સુરેન્દ્રનગર: થાનગઢ પોલીસે ગુપ્ત માહિતીના આધારે અમરાપાર, કપુરવાવના રહેવાસી આશિષ રાજુ મોરીને નકલી નોટો સાથે ઝડપી લીધો છે. પોલીસે શંકા જન્મતાં યુવકને ખાખરાળી ચોકડીથી પકડ્યો હતો. તેની તપાસ દરમિયાન મળેલી નોટોનું સત્યાપન કરવા માટે ભારતીય સ્ટેટ બેન્કની થાનગઢ શાખામાં મોકલવામાં આવી હતી. બેન્ક મેનેજરે મશીન દ્વારા તપાસ કર્યા બાદ આ નોટોને નકલી જાહેર કરી હતી.
21 વર્ષીય આરોપી આશિષ મોરીએ જણાવ્યું કે, તેને આ નોટો ખાખરાળીના રહેવાસી અજય ઉગ્રેજિયા પાસેથી મળી હતી. અજયે તેને ₹500ની 100 નકલી નોટો આપી હતી, જેમાંથી 3 નોટ તેણે અલગ-અલગ જગ્યાએ બદલી લીધી હતી. FSL અધિકારી અભિજીતસિંહ પઢિયારે પણ નોટોની તપાસ કરી અને તેના નકલી હોવાની પુષ્ટિ કરી. પોલીસે આરોપી પાસેથી ₹500ની 97 નકલી નોટો અને ₹10,000ની કિંમતનો એક મોબાઇલ ફોન જપ્ત કર્યો છે.