Jamnagar: જામનગર જિલ્લામાં અકસ્માતોનો સિલસિલો ચાલુ છે. જામનગર-જોડિયા હાઇવે પર બાલંભા ગામના પાટિયા પાસે હિટ એન્ડ રનની ઘટનામાં, જામનગરના એક યુવાનને ડમ્પરે ટક્કર મારી હતી, જેમાં તે ગંભીર રીતે ઘાયલ થયો હતો અને બાદમાં તેનું મોત નીપજ્યું હતું. જામનગરના ચાર મિત્રો આમરણ દરગાહથી પરત ફરી રહ્યા હતા ત્યારે અકસ્માત થયો હતો. બીજો અકસ્માત કાલાવડ નજીક ખંડેરામાં થયો હતો, જ્યાં એક્ટિવા સ્કૂટર અને ટ્રક વચ્ચે ટક્કરમાં જામનગરના બે યુવાનો ગંભીર રીતે ઘાયલ થયા હતા અને તેમને સારવાર માટે હોસ્પિટલમાં લઈ જવામાં આવ્યા હતા.
પહેલો અકસ્માત જોડિયા-જામનગર હાઇવે પર બાલંભા ગામના પાટિયા પાસે થયો હતો. વાહન નંબર GJ 10 TY 8871 વાળા ડમ્પરના ચાલકે વાહન નંબર GJ 10 CJ 8778 વાળા ઝડપી ગતિએ આવતી બાઇકને ટક્કર મારી હતી, જેમાં જામનગરના રહેવાસી 19 વર્ષીય શકીલ મોહમ્મદ હનીફ અન્સારીનું ઘટનાસ્થળે જ મોત થયું હતું. અકસ્માત બાદ ડમ્પર ચાલક ઘટનાસ્થળેથી ભાગી ગયો હતો. મૃતક શકીલ, જામનગરથી આમરણ દરગાહ પર ચાર અન્ય મિત્રો આફતાબ યુનુસભાઈ દરઝાદા, અમન સંધી અને મહેબૂબભાઈ સાથે ગયો હતો અને ત્યાંથી પરત ફરી રહ્યો હતો ત્યારે બાલંબા નજીક આ દુ:ખદ અકસ્માત સર્જાયો. શકીલના પિતા મોહમ્મદ હનીફ અંસારીએ જોડિયા પોલીસ સ્ટેશનમાં ડમ્પર ચાલક વિરુદ્ધ ફરિયાદ નોંધાવી છે અને જોડિયા પોલીસે વધુ તપાસ શરૂ કરી છે.
બીજો અકસ્માત જામનગર-કાલાવડ હાઇવે પર ખંડેરા ગામના પાટિયા પાસે થયો હતો. જામનગરના નવાગામ ઘેરડના રહેવાસી 32 વર્ષીય હરપાલસિંહ મહેન્દ્રસિંહ ગોહિલ અને ઇન્દ્રજીતસિંહ ગુમાનસિંહ બારડ, વ્યવસાય માટે જામનગરથી કાલાવડ રોડ પર જઈ રહ્યા હતા. GJ10 TY 3837 નંબરના ટ્રકના ચાલકે ખંડેરા ગામના પાટિયા પાસે તેમને ટક્કર મારી હતી.
અકસ્માતમાં બંને યુવાનો ગંભીર રીતે ઘાયલ થયા હતા. કાલાવડ સરકારી હોસ્પિટલમાં સારવાર લીધા બાદ, હરપાલ સિંહને જામનગરની સરકારી જીજી હોસ્પિટલમાં દાખલ કરવામાં આવ્યા હતા, અને ઇન્દ્રજીતસિંહજીને રાજકોટની એક હોસ્પિટલમાં દાખલ કરવામાં આવ્યા હતા. બંનેની સારવાર ચાલી રહી છે. હરપાલ સિંહની પત્ની પૂર્ણમ્બા ગોહિલે કાલાવડ ગ્રામ્ય પોલીસ સ્ટેશનમાં ટ્રક ડ્રાઈવર વિરુદ્ધ ફરિયાદ નોંધાવી છે. કાલાવડ ગ્રામ્ય પોલીસ આ મામલે વધુ તપાસ કરી રહી છે.