે કે કંઈ થશે નહીં, ફક્ત એટલા માટે કે તે મંત્રી છે.