Manish Sisodiya: મનીષ સિસોદિયાની ગયા વર્ષે ધરપકડ કરવામાં આવી હતી, ત્યારબાદ તે ન્યાયિક કસ્ટડીમાં છે. દારૂ નીતિ કેસમાં આમ આદમી પાર્ટીના ઘણા નેતાઓની ધરપકડ કરવામાં આવી છે.
દિલ્હી લિકર પોલિસી કેસમાં જેલમાં બંધ આમ આદમી પાર્ટી (AAP)ના નેતા મનીષ સિસોદિયાને કોર્ટમાંથી રાહત મળી રહી નથી. પહેલા સુપ્રીમ કોર્ટમાં સુનાવણી મોકૂફ રાખવામાં આવી હતી અને હવે રાઉઝ એવન્યુ કોર્ટે સોમવારે (15 જુલાઈ) સિસોદિયાની ન્યાયિક કસ્ટડી 22 જુલાઈ સુધી લંબાવી હતી. દિલ્હીના પૂર્વ ડેપ્યુટી સીએમ સિસોદિયાને વીડિયો કોન્ફરન્સિંગ દ્વારા કોર્ટમાં રજૂ કરવામાં આવ્યા હતા. રાઉઝ એવન્યુ કોર્ટમાં આગામી સુનાવણી 22 જુલાઈએ થશે.
વાસ્તવમાં મનીષ સિસોદિયા દિલ્હી સરકારમાં આબકારી મંત્રી રહી ચૂક્યા છે. ગયા વર્ષે 26 ફેબ્રુઆરીએ સીબીઆઈએ દારૂ નીતિ કેસમાં તેમની ધરપકડ કરી હતી. સિસોદિયાએ 28 ફેબ્રુઆરી 2023ના રોજ તરત જ પોતાના પદ પરથી રાજીનામું આપી દીધું હતું. આ પછી, એન્ફોર્સમેન્ટ ડિરેક્ટોરેટ (ED) એ માર્ચ 2023 માં દારૂ નીતિ મુદ્દાને લગતા મની લોન્ડરિંગ કેસમાં તેની ધરપકડ કરી હતી. આ રીતે હવે સિસોદિયા વિરૂદ્ધ બંને તપાસ એજન્સીઓ ED અને CBI દ્વારા કેસ ચાલી રહ્યા છે.
મનીષ સિસોદિયાને સુપ્રીમ કોર્ટમાંથી પણ રાહત મળી નથી
લિકર પોલિસી કેસમાં જામીન માટે સિસોદિયા ક્યારેક સુપ્રીમ કોર્ટના દરવાજા ખખડાવી રહ્યા છે તો ક્યારેક રાઉઝ એવન્યુ કોર્ટમાં જઈ રહ્યા છે. પરંતુ આમ આદમી પાર્ટીના નેતાને ન તો દેશની ટોચની કોર્ટમાંથી રાહત મળી રહી છે અને ન તો નીચલી કોર્ટમાંથી. મનીષ સિસોદિયાની જામીન અરજી પર ગુરુવારે (11 જુલાઈ) સુપ્રીમ કોર્ટમાં સુનાવણી થવાની હતી. પરંતુ સુનાવણી બેંચમાં રહેલા જસ્ટિસ સંજય કુમારે અંગત કારણોસર આ કેસમાંથી પોતાને અલગ કરી દીધા હતા.
જસ્ટિસ સંજીવ ખન્ના, જસ્ટિસ સંજય કરોલ અને જસ્ટિસ સંજય કુમાર સિસોદિયાની જામીન અરજી પર સુનાવણી કરવાના હતા. બેંચે કહ્યું કે અન્ય બેંચ, જેમાં જસ્ટિસ સંજય કુમાર સભ્ય નથી, તે દારૂ નીતિ મામલે એન્ફોર્સમેન્ટ ડિરેક્ટોરેટ (ED) અને સેન્ટ્રલ બ્યુરો ઑફ ઇન્વેસ્ટિગેશન (CBI) દ્વારા દાખલ કરવામાં આવેલા કેસોમાં મનીષ સિસોદિયાની જામીન અરજી પર સુનાવણી કરશે. . જસ્ટિસ ખન્નાએ કહ્યું કે, અમારા ભાઈને કેટલીક સમસ્યાઓ છે, તેઓ અંગત કારણોસર આ કેસની સુનાવણી કરવા માંગતા નથી.