ધારાસભ્યએ વિધાનસભામાં પાન-મસાલાની પિચકારી મારી, સ્પીકરે કહ્યું : અપમાન ન થાય તે માટે નામ જાહેર કરતો નથી

ઉત્તર પ્રદેશની વિધાનસભામાં એક ધારાસભ્યએ પાનની પિચકારી મારી. આ અંગે અધ્યક્ષને ખબર પડી અને તેમણે જાહેરમાં નામ લીધા વગર આ બાબતની ટકોર કરી અને અપમાન ન થાય તે માટે ધારાસભ્યનું નામ જાહેર ન કરવાની વાત કરી.

મંગળવારે ઉત્તર પ્રદેશ વિધાનસભામાં એક એવી ઘટના બની, જેનાથી ગૃહની ગરિમા અને સ્વચ્છતા પર ગંભીર પ્રશ્નો ઉભા થયા હતા. ગૃહની કાર્યવાહી શરૂ થાય તે પહેલાં, એક ધારાસભ્યએ પાન મસાલો ખાધો અને ગૃહના હોલમાં થૂંક્યા. વિધાનસભા અધ્યક્ષે આ અંગે સખત નારાજગી વ્યક્ત કરી અને તેને અનુશાસનહીનતા ગણાવી. તેમણે સ્પષ્ટ કહ્યું કે ‘મેં વીડિયોમાં જોયું છે કે આ કોણે કર્યું, પરંતુ હું કોઈ સભ્યનું નામ નહીં લઉં’.

આજે કાર્યવાહી શરૂ થતાં જ વિધાનસભા અધ્યક્ષ સતીશ મહાનાએ પણ આ મુદ્દા પર નારાજગી વ્યક્ત કરી હતી. વિધાનસભાના સ્પીકરે ખૂબ જ ગંભીર સ્વરમાં કહ્યું કે ગૃહમાં આવું વર્તન બિલકુલ સ્વીકાર્ય નથી. તેમણે કહ્યું, ‘આજે સવારે મને જાણ કરવામાં આવી કે અમારા એસેમ્બલી હોલના એક માનનીય સભ્યએ પાન મસાલો ખાધો અને ત્યાં થૂંક્યો.’ હું આવીને તેને સાફ કરાવ્યો. મેં આ કોણે કર્યું તેનો વીડિયો જોયો છે, પણ હું કોઈનું અપમાન  ન થાય તે માટે ધારાસભ્યનું નામ લેતો નથી. વિધાનસભા અધ્યક્ષ સતીશ મહાનાએ વધુમાં જણાવ્યું હતું કે વિધાનસભા કોઈ એક વ્યક્તિની નથી પરંતુ 403 ધારાસભ્યો અને ઉત્તર પ્રદેશના 25 કરોડ લોકોની છે. તેને સ્વચ્છ અને ગૌરવપૂર્ણ રાખવાની જવાબદારી બધા સભ્યોની છે.

અધ્યક્ષે બાદમાં કહ્યુ કે, જેણે આ કૃત્ય કર્યુ છે, તેની ઓળખ થઈ ગઈ છે. જો તે ધારાસભ્ય જાતે પોતાની ભૂલ સ્વીકારી લે તો સારૂ છે. બાકી તો મારે બોલાવવા પડશે. જો કોઈ અન્ય ધારાસભ્ય આ પ્રકારનું કૃત્ય કરે તો સાથી ધારાસભ્યો આમ કરતા રોકવા જોઈએ.