સુપ્રીમ કોર્ટે ફરી NEET કાઉન્સેલિંગ પ્રક્રિયા રોકવાનો કર્યો ઇનકાર, કોંગ્રેસનું વિરોધ પ્રદર્શન

NEET Scam: સુપ્રીમ કોર્ટે શુક્રવારે (21 જૂન) NEET-UG 2024 કાઉન્સેલિંગ પર પ્રતિબંધ મૂકવાનો ઇનકાર કર્યો છે. કોર્ટે મેડિકલ પ્રવેશ પરીક્ષાનું સંચાલન કરતી સંસ્થા નેશનલ ટેસ્ટિંગ એજન્સી (NTA)ને પણ નોટિસ પાઠવી છે. સુપ્રીમ કોર્ટે NEET પરીક્ષા રદ કરવાની અને બાકીની પેન્ડિંગ પિટિશન સાથે ફરીથી પરીક્ષાની માંગ કરતી નવી અરજીઓ ઉમેરી છે. NEET વિરુદ્ધ દાખલ કરવામાં આવેલી આ તમામ અરજીઓ પર કોર્ટ 8મી જુલાઈએ સુનાવણી કરશે.

જો કે, આ પહેલીવાર નથી જ્યારે સુપ્રીમ કોર્ટે કાઉન્સિલિંગ પર પ્રતિબંધ મૂકવાનો ઇનકાર કર્યો હોય. અગાઉની સુનાવણી દરમિયાન, જ્યારે NEET પરીક્ષા ફરીથી યોજવાની અને નવેસરથી કાઉન્સેલિંગની માંગ કરવામાં આવી હતી, તે સમયે પણ કોર્ટે તેમ કરવાનો ઇનકાર કરી દીધો હતો. કેન્દ્ર સરકાર દ્વારા એવું પણ કહેવામાં આવ્યું હતું કે પાસ થયેલા વિદ્યાર્થીઓ કાઉન્સેલિંગ પર ધ્યાન આપે. મેડિકલ કોર્સમાં પ્રવેશ માટે 6 જુલાઈથી કાઉન્સેલિંગ શરૂ થવા જઈ રહ્યું છે.

કોંગ્રેસનો વિરોધ અંડરગ્રેજ્યુએટ મેડિકલ અભ્યાસક્રમોમાં પ્રવેશ માટે નેશનલ એલિજિબિલિટી કમ એન્ટ્રન્સ ટેસ્ટ (NEET-UG)માં ગોટાળા સામે કોંગ્રેસે લખનૌમાં વિરોધ કર્યો. પાર્ટીના પ્રદેશ અધ્યક્ષ અજય રાયની પોલીસે અટકાયત કરી લીધી છે. અજય રાયના નેતૃત્વમાં અધિકારીઓ અને કાર્યકર્તાઓ પાર્ટી હેડક્વાર્ટરથી કૂચ કરીને વિધાનસભા ભવનનો ઘેરાવ કરવા જઈ રહ્યા હતા. આ દરમિયાન અજય અને અન્ય કોંગ્રેસી કાર્યકરોની પોલીસે અટકાયત કરી છે.

અજય રાયે આરોપ લગાવ્યો હતો કે પરીક્ષામાં ટેકનિકલ ગેરરીતિઓ હતી અને અયોગ્ય માધ્યમોનો ઉપયોગ કરવામાં આવ્યો હતો. ભાજપ શાસિત રાજ્યો ઉત્તર પ્રદેશ, બિહાર, ગુજરાત અને હરિયાણામાં પણ NEET પરીક્ષામાં ગેરરીતિ કરવાના અનેક આરોપીઓની ધરપકડ કરવામાં આવી છે. જેના કારણે સમગ્ર પરીક્ષા આશંકાથી ઘેરાયેલી છે. ભાજપ શાસિત રાજ્યોમાં યુવાનોના ભવિષ્ય સાથે રમત રમાઈ રહી છે. દરરોજ પેપર લીક થવાના બનાવો બની રહ્યા છે.

કોંગ્રેસના કાર્યકરો અને અધિકારીઓએ કાનપુરમાં જિલ્લા મેજિસ્ટ્રેટની ઓફિસની બહાર NEET પરીક્ષામાં ગોટાળાને લઈને વિરોધ પ્રદર્શન કર્યું હતું. આ સાથે ABVP કાર્યકર્તાઓએ જિલ્લા મેજિસ્ટ્રેટની ઓફિસ બહાર કેન્દ્રીય શિક્ષણ મંત્રી ધર્મેન્દ્ર પ્રધાનનું પૂતળું બાળ્યું હતું.