Gujarat ATS એ યુપીના લખીમપુરમાં દરોડા પાડ્યા, આતંકવાદી સુહેલ ખાનના ઘરેથી મળ્યો ISISનો ધ્વજ

Gujarat ATS News: ગુજરાત આતંકવાદ વિરોધી ટુકડી (ATS) એ ગુજરાત ISIS મોડ્યુલ કેસના સંદર્ભમાં ઉત્તર પ્રદેશના લખીમપુરમાં દરોડા પાડ્યા હતા. ઉત્તર પ્રદેશ પોલીસ સાથે મળીને હાથ ધરાયેલા આ ઓપરેશનમાં લખીમપુર નિવાસી આતંકવાદી મોહમ્મદ સુહેલ ખાનના ઘરેથી ISISનો ધ્વજ મળી આવ્યો હતો.

ગુજરાત ATS તપાસમાં જાણવા મળ્યું છે કે ધરપકડ કરાયેલા બે આતંકવાદીઓ, મોહમ્મદ સુહેલ ખાન અને આઝાદ સુલેમાન શેખ, જે ઉત્તર પ્રદેશના રહેવાસી છે. તાજેતરમાં કાશ્મીરની મુલાકાતે ગયા હતા. તેઓ શસ્ત્રો અને રસાયણોના ડિલિવરી રૂટનું મૂલ્યાંકન કરવા ગયા હતા.

નોંધનીય છે કે 9 નવેમ્બરના રોજ Gujarat ATS એ કેન્દ્રીય એજન્સીઓ સાથે મળીને ISIS સાથે જોડાયેલા ત્રણ આતંકવાદીઓની ધરપકડ કરી હતી. જેમાં એક MBBS ડૉક્ટરનો પણ સમાવેશ થાય છે.

આ ત્રણ આતંકવાદીઓ ખતરનાક ઝેરનો ઉપયોગ કરીને આતંકવાદી હુમલાની યોજના બનાવી રહ્યા હતા. તેઓએ લખનૌમાં RSS કાર્યાલય, દિલ્હીમાં આઝાદપુર મંડી અને અમદાવાદ પર હુમલા માટે પણ જાસૂસી કરી હતી.

ધરપકડ કરાયેલા સુહેલના પિતાએ કહ્યું, “તેને કોઈ મૈત્રીપૂર્ણ સંબંધો અથવા અન્ય કોઈ માધ્યમથી ફસાવવામાં આવ્યો હતો.” ધરપકડ ત્યારે કરવામાં આવી હતી જ્યારે શંકાસ્પદો હથિયારોની આપ-લે કરવા માટે ભેગા થયા હતા. તેમની પાસેથી પાકિસ્તાનથી મોકલવામાં આવેલા પિસ્તોલ અને કારતૂસ જપ્ત કરવામાં આવ્યા હતા.

એટીએસના જણાવ્યા અનુસાર, શંકાસ્પદો દિલ્હી, લખનૌ અને અમદાવાદ જેવા મોટા શહેરોમાં આતંકવાદી હુમલાઓનું આયોજન કરી રહ્યા હતા અને તેમણે ચોક્કસ સ્થળોની તપાસ કરી હતી. ધરપકડ કરાયેલા યુવાનોમાંથી એક લખીમપુરનો, બીજો શામલીનો અને ત્રીજો હૈદરાબાદનો રહેવાસી છે. હાલમાં, ગુજરાત એટીએસ અને ઉત્તર પ્રદેશ એટીએસ સહિત અનેક એજન્સીઓ આ સમગ્ર નેટવર્કની તપાસ કરી રહી છે.