જમ્મુ-કાશ્મીરમાં ચાર દિવસમાં ચાર આતંકી હુમલા થયા છે. આતંકીઓએ રિયાસી, કઠુઆ અને ડોડા જિલ્લામાં ચાર સ્થળોએ હુમલો કર્યો હતો. જેમાં નવ તીર્થયાત્રીઓ અને એક CRPF જવાનનું મોત થયું હતું. ખીણમાં આતંકવાદીઓને ખતમ કરવા ગૃહમંત્રી અમિત શાહે આજે જમ્મુ-કાશ્મીરમાં ઉચ્ચ સ્તરીય બેઠક બોલાવી છે. આ બેઠકમાં રાષ્ટ્રીય સુરક્ષા સલાહકાર અજીત ડોભાલ, RAW ચીફ અને આર્મી ચીફ મનોજ પાંડે પણ હાજરી આપશે. શાહ રવિવારે ઘાટીમાં સુરક્ષાની સ્થિતિની પણ સમીક્ષા કરશે. ગૃહમંત્રી ગૃહમંત્રી 29 જૂનથી શરૂ થનારી અમરનાથ યાત્રાની તૈયારીઓની પણ સમીક્ષા કરશે. સૂત્રોએ જણાવ્યું કે, ગૃહમંત્રી જમ્મુ-કાશ્મીરમાં આતંકવાદ વિરોધી અભિયાનને વધુ તીવ્ર બનાવવા અંગે નિર્દેશ આપી શકે છે.
પીએમ મોદીના શપથ ગ્રહણના દિવસે આતંકવાદીઓએ શ્રદ્ધાળુઓથી ભરેલી બસ પર હુમલો કર્યો હતો. જેમાં નવ લોકોના મોત થયા હતા. એટલું જ નહીં છેલ્લા કેટલાક દિવસોમાં જમ્મુ-કાશ્મીરમાં અલગ-અલગ જગ્યાએ ચાર આતંકી હુમલા થયા છે. આવી સ્થિતિમાં ગૃહમંત્રીની આજે જમ્મુ-કાશ્મીરની મુલાકાત ખૂબ જ મહત્વપૂર્ણ છે. સૂત્રોએ જણાવ્યું છે કે આજે અમિત શાહ જમ્મુ-કાશ્મીરમાં સુરક્ષાની સ્થિતિ, આંતરરાષ્ટ્રીય સરહદ અને નિયંત્રણ રેખા પર સુરક્ષા દળોની તૈનાતી, ઘૂસણખોરી વિરોધી કવાયત, આતંકવાદ વિરોધી કામગીરીની સ્થિતિ અને કેન્દ્રશાસિત પ્રદેશમાં સક્રિય આતંકવાદીઓ વિશે માહિતી લેશે. .
આતંકવાદીઓને ખતમ કરવા માટે ઉચ્ચ સ્તરીય બેઠક
અમિત શાહ દ્વારા બોલાવવામાં આવી રહેલી બેઠકમાં રાષ્ટ્રીય સુરક્ષા સલાહકાર અજીત ડોભાલ, જમ્મુ-કાશ્મીરના લેફ્ટનન્ટ ગવર્નર મનોજ સિંહા, આર્મી ચીફ જનરલ મનોજ પાંડે, આગામી આર્મી ચીફ તરીકે નામાંકિત લેફ્ટનન્ટ જનરલ ઉપેન્દ્ર દ્વિવેદી, કેન્દ્રીય ગૃહ સચિવ અજય ભલ્લા, ઈન્ટેલિજન્સ બ્યુરોના ડાયરેક્ટર ડૉ. તપન ડેકા, સેન્ટ્રલ રિઝર્વ પોલીસ ફોર્સ (CRPF)ના મહાનિર્દેશક અનીશ દયાલ સિંહ, જમ્મુ અને કાશ્મીરના પોલીસ મહાનિર્દેશક આરઆર સ્વેન અને અન્ય ઉચ્ચ સુરક્ષા અધિકારીઓ હાજરી આપે તેવી શક્યતા છે.
ઘાટીમાં ફરી આતંકી હુમલા વધી રહ્યા છે
શાહ વડા પ્રધાનની સૂચનાઓ અનુસાર સુરક્ષા એજન્સીઓ દ્વારા તાત્કાલિક પગલાં લેવા અંગે વ્યાપક માર્ગદર્શિકા આપશે. આતંકવાદીઓએ છેલ્લા ચાર દિવસમાં જમ્મુ અને કાશ્મીરના રિયાસી, કઠુઆ અને ડોડા જિલ્લામાં ચાર સ્થળોએ હુમલો કર્યો, જેમાં નવ તીર્થયાત્રીઓ અને એક CRPF જવાન માર્યા ગયા અને સાત સુરક્ષા કર્મચારીઓ અને અન્ય ઘણા લોકો ઘાયલ થયા.
કઠુઆ જિલ્લામાં સુરક્ષા દળો સાથેની અથડામણમાં બે શંકાસ્પદ પાકિસ્તાની આતંકવાદીઓ પણ માર્યા ગયા હતા અને તેમની પાસેથી મોટા પ્રમાણમાં હથિયારો અને દારૂગોળો મળી આવ્યો હતો. આ ઘટના દક્ષિણ કાશ્મીર હિમાલયમાં અમરનાથ ગુફા મંદિરની વાર્ષિક તીર્થયાત્રા પહેલા બની હતી. આ યાત્રા 29 જૂનથી શરૂ થવાની છે અને 19 ઓગસ્ટ સુધી ચાલશે. તીર્થયાત્રીઓ જમ્મુ અને કાશ્મીરમાં બે માર્ગો દ્વારા અમરનાથની યાત્રા કરે છે – બાલતાલ અને પહેલગામ.
અમરનાથ યાત્રાને લઈને સુરક્ષા
સૂત્રોએ જણાવ્યું કે ગયા વર્ષે 4.28 લાખથી વધુ લોકોએ ગુફા મંદિરની મુલાકાત લીધી હતી અને આ વખતે આ આંકડો પાંચ લાખ સુધી પહોંચી શકે છે. તમામ તીર્થયાત્રીઓને RFID કાર્ડ આપવામાં આવે તેવી શક્યતા છે જેથી તેમનું વાસ્તવિક સ્થાન જાણી શકાય અને તમામને પાંચ લાખ રૂપિયાનું વીમા કવચ આપવામાં આવશે. યાત્રાળુઓ દ્વારા લઈ જવામાં આવતા પ્રત્યેક પ્રાણી માટે રૂ. 50,000નું વીમા કવચ પણ હશે.