RPF Latest News: વાપીમાં ગુટખા તસ્કરી પર આરપીએફની મોટી કાર્યવાહી: 14 લાખનો ગુટખા જપ્ત, 17 લોકોની ધરપકડ

RPF Latest News:  વાપી: વાપી રેલવે સ્ટેશન પર અગાઉ દારૂની ગેરકાયદેસર હેરાફેરીના સમાચાર સામે આવતા હતા, પરંતુ હવે ગુટખા અને પાન મસાલાની તસ્કરી પણ શરૂ થઈ છે. આરપીએફ (રેલવે પ્રોટેક્શન ફોર્સ)એ વાપી સ્ટેશન પરથી 14 લાખ 54 હજાર 359 રૂપિયાનો ગુટખો અને પાન મસાલો જપ્ત કરી 17 આરોપીઓની ધરપકડ કરી છે.

આરપીએફ વાપી પોસ્ટ ઈન્સપેક્ટર આશિષ તિવારીના નિર્દેશન હેઠળ હાથ ધરવામાં આવેલી આ કાર્યવાહી અંગે જણાવવામાં આવ્યું છે કે મહારાષ્ટ્રમાં ગુટખા અને પાન મસાલા પર પ્રતિબંધ છે. આરપીએફ ટીમ સ્ટેશન પર ગેરકાયદેસર તસ્કરીને રોકવા માટે સતત નજર રાખી રહી હતી. આ દરમિયાન એએસઆઈ નીતિન કુમાર ટંડેલ, એએસઆઈ ગિરધારી લાલ, રાજુ જાધવ અને સીપીડીએસ ટીમ તથા પ્લેટફોર્મ ડ્યૂટી સ્ટાફને પ્લેટફોર્મ નંબર 2 પર બેગ લઈને ઊભેલા કેટલાક લોકોની હિલચાલ શંકાસ્પદ લાગી.

આરપીએફ ટીમે તેમની બેગની તપાસ કરતાં તેમાંથી ગેરકાયદેસર ગુટખો અને પાન મસાલો મળી આવ્યો. પોલીસે જણાવ્યું કે 17 લોકો પાસેથી 59 બેગમાં કુલ 14 લાખ 54 હજાર 359 રૂપિયાનો ગુટખો જપ્ત કરવામાં આવ્યો. આ પછી તમામ આરોપીઓની ધરપકડ કરવામાં આવી. આરોપીઓને રેલવે મેજિસ્ટ્રેટ સમક્ષ રજૂ કરવામાં આવ્યા, જ્યાં દરેક પર 300 રૂપિયાનો દંડ ફટકારવામાં આવ્યો અને જપ્ત કરાયેલો માલ નષ્ટ કરવાનો આદેશ આપવામાં આવ્યો.

ઉલ્લેખનીય છે કે મહારાષ્ટ્રમાં ગુટખા અને તમાકુજન્ય પદાર્થો પર પ્રતિબંધ હોવાથી વાપી અને અન્ય રાજ્યોમાંથી વાહનો દ્વારા મહારાષ્ટ્રના વિવિધ ભાગોમાં ગુટખાની મોટા પાયે તસ્કરી થઈ રહી છે.